បណ្ដាហ្វេនៗ និងអ្នកស្នេហាវិស័យបវរកញ្ញាយ៉ាងច្រើនកុះករបានសម្តែងក្តីរំភើបរីករាយចំពោះភាពជោគជ័យរបស់ ព្រះកាយច័ន្ទ ដែលនាងបានឈ្នះមកុដ Miss Grand Phnom Penh កាលពីយប់ថ្ងៃទី២ ខែកុម្ភៈ ឆ្នាំ ២០២៤។


ព្រះកាយច័ន្ទ ផ្ដល់បទសម្ភាសន៍ឱ្យដឹងថា នាងមានអារម្មណ៍រំភើបពេលឮគេប្រកាសឈ្មោះខណ្ឌរបស់ខ្លួន តែទន្ទឹមនោះក៏មានអារម្មណ៍សម្ពាធដូចគ្នា ព្រោះចាប់ពីពេលនេះទៅនាងត្រូវបំពេញកាតព្វកិច្ច និងតួនាទីឱ្យល្អបំផុតតាមដែលអាចធ្វើទៅបាន ដើម្បីចូលរួមប្រកួតបន្ត Miss Grand Cambodia ក៏ដូចជាឱ្យស្ថាប័ន MGC មើលឃើញពីឥទ្ធិពលរបស់ Miss Grand Phnom Penh។
ម្ចាស់ជយលាភីរូបនេះថា ពេលបានក្លាយជា Miss Grand Phnom Penh នាងហាក់មានអារម្មណ៍ប្លែកខុសពីមុនដែលធ្លាប់តែជាសិល្បការិនីម្នាក់ និងមិនសូវមានភាពប្រុងប្រយ័ត្នច្រើនចំពោះអាកប្បកិរិយា និងការនិយាយស្តីនោះទេ ប៉ុន្តែឥឡូវនេះនាងត្រូវតែបង្កើនការប្រុងប្រយ័ត្នឱ្យបានច្រើន។


ដណ្តើមមកុដ Miss Grand Phnom Penh បានភ្លាម មនុស្សសំខាន់ដែល ព្រះកាយច័ន្ទ នឹកដល់មុនគេ គឺលោកឪពុកដែលបានចែកឋានទៅ ដោយនាងបានអធិដ្ឋាននៅក្នុងចិត្តរហូតថា «ប៉ាប្រាកដជាមើលឃើញ ប៉ានឹងរីករាយ និងមានមោទនភាពចំពោះកូនស្រីម្នាក់នេះ»។
ឆ្លៀតឱកាសដ៏ពិសេសនេះ ម្ចាស់មកុដ Miss Grand Phnom Penh សូមថ្លែងអំណរគុណដល់ប្រិយមិត្តទាំងអស់ ក៏ដូចជាហ្វេនៗដែលបានគាំទ្រ និងលើកទឹកចិត្តដល់រូបនាង។ ចាប់ពីវិនាទីនេះតទៅ នាងនឹងព្យាយាមធ្វើអ្វីដែលល្អសម្រាប់សង្គម អ្វីដែលល្អ ដើម្បីឱ្យពុកម៉ែបងប្អូន និងប្រជាពលរដ្ឋខ្មែរមានទំនុកចិត្តមកលើរូបនាងថា នាងពិតជាអាចតំណាងប្រទេសកម្ពុជាឡើងទៅលើឆាកអន្តរជាតិ៕































Account
Security
Favourite Content