ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
អ្នកស្នេហាវិស័យបវរកញ្ញានៅកម្ពុជា រួមទាំងហ្វេនៗអ្នកប្រើប្រាស់បណ្តាញសង្គមហ្វេសប៊ុក មានការភ្ញាក់ផ្អើលជាខ្លាំង ដោយស្ងាត់ៗ កញ្ញា ពេជ្រ វត្តីសារ៉ាវឌ្ឍី 5th Runner up Miss Grand International 2022 ស្រាប់តែលេចមុខការហាត់សមត្រៀមសម្រាប់ការសម្ដែងក្នុងព្រឹត្តិការណ៍ដ៏អស្ចារ្យ «រាត្រីចងចាំ លើកទី៤ ឆ្នាំ២០២៣»ជាមួយសិល្បករ-សិល្បការនី និងរៀមច្បងអ្នកសិល្បៈយ៉ាងច្រើនកុះករ។
ក្នុងនោះ វត្តី បានបង្ហោះរូបថតជាច្រើនសន្លឹកបង្ហាញពីសកម្មភាពនៃការហាត់សមយ៉ាងយកចិត្តទុកដាក់ ប៉ុន្តែ មិនបានបញ្ជាក់ឱ្យដឹងថា នាងត្រូវសម្តែងជាតួអង្គអ្វី ក្នុងឈុតណាអ្វីនោះឡើយ។
ភ្ជាប់ជាមួយរូបថតកំពុងពត់ពែនខ្លួនរាំរបាំបុរាណខ្មែរ បវរកញ្ញាដ៏មានប្រជាប្រិយភាពរូបនេះក៏បានរៀបរាប់ថា «ការហាត់សមសម្រាប់រាត្រីចងចាំក្នុងខេត្តសៀមរាបក្នុងពេលឆាប់ៗនេះគាំទ្រសិល្បៈបុរាណខ្មែរ» ថែមទាំងបានសុំការខន្តីអភ័យទោសទុកជាមុនទៀតផងប្រសិនបើមានកំហុសខុសឆ្គងណាមួយ ព្រោះនេះជាការហាត់សមនៅមានកែតម្រូវបន្ថែមទៀត ។
គ្រាន់តែឃើញរូបភាពទាំងនេះភ្លាម ហ្វេនៗរបស់ 5th Runner up Miss Grand International 2022រំភើបចិត្តជាខ្លាំង និងបានសម្តែងការស្ងប់ស្ងែងចំពោះ ពេជ្រ វត្តីសារ៉ាវឌ្ឍី ជាខ្លាំង ព្រោះ idol ក្នុងដួងចិត្តពួកគេមិនដែលធ្វើឱ្យខកបំណងម្តងណាឡើយ ដោយនាងតែងតែឆ្លៀតពេលចូលរួមជួយព្រឹត្តិការណ៍ជាតិធំៗជាបន្តបន្ទាប់ ទោះបីបច្ចុប្បន្ននាងមានការងារច្រើនទាំងក្នុង និងក្រៅប្រទេសក៏ដោយ។
ឆ្លៀតឱកាសនេះ វត្តី ក៏បានប្រកាសហៅអ្នកគាំទ្រនាងឱ្យទៅលេងកម្សាន្តព្រឹត្តិការណ៍ «រាត្រីចងចាំ ឆ្នាំ២០២៣» ឱ្យបានច្រើនកុះករផងដែរ ពិសេសគឺបានទស្សនាការសម្តែងរបស់នាងដោយផ្ទាល់តែម្តង។
សូមជម្រាបដែរថា ជារៀងរាល់ឆ្នាំ ដើម្បីរួមចំណែកក្នុងការទាក់ទាញភ្ញៀវទេសចរ «វប្បធម៌ដើម្បីទេសចរណ៍ ទេសចរណ៍ដើម្បីវប្បធម៌» ក្រសួងវប្បធម៌ និងវិចិត្រសិល្ប: តែងតែរៀបចំនូវព្រឹត្តិការណ៍វប្បធម៌ផ្សេងៗ ពិសេសព្រឹត្តិការណ៍រាត្រីចងចាំ ដែលមានផ្ទាំងទស្សនីយភាពសិល្ប:ចម្រុះដ៏អស្ចារ្យ នឹងមានការចូលរួមសម្តែងពីសិល្បករ សិល្បការិនីទាំងក្នុង និងក្រៅប្រព័ន្ធ សរុបប្រមាណជាង ៣០០នាក់។
តួយ៉ាង សម្រាប់ព្រឹត្តិការណ៍ «រាត្រីចងចាំ និងរាត្រីសមោសរ» ឆ្នាំ២០២៣ លើកទី៤ គ្រោងនឹងរៀបចំនៅថ្ងៃទី ១៣-១៤ ខែធ្នូ ឆ្នាំ២០២៣ ខាងមុខ នៅទីធ្លាព្រះលានជល់ដំរី និងប្រាសាទបាពួន ក្នុងតំបន់រមនីយដ្ឋានអង្គរ ទីរួមខេត្តសៀមរាប។ ខណៈមហាព្រឹត្តិការណ៌វប្បធម៌ «រាត្រីចងចាំ ឆ្នាំ២០២៣» លើកទី៤ កំពុងខិតជិតមកដល់ ឯកឧត្តម ទិត ថាវរិទ្ធ រដ្ឋលេខាធិការ និងជាប្រធានក្រុមការងារប្រតិបត្តិ បានធ្វើការដឹកនាំកិច្ចប្រជុំ ស្ដីពីការរៀបចំទស្សនីយភាពសិល្បៈ និងបន្តចុះត្រួតពិនិត្យកិច្ចការងារៀបចំផ្សេងៗជាហូហែរ ត្រៀមពាំនាំនូវផ្ទាំងទស្សនីយភាពសិល្បៈចម្រុះដ៏អស្ចារ្យមកបង្ហាញក្នុងថ្ងៃព្រឹត្តិការណ៍។
ទន្ទឹមនឹងនោះ សិល្បករ សិល្បការិនីទាំងក្នុង និងក្រៅប្រព័ន្ធយ៉ាងច្រើនកុះករ ក៏កំពុងដុតដៃដុតជើងក្នុងការហាត់សមត្រៀមសម្រាប់ការសម្ដែងក្នុងព្រឹត្តិការណ៍ដ៏អស្ចារ្យ«រាត្រីចងចាំ លើកទី៤ ឆ្នាំ២០២៣»នេះផងដែរ។
កុំភ្លេចទៅចូលរួមព្រឹត្តិការណ៍ «រាត្រីចងចាំ ឆ្នាំ២០២៣» ឱ្យបានច្រើនកុះករ ដើម្បីបានទស្សនាផ្ទាំងទស្សនីយភាពសិល្ប:ចម្រុះ និងការសម្តែងដ៏អស្ចារ្យពីសិល្បករ សិល្បការិនីល្បីៗរបស់ខ្មែរយើង!
Account
Security
Favourite Content