នៅថ្ងៃទី ៦ ខែឧសភា ក្រុមចម្រៀង Stray Kids បានបង្កើតប្រវត្តិសាស្ត្រដោយក្លាយជាក្រុម K-Pop ដំបូងគេដែលត្រូវបានអញ្ជើញឱ្យចូលរួមក្នុងកម្មវិធី MET Gala ទាំងអស់គ្នា នៅទីក្រុងញូវយ៉ក។ សមាជិកទាំង ៧រូបត្រូវបានអញ្ជើញឱ្យចូលរួមដោយម៉ាក Tommy Hilfiger ដោយស្លៀកនូវសម្លៀកបំពាក់រចនាសម្រាប់ពួកគេជាពិសេស។

សមិទ្ធផលនេះបានធ្វើឱ្យអ្នកគាំទ្រ Stray Kids ជាច្រើនមានមោទនភាព និងបានសរសើរមិនដាច់ពីមាត់ចំពោះភាពស្រស់សង្ហានៃអាយដល់របស់ខ្លួន។ យ៉ាងណាមិញ គេក៏បានកត់សម្គាល់ឃើញភាពមិនប្រក្រតីមួយចំនួនដែរពីការបង្ហាញខ្លួនលើកម្រាលព្រំក្រហមរបស់ Stray Kids លើកនេះ។
នៅក្នុងឃ្លីបវីដេអូមួយពីប្រភពប្រព័ន្ធផ្សព្វផ្សាយ គេបានឮក្រុមអ្នកថតរូបនិយាយចំអកពីក្រុម Stray Kids ដោយមានការលើកឡើងថាពួកគេដូចជា “មនុស្សយន្ត”។ ក្នុងឃ្លីបនោះមានអ្នកថតម្នាក់និយាយថា៖ “តាំងពីកើតមក មិនដែលឃើញមនុស្សមុខងាប់ ច្រើនបែបនេះទេ” ហើយអ្នកថតរូបម្នាក់ទៀតក៏និយាយថា៖ “ពួកគេដូចមនុស្សយន្ត”។

នៅពេលដែល Stray Kids ដោះអាវក្រៅបញ្ចេញសម្លៀកបំពាក់មួយឈុតទៀតរបស់ពួកគេ ក្រុមអ្នកថតរូបក៏លាន់មាត់បែបអវិជ្ជមានទៀត។ នៅក្នុងវីដេអូមួយផ្សេងទៀត ក្រុមអ្នកថតបានព្យាយាមផ្តល់ទិសដៅដល់ពួកគេដោយប្រើសម្ដីមិនសូវជាសមរម្យ ដោយម្នាក់ស្រែកថា៖ “គ្រប់គ្នាលោត!” មុនពេលអ្នកផ្សេងទៀតនិយាយថា៖ “ខិតស្ដាំ ភាសាកូរ៉េគេនិយាយយ៉ាងម៉េច?” ហើយក៏នាំគ្នាសើច។
ពាក្យសម្ដីរបស់ក្រុមអ្នកថតរូបទាំងនេះបានបង្ហាញម្ដងទៀតនូវផ្នត់គំនិតរបស់លោកខាងលិចចំពោះតារាខេប៉ុប ដែលយល់ថាពួកគេឫកពា គ្មានអារម្មណ៍ និងមិនចេះភាសាអង់គ្លេសជាដើម។ អ្នកគាំទ្រជាច្រើននិយាយថាពួកគេខ្ពើមរអើមចំពោះការបញ្ចេញមតិដ៏ឈ្លើយ និង “រើសអើង” ដែលបានធ្វើឡើងក្នុងពេលវេលាដ៏សំខាន់មួយក្នុងអាជីពរបស់ Stray Kids ៕
























Account
Security
Favourite Content