ក្រុមចម្រៀងកូរ៉េខាងត្បូង NewJeans បានបរិច្ចាគទឹកប្រាក់ ១០០ លានវ៉ុន ឬប្រមាណ ៧ ម៉ឺនដុល្លារអាមេរិក ដើម្បីជាជំនួយដល់កុមារ និងយុវជនដែលមានបញ្ហាក្នុងការទទួលបន្ទុកមើលថែទាំគ្រួសារ ហេតុថាសមាជិកដែលជាមនុស្សពេញវ័យ ជាមនុស្សមានពិការភាព មានជំងឺ និងស្ថិតក្នុងវ័យចំណាស់ជាដើម។

នៅថ្ងៃទី១៩ ខែធ្នូ ឆ្នាំ ២០២៤ នេះ អង្គការសុខមាលភាពកុមារ ChildFund Korea បានចេញសេចក្ដីអរគុណទៅដល់ទឹកចិត្តសប្បុរសរបស់សមាជិកទាំង ៥ រូបថា៖ “Minji, Hani, Danielle, Haerin និង Hyein បានបរិច្ចាគប្រាក់ ១០០ លានវ៉ុនដើម្បីជួយសម្រាលបន្ទុករបស់ក្មេងៗ និងយុវវ័យដែលត្រូវរ៉ាប់រង មើលថែទៅលើសមាជិកគ្រួសារនៅចុងឆ្នាំនេះ ដោយជំនួយនេះនឹងអាចជួយជីវិតរបស់ពួកគេ ដើម្បីអាចផ្ដោតទៅលើការធំធាត់ដែលប្រសើរជាងមុន”។
ដើម្បីការពារជម្លោះបន្ថែមជាមួយនឹងក្រុមហ៊ុន ពួកនាងបានសម្រេចចិត្តប្រើប្រាស់ឈ្មោះក្រុមអ្នកគាំទ្រ Bunnies ជាសប្បុរសជន និងបានរៀបរាប់ថា៖ “ខ្ញុំចង់ជួយអ្នកទាំងនោះ ដើម្បីអាចឱ្យគាត់ធំធាត់បានដោយមានសុខភាពល្អ និងមានឯករាជ្យភាពលើខ្លួនឯង។ យើងនឹងនៅតែបន្តយកចិត្តទុកដាក់ទៅលើក្មេងៗ ដើម្បីអាចឱ្យពួកគេសម្រេចក្ដីសុបិនបស់ខ្លួនឯងបាន”។

ក្នុងទស្សនៈតែមួយ តំណាងពី ChildFund Korea បានបន្ថែមថា ក្រុមការងាររបស់ខ្លួននឹងព្យាយាមរកវិធីសាស្រ្តដទៃទៀត ដើម្បីអាចជួយក្មេងៗដែលខ្វះខាត ដើម្បីអាចឱ្យពួកគេរស់នៅក្នុងបរិយាកាសដែលប្រសើរជាងមុន។ ទន្ទឹមគ្នានេះ អង្គការនឹងបែងចែកប្រាក់ជំនួយទាំងអស់ទៅកាន់គ្រួសារដែលខ្វះខាតចំនួន ៣០ គ្រួសារ ដើម្បីអាចកាត់បន្ថយកង្វល់ក្នុងការចាយវាយនានា ដូចជា ថ្លៃផ្ទះ ថ្លៃសិក្សា និងថ្នាំសង្កូវជាដើម។
គួររំឭកផងដែរថា ក្រោយពីប្រកាសបញ្ចប់កិច្ចសន្យាផ្ដាច់មុនជាមួយនឹង ADOR កាលពីពេលថ្មីៗនេះ ម្ចាស់បទ «Super Shy» បានបង្កើតគណនី Instagram ថ្មីមួយរួមគ្នា ដោយប្រើប្រាស់ឈ្មោះថា “jeanzforfree” ក្នុងគោលបំណងផ្សព្វផ្សាយពីអាជីពឯករាជ្យរបស់ខ្លួន។ ឆ្លើយតបនឹងរឿងរ៉ាវនេះ ក្រុមហ៊ុនក៏បានចេញសេចក្ដីប្រកាសមួយកាលពីថ្ងៃទី១៨ ខែធ្នូថា ខ្លួនមិនទទួលស្គាល់គណនីណាទាំងអស់ ក្រៅពីគណនីផ្លូវការដែលបង្កើតឡើងដោយ ADOR ព្រមទាំងសង្ឈឹមថា សិល្បករទាំង ៥ រូបនឹងនៅតែបន្តផ្សព្វផ្សាយសកម្មភាពរបស់ខ្លូនតាមរយៈគណនីដែលមានឈ្មោះថា “newjeans_official“៕
























Account
Security
Favourite Content