គិតមកទល់ពេលនេះរយៈពេលប្រមាណជាង ៣ ឆ្នាំហើយ ដែលតារាចម្រៀងឯករាជ្យ លោក អ៊ួន បឋម ហៅ សាយ ខកខានបញ្ចេញស្នាដៃភាពយន្តថ្មី ខណៈស្នាដៃភាពយន្តចុងក្រោយដែលលោកចូលរួមសម្តែងជាមួយពិធីការិនីរាងតូចច្រឡឹង យូ កាម៉ុនរ៉ាត់ ចំណងជើងថា «ពន្លឺនៃក្តីស្រៃ-Yellow Ligh» បានទម្លាក់លើទីផ្សារ កាលពីអំឡុងឆ្នាំ ២០២០ កន្លងទៅ។

គួរឱ្យភ្ញាក់ផ្អើល សាយ ស្រាប់តែលេចមុខក្នុងខ្សែភាពយន្តខ្នាតធំ «អ៊ុំចនម៉ែដោះ» នាដើមឆ្នាំ ២០២៤ នេះ ធ្វើឱ្យហ្វេនៗ និងមិត្តភ័ក្តអ្នកសិល្បៈ មានការភ្ញាក់ផ្អើលជាខ្លាំងជាមួយការផ្លាស់ប្តូររសជាតិថ្មី ដែលគេពុំធ្លាប់ឃើញលោកសម្តែងតួអង្គបែបនេះពីមុនមកឡើយ។ សូម្បីតែ កាម៉ុនរ៉ាត់ ក៏អស់សំណើចពេលនឹកឃើញដល់ការតុបតែខ្លួនរបស់ សាយ ក្នុងរឿងកំប្លែងមនោសញ្ចេតនានេះដែរ។
ផ្តល់កិច្ចសម្ភាសន៍ដោយទឹកមុខរំភើបរីករាយ កាម៉ុនរ៉ាត់ និង សាយ បានលើកឡើងថា អ្នកទាំងពីរសប្បាយចិត្ត ដែលបានចូលរួមសម្តែងក្នុងខ្សែភាពយន្តខ្នាតធំ «អ៊ុំចនម៉ែដោះ» របស់អ្នកដឹកនាំរឿងជើងចាស់ដ៏ល្បី លោក ឆាយ បូរ៉ា។ មែនទែនទៅ នេះជាលើកដំបូងបង្អស់ដែលអ្នកទាំងពីរមានឱកាសសម្តែងរឿងជាមួយ idol ក្នុងដួងចិត្តអ្នកទាំងពីរ ដែលជាម្ចាស់ស្នាដៃរឿង «ឃ្លាតទៅសែនឆ្ងាយ» និងរឿង «លោកគ្រូប្រពន្ធល្អ»។

កាម៉ុនរ៉ាត់ បន្តថា ក្នុងរឿងនេះនាងសម្តែងជាតួប្អូនស្រីរបស់មេម៉ាយកូន ៥ ឌី សូនិត្តា ហើយជាមនុស្សស្រីដែលចូលចិត្តចម្រៀង និងតន្ត្រី។ ចំណែក កំលោះសង្ហាសំឡេងពីរោះ សាយ វិញ សម្តែងជាតួអង្គឈ្មោះ ថ្ម ត្រូវជាក្មួយរបស់អ៊ុំចនតែម្តង។
សាយ រៀបរាប់ឱ្យដឹងថា ការសម្តែងតួអង្គ ថ្ម គឺជាការ Challenge ដ៏ធំសម្រាប់លោក ព្រោះវាខុសពីអត្តចរិតពិតរបស់លោកដាច់តែម្តង។ ប៉ុន្តែលោកសប្បាយចិត្តក្នុងការសម្តែងតួអង្គថ្មីៗបែបនេះ ទុកជាការ Challenge ខ្លួនឯង។ ចំណុចដែលពិបាកសម្តែងបំផុតក្នុងរឿងនេះ គឺការបញ្ចេញអារម្មណ៍ជាតួអង្គ ថ្ម ដែលតម្រូវឱ្យលោកដាក់មនោសញ្ចេតនាដ៏ជ្រាលជ្រៅចូលទៅក្នុងតួអង្គកំលោះអ្នកក្រីក្រ ត្រដរឡើងមកទីក្រុង ដើម្បីក្រេបជញ្ជក់ចំណេះដឹង។

សាយ គិតថា ទស្សនិកជននឹងដាក់អារម្មណ៍តាមតួអង្គ ថ្ម នេះច្រើន ព្រោះតួអង្គនេះឆ្លុះបញ្ចាំងពីជីវិតពិតរបស់ប្អូនៗមួយចំនួនធំដែលឡើងមករៀនបន្តនៅភ្នំពេញ ដូចនេះលោកចង់ឱ្យគ្រប់គ្នាមកទស្សនារឿងនេះឱ្យច្រើន រួចជួយវាយតម្លៃការសម្តែងរបស់លោកផង។ មិនមែនមានតែឈុតឆាកកម្សត់ប៉ុណ្ណោះទេ កាម៉ុនរ៉ាត់ បង្ហើបថា ក្នុងរឿងនេះមានឈុតឆាកមួយដែលទស្សនិកជននឹងសើចរហូតរឹងពោះ ព្រោះតែស្ទីល៍តុបតែងខ្លួនថ្មីរបស់កំលោះសាយ ដើម្បីទៅញ៉ែស្រីស្អាត កាម៉ុនរ៉ាត់។



ខកខានសម្តែងអារម្មណ៍មនោសញ្ចេតនាជាមួយគ្នាអស់រយៈពេលជាង ៣ ឆ្នាំ ពិធីការិនី យូ កាម៉ុន់រ៉ាត់ និងតារាចម្រៀងឯករាជ្យ សាយ នៅតែត្រូវដងត្រូវផ្លែគ្នាល្អ ធ្វើឱ្យការសម្តែងដំណើរការទៅបានយ៉ាងរលូន។ កុំភ្លេចទៅទស្សនារឿង «អ៊ុំចនម៉ែដោះ» ឱ្យបានច្រើនកុះករ នៅតាមរោងភាពយន្តទំនើបទូទាំងប្រទេសកម្ពុជា!























Account
Security
Favourite Content