ជឿជាក់ថាប្រិយមិត្តអ្នកអានបានជ្រាបស្រាប់ហើយថា លោក ហ្វៃ សំអាង បានកំពុងត្រៀមថតរឿងភាគបុរាណខ្នាតធំមួយចំណងជើងថា «អប្សារាមហាអង្គរ» ឆាប់ៗខាងមុខនេះ។ ផលិតកររូបនេះ ប្រមូលអស់តារាសម្តែងចាស់-ក្មេងល្បីៗ មកសម្តែងក្នុងរឿងបុរាណ មិនលើកលែងសូម្បីតារាសម្តែងស្រីដ៏ល្បីអំឡុងទសវត្សរ៍ឆ្នាំ ៨០-៩០ អ្នកស្រី អម្ពរ ទេវី និងអតីតតារាសម្តែងជំនាន់ឆ្នាំ ៨០-៩០ អ្នកស្រី នារី រ័ត្នគន្ធា ក៏ហោះពីនាយសមុទ្រមកខ្មែរ ដើម្បីថតរឿងនេះផងដែរ។ ក្នុងនោះ លោក ទេព រិន្ទដារ៉ូ តារាសម្តែងជើងចាស់ដ៏ល្បីល្បាញក៏មានវត្តមានសម្តែងក្នុងរឿងនេះផងដែរ ថែមទាំងសម្តែងតួអង្គសំខាន់ថែមទៀតផង។
ក្នុងនោះតារាប្រុសទសវត្សរ៍ ៨០ លោក ទេព រិន្ទដារ៉ូ សម្តែងជាតួអង្គបណ្ឌិតអក្សរសាស្ត្រ ឈ្មោះ ខីណាព្រាហ្មណ៍ រីឯ អ្នកស្រី អម្ពរ ទេវីត្រូវសម្តែងជាតួអង្គ ព្រះនាម អ្នកអង្គម្ចាស់ស្ត្រី កាមល ជារាជនាដកាអប្សរា ជារាជគ្រូបង្ហាត់បង្ហាញព្រះកេរមរតកដ៏មហាអស្ចារ្យរបស់ជាតិខ្មែរ។ ដោយឡែក អ្នកស្រី នារី រ័ត្នគន្ធា នឹងសម្ដែងជាតួអង្គដែលមានឈ្មោះជម្ពូ ជាស្ត្រីដែលមានចំណេះដឹងខាងមេផ្ទះ មានរបៀបរៀបរយអប់រំមនុស្សនៅជុំវិញខ្លួន។
នេះសរបញ្ជាក់ឱ្យឃើញថា ឆាប់ៗនេះតារាសម្តែងឆ្នើមអំឡុងទសវត្សរ៍ឆ្នាំ ៨០-៩០ ទាំង ៣ រូប នឹងត្រូវប៉ះគ្នាម្តងទៀតក្នុងរឿង «អប្សារាមហាអង្គរ» ហើយអ្នកគាំទ្រជឿជាក់ថារឿងនេះពិតជាកក្រើកជាក់ជាមិនខាននោះទេ ព្រោះទាំង៣នាក់ជាសិល្បករសម្តែងជើងចាស់ពោរពេញដោយបទពិសោធន៍សម្តែងពេញខ្លួន។ យ៉ាងណាមិញ ពេលនេះគេនៅមិនទាន់ដឹងថា អ្នកស្រី នារី រ័ត្នគន្ធា នឹងសម្តែងប៉ះ ទេព រិនដារ៉ូ និងមិត្តភ័ក្កចាស់ អ្នកស្រី អម្ពរ ទេវី បានប៉ុន្មានភាគរយនោះទេ។
សូមជម្រាបថា លោក ទេព រិន្ទដារ៉ូ អ្នកស្រី អម្ពរ ទេវី និងអ្នកស្រី នារី រ័ត្នគន្ធា ជាតារាសម្តែងរូបជំនាន់ជាមួយគ្នា និងបានសាងភាពល្បីល្បាញខ្លាំងរៀងៗខ្លួន។ អ្នកស្រី អម្ពរ ទេវី និងអ្នកស្រី នារី រ័ត្នគន្ធា បានចាកចេញទៅរស់នៅសហរដ្ឋអាមេរិក បើគិតដល់ពេលនេះអ្នកទាំងពីរខកខានឱកាសថតសម្ដែងភាពយន្ដរួមគ្នារយៈពេលជាង២ ទសវត្សរ៍មកហើយ។ គេជឿថា ការវិលមកជួបគ្នាជាថ្មីរវាង អ្នកស្រី អម្ពរ ទេវី អ្នកស្រី នារីរ័ត្ន គន្ធា និងលោក ទេព រិនដារ៉ូ នឹងនៅតែស្និតស្នាល និងស៊ីចង្វាក់ដៃគូចាស់ធ្លាប់ចាប់ដៃគ្នាជិត ៣០ ឆ្នាំជាក់ជាមិនខាន៕























Account
Security
Favourite Content