ថ្មីៗ នេះ តារាសម្ដែងប្រុស Kim Hyun Joong ឬមហាជនជាច្រើនស្គាល់លោកតាមរយៈរឿង F4 របស់ប្រទេសកូរ៉េខាងត្បូង ត្រូវបានគេរាយការណ៍ថា កំពុងជួបបញ្ហាហិរញ្ញវត្ថុ ស្របពេលដែលគ្មានការងារសិល្បៈធ្វើ ជាហេតុបណ្ដាលឲ្យលោកត្រូវបង្ខំចិត្ដទៅធ្វើស្រែចំការនៅឯជនបទវិញ។



ជាការឆ្លើយតបពីតារាប្រុសវ័យ ៣៨ ឆ្នាំរូបនេះ បានឲ្យដឹងថា វាមិនមែនជារឿងពិតដូចគ្រប់គ្នាគិតឡើយ។ មួយរយៈចុងក្រោយ លោកគ្រាន់តែបង្កើតប្រភេទវីដេអូ កម្សាន្ដបែបធម្មជាតិនៅជនបទ។ លោកហាក់មានចំណាប់អារម្មណ៍ក្នុងការដាំដំណាំផ្សេងៗ យ៉ាងខ្លាំង។ វាជាការងារលំបាកហត់នឿយមួយ តែសម្រាប់លោកវាពិតជាគួរឲ្យចាប់អារម្មណ៍ និងសប្បាយរីករាយខ្លាំង។


លោកបានលើកឡើងទៀតថា៖ រដូវផ្ការីកឆ្នាំនេះ ពិតជាមានរយៈពេលយូរជាងរាល់ដង ខែ មិថុនា ក៏ហាក់មានអាកាសធាតុក្ដៅជាងរាល់ដង។ ខ្ញុំកំពុងដាំដំណាំពោត ប្រសិនបើទទួលផលបានល្អ ខ្ញុំនឹងចែកចាយទៅឲ្យអ្នក។ ជាមួយគ្នាដែរ ដីដែលលោកដាំដំណាំត្រូវបានបញ្ជាក់ថា ជាដីកម្មសិទ្ធិរបស់លោកផ្ទាល់ និងមានតម្លៃប្រមាណជិត ១៥ ម៉ឺនដុល្លារអាមេរិក ខណៈលោកបានចំណាយពេលយ៉ាងច្រើននៅឯដីចម្ការរបស់លោក។



តារាប្រុស Kim Hyun Joong ចាប់ផ្ដើមទទួលបានភាពល្បីល្បាញខ្លាំងក្នុងឆ្នាំ ២០០៩ ក្រោយបង្ហាញខ្លួនក្នុងរឿង F4 ឬ Boy Over Flower។ ប្រជាប្រិយភាពរបស់លោកក៏កើនឡើងជាហូរហែរ រហូតដល់ឆ្នាំ ២០១៧ លោកបានចាប់ផ្ដើមធ្លាក់ខ្លួនចូលក្នុងរឿងអាស្រូវជាបន្ដបន្ទាប់ ដូចជាការផឹកស្រវឹងនៅពេលបើកបរ ហើយក្រោយមកក៏ជាប់ចោទរឿងវាយធ្វើបាបអតីតមិត្ដស្រីក្នុងឆ្នាំ ២០១៨ ធ្វើឱ្យអាជីពសិល្បៈរបស់លោកស្ទើរតែរលាយអស់។ រហូតដល់ឆ្នាំ ២០២២ ទើបលោកទទួលបានយុត្ដិធម៌មកវិញ និងត្រូវបានគេរកឃើញលោកស្អាតស្អំមិនបានធ្វើរឿងអស់នោះទេ ព្រមទាំងទទួលបានសំណងប្រមាណជិត ៨ ម៉ឺនដុល្លារអាមេរិកពីអតីតមិត្ដស្រី។ ក្នុងឆ្នាំដដែលលោកក៏បានប្រកាសរៀបការជាមួយមិត្ដស្រីក្រៅសិល្បៈ ៕























Account
Security
Favourite Content