ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ក្រោយកាន់តំណែងលោកជំទាវអ្នកឧកញ៉ា ម៉ៅ ចំណាន សស្រាក់សស្រាំការងាររបស់សមាគមសិល្បករខ្មែរខ្លាំង តួយ៉ាងកាលនាថ្ងៃទី៧ ខែកក្កដា ឆ្នាំ ២០២៤ សមាគមសិល្បករខ្មែរ បានចុះអនុស្សរណៈយោគយល់គ្នាជាមួយអាជ្ញាធរជាតិប្រយុទ្ធប្រឆាំងគ្រឿងញៀន ដើម្បីផលិតជាវីដេអូអប់រំផ្សេងៗ។
នៅក្នុងថ្ងៃចុះអនុស្សរណៈយោគយល់ស្ដីពីកិច្ចសហការពង្រឹង និងលើកកម្ពស់ប្រសិទ្ធភាពការងារផ្សព្វផ្សាយ អប់រំពីផលប៉ះពាល់ និងគ្រោះថ្នាក់នៃគ្រឿងញៀនលោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរប្រសាសន៍ថា សិល្បៈជាអាវុធដ៏មុតស្រួច ដែលអាចចាក់ចូលក្នុងក្រអៅបេះដូងរបស់មហាជនគ្រប់វ័យ គ្រប់ស្រទាប់វណ្ណៈ ជាពិសេសយុវជនតែម្ដង។ ក្នុងន័យនេះសិល្បករ-សិល្បការិនី ពិតជាបុគ្គលដ៏មានសក្ដានុពលបំផុត ក្នុងការរួមចំណែកដល់ការផ្សព្វផ្សាយអប់រំពីផលអាក្រក់ និងគ្រោះថ្នាក់នៃគ្រឿងញៀន។ នាឱកាសដ៏មានន័យនោះដែរ ក៏មានការចូលរួមពីសំណាក់ឯកឧត្ដម នេត សាវឿន ឧបនាយករដ្ឋមន្ត្រី និងជាប្រធានអាជ្ញាធរប្រយុទ្ធប្រឆាំងគ្រឿងញៀន ព្រមទាំងមានការអញ្ជើញចូលរួមពីសំណាក់ថ្នាក់ដឹកនាំ ភាគីពាក់ព័ន្ទ និងវត្តមានសិល្បករ-សិល្បការិនី ជាច្រើនរូប។
អ្នកឧកញ៉ាប្រធានសមាគមសិល្បករខ្មែរបានសង្កត់ធ្ងន់ថា សម្ដីមួយម៉ាត់ ចម្រៀងមួយបទ ឬកាយវិការណាមួយរបស់សិល្បករ សិល្បការិនី ពិតជាមានតម្លៃចុះបញ្ចាំងពីវប្បធម៌ ប្រពៃណី និងការចងចាំជាអវិជ្ជមានក្នុងបេះដូងអ្នកស្ដាប់ និងអ្នកទស្សនា។ ដូច្នេះការចូលរួមរបស់សមាគមសិល្បករខ្មែរនាពេលនេះ ជាស្មារតីនៃចូលរួមចំណែកសម្រេចឱ្យបាននូវឆន្ទៈដ៏មុតស្រួចរបស់រាជរដ្ឋាភិបាលអាណត្តិទី៧នេះ ដឹកនាំដោយសម្ដេចមហាបវរធិបតី ហ៊ុន ម៉ាណែត ដែលបានដាក់ចេញនូវវិធានការដ៏ម៉ឺងម៉ាត់ ក្នុងការប្រយុទ្ធប្រឆាំងគ្រឿងញៀន ដើម្បីប្រែក្លាយប្រទេសកម្ពុជាជាប្រទេសស្អាតស្អំ គ្មានការប្រើប្រាស់គ្រឿងញៀន និងជាប្រទេសគំរូមួយឈានមុខគេក្នុងការប្រយុទ្ធប្រឆាំងគ្រឿងញៀន។
ក្នុងនោះដែរ ឯកឧត្ដម នេត សាវឿន ក៏បានលើកឡើងដែរថា ការចុះអនុស្សរណៈយោគយល់គ្នារវាងអាជ្ញាធរជាតិប្រយុទ្ធប្រឆាំងគ្រឿងញៀន ជាមួយសមាគមសិល្បករខ្មែរជាគំរូល្អមួយសម្រាប់ការអនុវត្តជាមួយស្ថាប័នផ្សេងៗទៀត ដើម្បីចូលរួមសម្រេចឱ្យបានផែនការយុទ្ធសាស្ត្ររបស់រាជរដ្ឋាភិបាលក្នុងការប្រយុទ្ធប្រឆាំងគ្រឿងញៀន។ លោកក៏បានថ្លែងអំណរអរគុណទៅកាន់សិល្បករ សិល្បការិនី ទាំងអស់ ដែលបានចូលរួមសហការក្នុងការប្រយុទ្ធប្រឆាំងគ្រឿងញៀននៅកម្ពុជាតាមរយៈសារជារូបភាព ឬសំណេរ ដើម្បីអប់រំផ្សព្វផ្សាយពីផលប៉ះពាល់ និងគ្រោះថ្នាក់នៃគ្រឿងញៀនទៅកាន់សាធារណជនឬអ្នកគាំទ្ររបស់ខ្លួន។
គួរបញ្ជាក់ផងដែរថា នេះជាមោទកភាពរបស់សមាគមសិល្បករខ្មែរ ក្នុងការចូលរួមលើកកម្ពស់ប្រសិទ្ធភាព អប់រំពីផលប៉ះពាល់ និងគ្រោះថ្នាក់នៃគ្រឿងញៀន៕
Account
Security
Favourite Content