ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
រឿង F4 ឬ Boys Over Flower របស់ប្រទេសកូរ៉េខាងត្បូង ពិតជាមានភាពល្បីល្បាញខ្លាំង ទោះជាមានអាយុកាលជិត ១៥ ឆ្នាំហើយក្ដី ក៏រឿងមួយនេះនៅតែត្រូវបានគេលើកយកមកនិយាយលើបណ្ដាញសង្គម និងចាត់ទុកជារឿងមានគុណភាពខ្លាំងមួយ។ អ្វីដែលធ្វើឲ្យមហាជន និងអ្នកគាំទ្ររឿងមួយនេះ ហាក់មានអារម្មណ៍សោកសៅ និងឈឺក្បាលនោះ គឺតួសម្ដែងជាច្រើនក្នុងរឿងមួយនេះ ខ្លះជួបរឿងអកុសលក៏បានស្លាប់បាត់បង់ជីវិត ឯខ្លះទៀតក៏ជួបរឿងអាស្រូវមិនចេះចប់។ តោះមកមើលស្ថានភាពបច្ចុប្បន្នរបស់តួក្នុងរឿង F4។
សម្រាប់តារាប្រុស Lee Minho លោកត្រូវបានគេចាត់ទុកជាតារាប្រុសជោគជ័យម្នាក់ និងមានតម្លៃខ្លួនខ្ពស់ខ្លាំងរាល់ពេលសម្ដែងរឿងម្ដងៗ។ តែនាពេលបច្ចុប្បន្ន លោកត្រូវបានគេរិះគន់មិនឈប់ ដោយសារការប្រែប្រួលរូបសម្រស់ ជាពិសេសតំបន់មុខ លោកហាក់មើលទៅឡើងគីឡូជាងមុន និងត្រូវបានគេលើកឡើងថាមិនសង្ហាដូចកាលពីមុនឡើយ។ តែទោះជាយ៉ាងណាក្ដីក៏មានមតិជាច្រើនបានលើកឡើងថា វាជារូបរាងរបស់លោក ដូច្នេះវាមិនជាបញ្ហាទោះលោកមានរូបរាងស្គម ឬធាត់។
សម្រាប់តួឯកស្រីវិញ គឺតារាស្រី Goo HyeSun ត្រូវបានមហាជនជាច្រើនរិះគន់មិនឈប់ដោយសារតែរឿងអាស្រូវស្នេហារបស់នាងជាមួយអតីតស្វាមីដែលកន្លងផុតអស់ជាច្រើនឆ្នាំទៅហើយ។ រូបនាងបានជាប់ជំពាក់រឿងក្ដីលែងលះជាមួយអតីតស្វាមីក្នុងឆ្នាំ ២០២០។ Dispatch បានទម្លាយសាររបស់នាង និងអតីតស្វាមី បង្ហាញឲ្យឃើញថា នាងគឺព្យាយាមគ្រប់គ្រងស្វាមីរបស់នាង និងបន្ដបង្ហោះសារប្លែកៗ ជាច្រើនដែលធ្វើឲ្យមហាជនពិបាកទទួលយកខ្លាំង។ រហូតមកដល់បច្ចុប្បន្ន នាងនៅតែជាប់រឿងអាស្រូវផ្សេងៗ ដូចជា ការនិយាយថា នាងមានបញ្ហាហិរញ្ញវត្ថុ និងត្រូវរស់នៅក្នុងរថយន្ដ តែក្រោយមកនាងក៏បានចេញមុខបកស្រាយថា ផ្ទះរបស់នាងកំពុងស្ថិតក្នុងការសាងសង់ថ្មី ហើយនាងកំពុងផ្ដោតលើការសិក្សាផ្នែកសិល្បៈ។
តារាប្រុស Kim HyunJoong ចាប់ផ្ដើមធ្លាក់ប្រជាប្រិយភាពក្នុងឆ្នាំ ២០១៧ លោកបានចាប់ផ្ដើមធ្លាក់ខ្លួនចូលក្នុងរឿងអាស្រូវជាបន្ដបន្ទាប់ ដូចជាការផឹកស្រវឹងនៅពេលបើកបរ ហើយក្រោយមកក៏ជាប់ចោទរឿងវាយធ្វើបាបអតីតមិត្ដស្រីក្នុងឆ្នាំ ២០១៨ ធ្វើឱ្យអាជីពសិល្បៈរបស់លោកស្ទើរតែរលាយអស់។ រហូតដល់ឆ្នាំ ២០២២ ទើបលោកទទួលបានយុត្ដិធម៌មកវិញ និងត្រូវបានគេរកឃើញលោកស្អាតស្អំមិនបានធ្វើរឿងអស់នោះទេ ព្រមទាំងទទួលបានសំណងប្រមាណជិត ៨ ម៉ឺនដុល្លារអាមេរិកពីអតីតមិត្ដស្រី។ បច្ចុប្បន្ន លោកលែងសូវផ្ដោតលើអាជីពសិល្បៈ និងធ្វើវីដេអូបង្ហោះក្នុងយូធូប ជាពិសេសលោកបានចាប់អារម្មណ៍នឹងការដាំដំណាំ ធ្វើចម្ការ។
ចំពោះតារាប្រុស Kim Joon លោកលែងសូវបង្ហាញមុខក្នុងសិល្បៈតទៅទៀត ដោយរឿងភាគលោកសម្ដែងចុងក្រោយបំផុតគឺនៅក្នុងឆ្នាំ ២០១៩។ រីឯតារាប្រុស KimBum បច្ចុប្បន្ន លោកនៅតែបន្ដសម្ដែងរឿង តែលោកមិនសូវបង្ហាញខ្លួនសកម្មក្នុងពិភពសិល្បៈឡើយ។
ក្រោយបង្ហាញខ្លួនក្នុងរឿង Boys Over Flower តារាស្រី Lee MinJung ចាប់ផ្ដើមត្រូវគេចាប់អារម្មណ៍ខ្លាំង តែប្រជាប្រិយភាពរបស់នាងមិនបានហក់ឡើងខ្ពស់ឡើយ គឺនាងសម្រេចចិត្ដរៀបការសាងគ្រួសារជាមួយតារាប្រុសល្បី Lee Byunghun។ តែរៀបការមិនបានប៉ុន្មាន ស្វាមីរបស់នាង បានជាប់ក្នុងរឿងអាស្រូវដ៏ធំមួយក្នុងឆ្នាំ ២០១៤។ លោកត្រូវបានគេរាយការណ៍ថា បានក្បត់ចិត្ដតារាស្រី Lee MinJung ជាមួយតារាស្រីពីរនាក់ Lee JiYeon និង Dahee ពេលនាងកំពុងមានផ្ទៃពោះកូនដំបូង។ ក្រោយមកលោកត្រូវបាន មនុស្សស្រីទាំងពីរនាក់នោះ គំរាមជំរិត។ រឿងអាស្រូវរបស់ស្វាមីនាង ក៏ធ្វើឲ្យប៉ះពាល់ដល់តារាស្រីរូបនេះដូចគ្នា។ កន្លងផុតច្រើនឆ្នាំទើប អ្នកទាំងពីរអាចឈរជើងក្នុងអាជីពសិល្បៈវិញ និងបន្ដលេចមុខជាហូរហែរក្នុងកម្មវិធីនានា។
ក្រឡេកមកមើលតារាស្រី Jang JaYeon វិញ ថ្វីបើមិនទទួលបានភាពល្បីល្បាញដូចតួសម្ដែងផ្សេងៗ តែការស្លាប់បាត់បង់ជីវិតរបស់នាងបានក្លាយជារឿងមួយដែលអ្នកគាំទ្ររឿង Boys Over Flower នៅចងចាំ។ តារាស្រី Jang JaYeon បានធ្វើអត្ដឃាត និងទុកនូវសំបុត្រមួយច្បាប់។ អត្ថន័យក្នុងសំបុត្រនោះបានធ្វើឲ្យមហាជន និងអ្នកគាំទ្រជាច្រើនមានការអាណិតអាសូរដល់រូបនាងពន់ពេក។ នាងបានទម្លាយថា អ្នកគ្រប់គ្រងរបស់នាងបានបង្ខំឲ្យនាងទៅកំដរ អ្នកធំមានមុខមាត់ក្នុងប្រទេសរហូតដល់ ៣១ នាក់។ ក្រោយមក Dispatch បានទម្លាយថា នាងត្រូវបានបង្ខំឲ្យទៅចូលរួមកម្មវិធីជប់លៀងផឹកស៊ីរហូតដល់ជាង ១០០ ដង និងត្រូវគេធ្វើបាបផងដែរ។
ជាមួយគ្នាដែរ បន្ទាប់ពីការស្លាប់បាត់បង់ជីវិតរបស់តារាស្រី Jang JaYeon រយៈពេល ១៤ ឆ្នាំ ក្រោយតួសម្ដែងក្នុងរឿង Boys Over Flower ម្នាក់ទៀតក៏បានស្លាប់បាត់បង់ជីវិត។ នោះគឺតារាប្រុស MoonBin លោកបានសម្ដែងជាតួអង្គ So YiJung កាលពីនៅវ័យក្មេង។ MoonBin បានស្លាប់បាត់បង់ជីវិត កាលពីខែ មេសា ឆ្នាំ ២០២៣។ ការស្លាប់របស់លោកកើតឡើងភ្លាមៗ ដែលធ្វើឲ្យមហាជន និងអ្នកគាំទ្រជាច្រើន ពិបាកទទួលយក។ មកដល់បច្ចុប្បន្ន គេនៅតែមិនទាន់ដឹងថា ការស្លាប់របស់លោកមកពីមូលហេតុអ្វី ថាតើវាជាបញ្ហាសុខភាព ឬការធ្វើអត្ដឃាត។ ក្រុមគ្រួសាររបស់លោកក៏បាសុំរក្សាសិទ្ធិឯកជន មិនបញ្ជាក់ពីមូលហេតុស្លាប់។
ក្រៅពីតារាសម្ដែងដែលបានបាត់បង់ជីវិត សូម្បីតែអ្នកដឹកនាំរឿង Boys Over Flower លោក Jeon Ki Sang ក៏បានស្លាប់បង់ជីវិតដូចគ្នា។ លោកបានជួបគ្រោះថ្នាក់ចរាចរណ៍ នៅក្នុងឆ្នាំ ២០១៨ ដោយត្រូវបានរថយន្ដបុកកំឡុងពេលធ្វើដំណើរលើដងផ្លូវ តំបន់ Yeouido ទីក្រុង សេអ៊ូល ប្រទេសកូរ៉េខាងត្បូង។ ពេលជួបគ្រោះថ្នាក់ភ្លាមៗ លោកត្រូវបានគេដឹកយកទៅសង្គ្រោះបន្ទាន់ តែជាអកុសលលោកត្រូវបាត់បង់ជីវិតដោយសារតែរបួសធ្ងន់ធ្ងរពេក។ រឿងផ្ទួនៗ ពេករហូតដល់ អ្នកនិយមលេងបណ្ដាញសង្គមអ៊ីនធើណេតលើកឡើងថា តួសម្ដែងក្នុងរឿងមួយនេះហាក់ដូចជាជួបបណ្ដាសាអ៊ីចឹង ៕
Account
Security
Favourite Content