តារាសម្តែងប្រុសកំពុងឡើងកូដស្រឺតៗ ខាត់ វ៉ៃហាំង កាន់តែល្បីល្បាញឡើងរាល់ថ្ងៃ តាមរយៈការសម្តែងភាពយន្តដុំ-ភាគ ក្នុងនោះលោកមានសមត្ថភាព ទេពកោសល្យអាចសម្តែងបានទាំងរឿងបែបបុរាណ និងរឿងសម័យ។
ល្បីល្បាញខ្លាំងក្នុងឧស្សាហកម្មភាពយន្ត និងជាបុគ្គលដែលពូកែលេងស្ទីល៍ថតរូបក៏ពិតមែន ប៉ុន្តែតារាប្រុសនិយមតែងខ្លួនបែប gentleman រូបនេះ មិនដែលមានឱកាសប្រឡូកវិស័យម៉ូដែលអាជីពម្តងណាឡើយ ទោះបីកន្លងមកធ្លាប់បានចូលរួមកម្មវិធីដើរកម្រាលព្រំក្រហម និងដើរបង្ហាញក្នុងកម្មវីធីសម្ពោធផលិតផលផ្សេងៗក្នុងនាមជាអ្នកតំណាងក្តី។
តួឯកប្រុសរឿង «លួចស្នេហ៍គូដណ្តឹង» បញ្ជាក់ប្រាប់ថា ការពិតទៅក្នុងនាមជាតារាសម្តែង និងជាអ្នកតំណាងផលិតផលមួយចំនួន លោកគិតថា ខ្លួនឯងមិនមែនជាម៉ូដែលស្តង់ដារដូចគេ ដូច្នេះទើបលោកមិនសូវមានពេលទៅហ្វឹកហាត់ការដើរ។ ម៉្យាងទៀតលោកគិតថា រូបរាងកម្ពស់លោកក៏មិនសមាមាត្រតាមស្តង់ដារនៃអាជីពនេះ ទើបបណ្តោយឱ្យខ្លួនឯងឃ្លាតឆ្លាយពីអាជីពតារាម៉ូដែលតែម្តងទៅ។
តែយ៉ាងណាបើមានឱកាស វ៉ៃហាំង ក៏ចង់សាកល្បងការងារតារាបង្ហាញម៉ូដដូចគ្នា ព្រោះយល់ថាសិល្បករ-សិល្បការិនីជាតារាម៉ូដែលមានការកាច់ស្ទីល៍ និងមានរូបថតស្អាត ថែមទាំងមានឱកាសដើរលើឆាកអន្តរជាតិទៀតផង ដូចជា ស៊ីន យូប៊ីន ជាដើម ដែលមានឱកាសបានដើរបង្ហាញម៉ូដឱ្យសម្លៀកបំពាក់ប៊្រេននៅឆាកអន្តរជាតិ។ និយាយដល់រឿងនេះ លោកក៏ស្ងើចសរសើរដល់ ដៃគូផងដែរ ដែលនាងអាចចាប់យកឱកាសដ៏ធំនេះ និងបានបង្ហាញឱ្យពិភពលោកឃើញពិសមត្ថភាពរបស់កូនខ្មែរយើង។
សម្រាប់ឆ្នាំថ្មី ២០២៣ នេះ វ៉ៃហាំង មមាញឹកការងារសិល្បៈខ្លាំង ដោយលោកទទួលបានការងារច្រើនហូរហែ រួមទាំងភាពយន្ត និងដឹកនាំផលិតកម្មវិធីខ្លួនឯងផង គឺកម្មវិធី «សាកថ្មជីវិត» ដែលកំពុងចាក់បញ្ចាំងលើកញ្ចក់ទូរទស្សន៍ភីអិនអិន។ ក្រៅពីការងារសិល្បៈ តារាប្រុសរូបនេះក៏មមាញឹករឿងបេះដូងជាមួយស្រីស្អាត យូប៊ីន ដោយអ្នកទាំងពីរតែងបណ្តើរគ្នាដូចលលកញីឈ្មោលទៅចូលរួមកម្មវីធីសិល្បៈតូចធំ និងដឹកដៃគ្នាសម្តែងលើឆាកឡើងផ្អែមល្អែម ធ្វើឱ្យហ្វេនស្ទើរលើសជាតិស្ករ ពេលឃើញសកម្មភាពអ្នកទាំងពីរ៕























Account
Security
Favourite Content