ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
តារាសម្ដែងម៉ាឡេស៊ី Michelle Yeoh បានក្លាយជាជនជាតិអាស៊ីដំបូងគេដែលឈ្នះពានរង្វាន់តួឯកស្រីឆ្នើមក្នុងកម្មវិធី Oscar លើកទី៩៥ ដែលបានប្រារព្ធឡើងកាលពីថ្ងៃទី១២ ខែមីនាឆ្នាំ២០២៣។ ឆ្លងកាត់ការតស៊ូយ៉ាងលំបាកអស់រយៈពេល ៤ ទស្សវត្សរ៍ក្នុងឧស្សាហកម្មភាពយន្ត តារាក្បាច់គុន Michelle Yeoh ចាប់ផ្ដើមល្បីល្បាញតាំងពីចុងទសវត្សរ៍ឆ្នាំ ១៩៩០ តាមរយៈភាពយន្តហុងកុងជាច្រើនរហូតដល់មានឈ្មោះល្បីល្បាញលើសលំដាប់អាស៊ី ក្លាយជាតារាលំដាប់ពិភពលោក។
ពីបវរកញ្ញាម៉ាឡេស៊ីក្លាយជាកំពូលនារីប្រចាំអាស៊ី
Michelle Yeoh កើតនៅឆ្នាំ ១៩៦២ ក្នុងគ្រួសារជនជាតិចិននៅប្រទេសម៉ាឡេស៊ី។ ដោយសារតែស្ថានភាពសេដ្ឋកិច្ចគ្រួសារល្អប្រសើរ ឪពុកម្តាយ Michelle Yeoh បានបញ្ជូនអ្នកស្រីទៅរៀនរាំរបាំបាឡេ និងហែលទឹកតាំងពីអាយុ ៤ ឆ្នាំ។ នៅអាយុ ១៥ ឆ្នាំ អ្នកស្រីបានតាមឪពុកម្តាយ ទៅប្រទេសអង់គ្លេសដោយសិក្សារបាំនៅវិទ្យាស្ថាន Royal Institute of British Dance ។ ទោះជាយ៉ាងណា របួសឆ្អឹងខ្នងបានធ្វើឱ្យសុបិនរបស់ក្មេងស្រីដែលចង់ក្លាយជាអ្នករាំរបាំបាឡេអាជីពត្រូវរលាយក្លាយជាផេះ ហើយក៏ត្រូវបង្ខំចិត្តស្វែងរកគោលដៅផ្សេងទៀត។
នៅឆ្នាំ ១៩៨៣ ម្តាយរបស់ Michelle Yeoh បានចុះឈ្មោះឱ្យអ្នកស្រីចូលរួមក្នុង ការប្រលងបវរកញ្ញាម៉ាឡេស៊ី។ ត្បិតថាគ្រាន់តែចូលប្រឡងតាមក្តីប្រាថ្នារបស់ម្តាយពិតមែន ប៉ុន្តែជាមួយនឹងសម្រស់ និងទេពកោសល្យដ៏ប៉ិនប្រសប់ដែលបានបណ្តុះបណ្តាលតាំងពីក្មេង ធ្វើឱ្យ Michelle Yeoh បានក្លាយម្ចាស់មកុដបវរកញ្ញាយ៉ាងល្អឥតខ្ចោះ។ ក្នុងឆ្នាំដដែលនោះ អ្នកស្រីបានតំណាងប្រទេសទៅចូលរួមការប្រកួតសម្រស់នៅទីក្រុង Melbourne ប្រទេសអូស្ត្រាលី ហើយតែងតែទទួលបានតំណែងខ្ពស់ជាងគេ។
បន្ទាប់ពីនោះ អ្នកស្រី Michelle Yeoh បានចូលប្រឡូកក្នុងវិស័យភាពយន្ត ហើយមកដល់ឆ្នាំ ១៩៨៥ អ្នកស្រីក៏ចាប់ផ្ដើមមានឈ្មោះល្បីល្បាញខ្លាំង តាមរយៈការសម្ដែងជាតួឯកស្រីនៅក្នុងខ្សែភាពយន្តក្បាច់គុនដ៏ល្បីល្បាញ “Yes, Madam” ។ ភាពជោគជ័យនៃខ្សែភាពយន្តនេះបានធ្វើឱ្យ Michelle Yeoh ក្លាយជាតារាក្បាច់គុនស្រីដ៏លេចធ្លោក្នុងវិស័យភាពយន្តភាសាចិនក្នុងទសវត្សរ៍ឆ្នាំ ១៩៨០ ។
ជាមួយនឹងការសម្ដែងភាពយន្តបែបក្បាច់គុនជាច្រើនដែលមានទាំងតួស្លូតបូត និងតួវាយតប់ Michelle Yeoh ក្លាយជាតារាសម្ដែងស្រីលំដាប់លេខ ១ របស់អាស៊ី និងបានកសាងកេរ្តិ៍ឈ្មោះតាមរយៈរឿងល្បីៗជាច្រើនដូចជា Police Story 3, Wing Chun, Sword Dance, Crouching Tiger Hidden Dragon…។
ក្នុងវិស័យកុនហូលីវូដវិញ ស្នាដៃល្បីៗរបស់អ្នកស្រីមានដូចជាភាពយន្ត Tomorrow Never Dies, Memoirs of a Geisha, Mummy 3: Tomb of Qin Vuong, The Son of Asia’s Super Rich, Shang-Chi និងថ្មីៗនេះ គឺ Everything Everywhere All At Once ដែលធ្វើឱ្យអ្នកស្រីឈ្នះពានរង្វាន់អូស្កា និងវេទិកាជាច្រើនទៀតនៅហូលីវូដ។
ក្នុងនាមជាតារាស្រីអាស៊ីដ៏ល្បីមួយរូបនៅហូលីវូដ Michelle Yeoh ធ្លាប់ត្រូវបានជ្រើសរើសឱ្យធ្វើជាគណៈកម្មការនៃមហោស្រពភាពយន្តទីក្រុងបែរឡាំងឆ្នាំ ១៩៩៩ ជាជាគណៈកម្មការនៃមហោស្រពភាពយន្តទីក្រុង Cannes ឆ្នាំ ២០០២ ជាប្រធានគណៈកម្មការនៃមហោស្រពភាពយន្តអន្តរជាតិឥណ្ឌាឆ្នាំ ២០១៣ ។ល។ ក្រៅពីនេះ អ្នកស្រីក៏ជាទូតសុច្ឆន្ទៈរបស់ UNICEF មួយរូបផងដែរ។
ក្នុងឆ្នាំ ២០០៩ តារាសម្ដែង Michelle Yeoh ត្រូវបានជ្រើសរើសក្នុងបញ្ជីកំពូលតារាស្រី ៣៥ នាក់ដោយទស្សនាវដ្តី People របស់អាមេរិក ហើយរហូតមកដល់ពេលនេះ អ្នកស្រីតែងតែត្រូវបានគេសរសើរថាជាកំពូលតារាភាពយន្តស្រីលេខ ១ នៅអាស៊ី។
ពានរង្វាន់ Oscar ជាប្រវត្តិសាស្ត្រ
នៅឆ្នាំនេះ Michelle Yeoh ត្រូវបានគេកោតសរសើរយ៉ាងខ្លាំងចំពោះការសម្ដែងនៅក្នុងខ្សែភាពយន្ត Everything Everywhere All At Once។
នៅក្នុងខ្សែភាពយន្តនេះតួអង្គរបស់ Michelle Yeoh ត្រូវឆ្លងភពដើម្បីកម្ចាត់សភាវអាក្រក់ និងជួយសង្គ្រោះភពផ្សេងៗ។ ការសម្ដែងរបស់អ្នកស្រីធ្វើឲ្យទស្សនិកជនស្រក់ទឹកភ្នែក តាមរយៈសាច់រឿងរំជួលចិត្តពីបញ្ហាគ្រួសារ និងទំនាក់ទំនងរវាងសមាជិកគ្រួសារពីជំនាន់មួយទៅជំនាន់មួយ។
Michelle Yeoh បានបង្កើតប្រវត្តិសាស្ត្រជាផ្លូវការនៅពេលអ្នកស្រីឈ្នះពានរង្វាន់អូស្ការ ដោយបានផ្តួលគូប្រជែងរួមមានតារាសម្ដែង Cate Blanchett (ពីភាពយន្ត Tar ), Ana de Armas (ពីភាពយន្ត Blonde ), Andrea Riseborough (ពីភាពយន្ត To Leslie ) និង Michelle Williams (ពីភាពយន្ត The Fabelmans ) ។
ឡើងទទួលពានរង្វាន់ Michelle Yeoh បានរៀបរាប់ទាំងទឹកភ្នែកថា៖ “អរគុណអ្នករាល់គ្នា អរគុណអ្នកតាមដានខ្ញុំ រង្វាន់នេះគឺជានិមិត្តរូបនៃក្ដីសង្ឃឹម ជាភស្តុតាងបញ្ជាក់ថាសុបិនអាចក្លាយជាការពិត ដូច្នេះកុំឱ្យអ្នកណាមកនិយាយថា វាហួសពេលហើយសម្រាប់យើង”។
សូមផ្ញើពានរង្វាន់នេះដល់ម្តាយរបស់ខ្ញុំ និងម្តាយទាំងអស់ក្នុងពិភពលោក។ បើគ្មានម្តាយក៏គ្មានអ្នកផ្ដល់កំណើតវីរបុរសដែរ។ ម្ដាយខ្ញុំអាយុ ៨៤ ឆ្នាំហើយ ខ្ញុំនឹងយកពាននេះទៅប្រទេសម៉ាឡេស៊ីវិញដើម្បីអបអរជាមួយសាច់ញាតិរបស់ខ្ញុំ”។
ជ័យលាភីនេះធ្វើឱ្យអ្នកស្រីក្លាយជាស្ត្រីដើមកំណើតអាស៊ីដំបូងគេ និងជាសិល្បករដើមកំណើតម៉ាឡេស៊ីដំបូងគេដែលឈ្នះពានរង្វាន់តួឯកស្រីឆ្នើមរបស់ Oscars។ ទោះបីអ្នកស្រីគឺជាសិល្បករដើមកំណើតអាស៊ីទី៥ដែលបានឈ្នះពានរង្វាន់អូស្ការក្នុងផ្នែកសម្ដែង ប៉ុន្តែអ្នកស្រីជាសិល្បករអាស៊ីទីមួយដែលឈ្នះពានតួឯក។
ជីវិតស្នេហាអភ័ព្វ មុនជួបគូស្នេហ៍មហាសេដ្ឋី
វិថីអាជីពភ្លឺស្វាងត្រចះត្រចង់ តែវិថីស្នេហារបស់ Michelle Yeoh បែរជួបឧបសគ្គជាច្រើន។ ថ្វីត្បិតតែធ្លាប់ឆ្លងកាត់រឿងស្នេហាជាច្រើនក៏ដោយ ប៉ុន្តែរហូតមកដល់ពេលនេះអ្នកជំនួញហុងកុង Dickson Poon គឺជាបុរសតែម្នាក់គត់ដែលធ្លាប់បានរៀបអាពាហ៍ពិពាហ៍ជាមួយ Michelle Yeoh ។ អ្នកទាំងពីរបានរៀបការនៅឆ្នាំ១៩៨៨ ពេលដែល Michelle Yeoh មានអាយុ២៥ឆ្នាំ។ ប៉ុន្តែដោយសារមិនអាចស្វែងរកតុល្យភាពរវាងអាពាហ៍ពិពាហ៍ និងការងារបាន ទើបពួកគេបានបែកបាក់គ្នាបន្ទាប់ពីរស់នៅជាមួយគ្នារយៈពេល ៣ ឆ្នាំ។
ឆ្លងផុតពីចំណងអាពាហ៍ពិពាហ៍ Michelle Yeoh មានអារម្មណ៍ដូចជាបានរួចផុតពីបន្ទុកដ៏ធំ។ បន្ទាប់ពីនោះមក អ្នកស្រីបន្តលះបង់ពេលវេលាជាច្រើនដើម្បីអាជីពរបស់ខ្លួន។ កំលុងពេលនេះ អ្នកស្រីក៏មានទំនាក់ទំនងស្នេហាខ្លះដែរ ប៉ុន្តែមិនសូវបានយូរអង្វែងនោះទេ។
ក្នុងឆ្នាំ ១៩៩៩ Michelle Yeoh បានប្រកាសភ្ជាប់ពាក្យជាមួយ Alan Heldman ជាគ្រូពេទ្យឯកទេសជំងឺបេះដូង ប៉ុន្តែអ្នកទាំងពីរបានបែកគ្នាមួយឆ្នាំក្រោយមក។
បន្ទាប់ពីបរាជ័យលើវិថីស្នេហាជាច្រើនលើក ទីបំផុតអ្នកស្រីបានរកឃើញជីវិតស្នេហាដ៏មានសុភមង្គលជាមួយមហាសេដ្ឋីបារាំង Jean Todt ដែលមានអាយុបងអ្នកស្រី ១៦ឆ្នាំ។ គូស្នេហ៍នេះបានភ្ជាប់ពាក្យនៅឆ្នាំ ២០០៦ និងនៅតែបន្តទំនាក់ទំនងរហូតដល់បច្ចុប្បន្ន។ រឿងតែមួយគត់ដែលធ្វើឱ្យអ្នកស្រីសោកសៅ និងឈឺចាប់នោះគឺ អ្នកស្រីមិនអាចមានកូនបានឡើយ សូម្បីតែក្រោយពេលវះកាត់ ក៏ដោយ។
បច្ចុប្បន្ន Michelle Yeoh មានអារម្មណ៍ពេញចិត្តនឹងជីវិតគូរបស់ខ្លួន និងលះបង់ពេលវេលាភាគច្រើនក្នុងវិស័យសិល្បៈ ៕
Account
Security
Favourite Content