ភរិយារបស់តារាចម្រៀង និងសម្ដែងតៃវ៉ាន់ Ken Chu បានឱ្យដឹងថា លោកមានអារម្មណ៍ខូចចិត្តយ៉ាងខ្លាំងបន្ទាប់ពីខំស្រកទម្ងន់ ១៥ គីឡូ ប៉ុន្តែទីបំផុតក៏ត្រូវបានដកចេញពីក្រុម។

ព័ត៌មានជុំវិញក្រុមចម្រៀងបុរសដ៏ល្បីល្បាញ F4 បានផ្ទុះឡើងវិញបន្ទាប់ពីគម្រោងជួបជុំគ្នាឡើងវិញរបស់ពួកគេដែលអ្នកគាំទ្រទន្ទឹងរង់ចាំយ៉ាងខ្លាំង គឺមានតែសមាជិក Jerry Yan, Vanness Wu និង Vic Chou ក្នុងនាមជា F3 ខណៈដែល Ken Chu បានអវត្តមានពីសកម្មភាពទាំងអស់ រួមទាំងការប្រគំតន្ត្រី បទចម្រៀងថ្មី និងវីដេអូចម្រៀង។
ជាក់ស្ដែងកាលពីថ្ងៃទី៥ ខែធ្នូ សមាជិកទាំង ៣ បានចេញបទចម្រៀងថ្មី “Forever Forever” ដោយមានការសហការពីតារាចម្រៀងល្បីពីររូបទៀតគឺ Jay Chou និង Ashin សមាជិកក្រុម Mayday។ ប្រការនេះបានបង្កើតការសង្ស័យយ៉ាងខ្លាំងអំពីថាតើលោកពិតជាត្រូវបានបណ្តេញចេញពីក្រុមឬអត់។


ពាក់ព័ន្ធករណីនេះ Han Wenwen ភរិយារបស់ Ken Chu បានបង្ហាញនៅក្នុងការផ្សាយផ្ទាល់មួយថា Ken បានតាំងចិត្តយ៉ាងខ្លាំងក្នុងការជួបជុំជាមួយសមាជិក F4 រហូតសុខចិត្តសម្រកទម្ងន់ជាង ១៥ គីឡូក្រាមក្នុងរយៈពេលជាងមួយខែដើម្បីទទួលបានរូបភាពនៃការជួបជុំរបស់ពួកគេចេញទៅល្អបំផុត។ ទោះជាយ៉ាងណា លោកបែរប្រឈមនឹងការប្រឆាំង ហើយទីបំផុតក៏ត្រូវបានដកចេញពីគម្រោងទាំងអស់។
នាងបានបង្ហាញដោយសំឡេងឈឺចាប់ថា “លោកបានរង់ចាំតាំងពីខែកក្កដា ដោយស្រកទម្ងន់រហូតដល់សុខភាពកាន់តែយ៉ាប់យ៉ឺន ប៉ុន្តែលោកត្រូវបានគេរិះគន់ និងយល់ច្រឡំ”។
ការដែល Ken ត្រូវបានដកចេញពីគម្រោង F4 ត្រូវបានគេសង្ស័យថាពាក់ព័ន្ធទៅនឹងទម្លាប់ “មាត់រអិល” របស់លោកក្នុងកំលុងពេល Live វីដេអូរយៈពេលប៉ុន្មានខែកន្លងមកនេះ។ មានម្ដងនោះ លោកបានបង្ហាញព័ត៌មានសម្ងាត់អំពីការជួបជុំគ្នារបស់ក្រុម ដោយអះអាងថាលោកមិនជិតស្និទ្ធនឹងសមាជិកផ្សេងទៀត ហើយនិយាយត្រង់ៗថា លោកមិនចូលចិត្តបទចម្រៀងចាស់ៗរបស់ F4 ទេ។ លោកក៏បានចែករំលែករឿងរ៉ាវនៅពីក្រោយឆាករបស់ក្រុមការងារដែលគួរតែត្រូវរក្សាការសម្ងាត់ផងដែរ។ ការនិយាយដោយត្រង់ៗនេះបានធ្វើឱ្យអ្នកគាំទ្រមួយចំនួនខឹងសម្បារ ហើយត្រូវបានគេមើលឃើញថាជាហេតុផលមួយដែលលោកត្រូវបាន “ដកចេញ” ពីគម្រោងថ្មីៗ។
Ken Chu បានបញ្ជាក់ថាលោកនឹងមិនចូលរួមក្នុងការប្រគំតន្ត្រីជួបជុំគ្នារបស់ F4 សម្រាប់ឆ្នាំ ២០២៦ទេ ដោយបានពន្យល់ថាលោកមិនមានកិច្ចសន្យាជាមួយអ្នករៀបចំព្រឹត្តិការណ៍គឺ B’in Music ហើយក៏ទើបតែដឹងថាគេបានដកលោកចេញតាមរយៈព័ត៌មានផ្សេងៗប៉ុណ្ណោះ។
ទោះបីជាយ៉ាងនេះក្តី Ken បានសម្តែងការគាំទ្រចំពោះអតីតសមាជិកក្រុម និងបាននិយាយថាលោកទន្ទឹងរង់ចាំការសម្តែងរបស់ពួកគេ ដោយសង្ឃឹមថាការប្រគំតន្ត្រីនឹងដំណើរការទៅដោយរលូន ៕



























Account
Security
Favourite Content