Jimin Exhibition “The Truth Untold: Unspoken Truth” កម្មវិធីតាំងពិព័រណ៍បង្ហាញស្នាដៃទោលរបស់ Jimin បន្តជាប់ឈ្មោះជាកម្មវិធីដែលលក់សំបុត្រដាច់បំផុតនៅក្នុងទីក្រុងញូវយ៉ក សហរដ្ឋអាមេរិក។

ជាក់ស្ដែង កម្មវិធីដែលគ្រោងនឹងធ្វើឡើងចន្លោះថ្ងៃទី៣១ ខែឧសភា ដល់ថ្ងៃទី២៩ ខែមិថុនា នេះ បានក្លាយជាកម្មវិធីដែលទទួលបានការកក់លំដាប់លេខ ១ នៅលើកម្មវិធី Fever និងបន្តជាប់ឈ្មោះនៅក្នុងតំណែងដដែលនេះរហូតដល់ទៅ ៤ថ្ងៃជាប់គ្នា ពោលគឺចាប់ពីថ្ងៃទី១ រហូតដល់ថ្ងៃទី៤ ខែឧសភានេះ។
ទន្ទឹមគ្នាដែរ SKPopCulture ក៏បានរាយការណ៍ពីភាពជោគជ័យនេះដូចគ្នា ដោយបណ្ដាញផ្សព្វផ្សាយបានហៅ Jimin ថា The King of Jimerica ដែលជាឈ្មោះហៅក្រៅរបស់លោក ដាក់ដោយអ្នកគាំទ្រក្នុងសហរដ្ឋអាមេរិក តាមការបូកបញ្ជូលឈ្មោះតារាប្រុស Jimin និង America រួមគ្នា។

Jimin Exhibition “The Truth Untold: Unspoken Truth” ជាការតាំងពិព័រណ៍ដែលអ្នកគាំទ្រនឹងអាចស្វែងយល់ពីដំណើរអាជីពទោលរបស់ Jimin លើសតែពីឈ្មោះជាសមាជិកក្រុម BTS។ ជាមួយនឹងការតាំងបង្ហាញសំបុត្រ សំលៀកបំពាក់ ពានរង្វាន់ និងរបស់របរជាច្រើនទៀត ដែលអ្នកគាំទ្រអាចសិក្សាពីអារម្មណ៍នៅពេលដែលតារាប្រុសវ័យ ២៩ ឆ្នាំ បានខិតខំកសាងស្នាដៃទោលទី១ គឺអាល់ប៊ុម Face និងអាល់ប៊ុមទោលទី២ MUSE។
គួរឱ្យដឹងផងដែរថា Jimin បានបង្កើនប្រជាប្រិយភាពនៅក្នុងប្រទេសមហាអំណាចមួយនេះ ម្ដងហើយម្ដងទៀត។ តួយ៉ាង តារាប្រុសម្ចាស់បទ Like Crazy រូបនេះ បានក្លាយជាតារាកូរ៉េខាងត្បូងទោលដំបូងបង្អស់ដែលឈរឈ្មោះលើកំពូលតារាង Billboard Hot 100 តាមរយៈស្នាដៃបទមួយនេះ។ បន្ថែមពីនេះទៀត បទ Who របស់លោកក៏បានជាប់ឈ្មោះនៅលើតារាង Billboard តែមួយនេះ រហូតដល់ទៅ ៣៣សប្ដាហ៍ជាប់គ្នា។



លើសពីនេះទៀត Jimin ក៏បានឈ្នះពានរង្វាន់ K-Pop Song of the Year សម្រាប់បទ Who នៅឯកម្មវិធីប្រគល់ពានរង្វាន់ iHeartRadio Music Awards ឆ្នាំ ២០២៥ កាលពីខែមីនាកន្លងទៅ។ បើទោះបីជាលោកត្រូវនៅបំពេញការងារក្នុងជួរទាហានរហូតដល់ថ្ងៃទី១១ ខែមិថុនាក្ដី តែ Jimin ក៏ត្រូវបានកម្មវិធី American Music Awards តែងតាំងឱ្យក្លាយជាបេក្ខភាពដណ្ដើមពានរង្វាន់ Favorite K-Pop Artist នៅថ្ងៃទី២៦ ខែឧសភាខាងមុខនេះដែរ៕























Account
Security
Favourite Content