ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
បច្ចុប្បន្នតារាសម្ដែងជើងចាស់លោក Jackie Chan ឬ ឈិន ឡុង មានវ័យ ៦៩ ឆ្នាំទៅហើយ ខណៈវ័យក៏ដើរកាន់ទៅមុខដែលធ្វើឱ្យរូបលោកលើកឡើងថា តាមមិនទាន់ក្មេងជំនាន់ក្រោយ។
ថ្មីៗ នេះ ភាពយន្ដកុនរបស់លោកមានចំណងជើង “Ride On” ដែលបានចាក់បញ្ចាំងក្នុងរោងភាពយន្ដពិតជាទទួលបានការគាំទ្រយ៉ាងច្រើន។ ស្របពេលអត្ថន័យរឿងពិតជាចាក់ដោតដល់អ្នកដែលស្រឡាញ់សត្វរហូតដល់អ្នកទស្សនាហើយសម្រក់ទឹកភ្នែកស្ទើរគ្រប់ៗគ្នា។
ក្នុងបទសម្ភាសន៍សម្រាប់រឿង “Ride On” លោក ឈិន ឡុង បានលើកឡើងថា៖ បច្ចុប្បន្ន លោកពិតជាពិបាកក្នុងការទំនាក់ទំនងជាមួយក្មេងៗ ជំនាន់ក្រោយខ្លាំង។ សូម្បីតែបច្ចេកទេសក្នុងការថតកុនក៏ហាក់មានការរីកចម្រើនច្រើនរហូតលោកភ្ញាក់ព្រើតតែម្ដង។ កំឡុងពេលថតរឿង ឬថតកម្មវិធីនានាមានកាម៉េរាមិនតិចជាង ៤០ ឡើយដែលបើកថតផ្ដិតយកសកម្មភាពផ្សេងៗ វាពិតជាខុសកាលពីមុនឆ្ងាយ។ ភាពប្រែប្រួលធ្វើឱ្យលោកដេញតាមក្មេងៗ ជំនាន់ក្រោយលែងទាន់ និងមិនយល់ពីភាសារបស់ពួកគេឡើយ។ គិតៗ ទៅ លោក និងតួអង្គដែលត្រូវសម្ដែងក្នុងរឿង “Ride On” គឺពិតជាដូចគ្នា ហាក់ដាច់ឆ្ងាយចេញពីសង្គម និងមិនយល់ពីអ្វីដែលក្មេងជំនាន់ក្រោយកំពុងធ្វើ។
លោក ឈិន ឡុង បានបន្ដថា៖ លោកក៏ជាមនុស្សដែលស្ទើរតែមិនប្រើបណ្ដាញសង្គមនានាផងដែរ សូម្បីតែ Wechat ក៏លោកគ្មានដែរ។ សម្រាប់ទស្សនៈផ្ទាល់ខ្លួន លោកគិតថា ក្មេងជំនាន់ក្រោយពិតជាចំណាយពេលច្រើនពេកហើយផ្ដោតលើទូរសព្ទ ឬបច្ចេកវិទ្យាដែលធ្វើឱ្យយើងមើលរំលងរឿងស្រស់ស្អាតជាច្រើន។ ចំពោះលោកវិញ លោកនឹងចំណាយពេលទស្សនារឿង ស្ដាប់ចម្រៀង រៀនភាសាចិនបន្ថែម អានសៀវភៅ និងបន្ដខិតខំប្រឹងប្រែងហាត់ក្បាច់គុនជាដើម។
គួររំឮកថា លោក ឈិន ឡុង ជាតារាសម្ដែងម្នាក់ដែលស្រឡាញ់ក្បាច់គុនចិនខ្លាំង និងតែងព្យាយាមបង្ហាញក្បាច់គុនចិនដល់ពិភពលោក។ លោកធ្លាប់សម្ដែងក្ដីបារម្ភក្បាច់គុនចិននឹងលែងមានអ្នកប្រើប្រាស់ ឬបាត់ចេញពីពិភពលោក ដោយសារតារាចិនជំនាន់ក្រោយផ្ដោតលើរូបសម្រស់ខ្លាំងពេក ខ្លាចហត់នឿយ មិនហ៊ានថតឈុតគ្រោះថ្នាក់ ឬប្រឹងប្រែងអស់ពីសមត្ថភាពឡើយ៕
Account
Security
Favourite Content