ទស្សនិកជនប្រាកដជាដឹងហើយថាម្ចាស់ពាន The Rapper Cambodia បានទៅលើ យូហៃ ហើយថ្មីៗនេះនៅក្នុងកម្មវិធីសន្ទនាមួយ ជើងឯកថ្មីថ្មោងរូបនោះបាននិយាយពីតារាក្នុងដួងចិត្ត កាលរូបលោកនៅពីក្មេង។

បកទៅកាន់ការសម្ភាសន៍ក្នុងកម្មវិធី The Rapper Cambodia ម្ចាស់បទ “ចេតនា” បាននិយាយថា ការចូលចិត្តច្រៀងរបស់លោកមកពីឪពុកខ្លួន ឧស្សាហ៍នាំទៅច្រៀង និងរៀបចំឈុតខារ៉ាអូខេនៅផ្ទះស្រាប់ រហូតយូរៗទៅធ្វើឲ្យនិស្សិតផ្នែកគ្រប់គ្រងរូបនេះ ចេះចាប់កាន់មេក្រូយកមកច្រៀងដែរ។
យូហៃ បានបន្តថា សម្រាប់ Idol ក្នុងចិត្តកាលពីក្មេងគឺតារាចម្រៀងប្រុស កែវ វាសនា ហើយបទ កែវ វាសនា ដែល យូហៃ ចូលចិត្តច្រៀងបំផុតនោះមានចំណងជើងថា “ទឹកភ្នែកស្ទាវ”។ តែមកដល់ឥឡូវ យូហៃ បានក្លាយជាអ្នកចម្រៀងបែបរ៉េប ខុសពីនិមិត្តរូបក្នុងដួងចិត្តខ្លួនទៅវិញ។

សម្រាប់ការចាប់ផ្ដើមប្រកបអាជីពជាអ្នកសិល្បៈក្នុងអំឡុងពេលកូវីត-១៩ ដោយ Yuuhai បានលើកឡើងថា ពេលនោះគឺលោកមានពេលវេលាច្រើននៅផ្ទះ ដោយសារសាលាត្រូវបិទ ហើយរៀនតាមអនឡាញ តែ YuuHai រៀនមិនចូល។ ម្ចាស់បទ “RAW” បានបញ្ជាក់ការរៀនតាមអនឡាញនោះ គឺរៀនមិនចូលឡើយ ដូចនេះហើយទើបធ្វើជាចម្រៀងរហូតតែម្ដង រហូតទាល់តែប្រឡងធ្លាក់ទី១២ ទើបសួរខ្លួនឯងថា “មានអ្វីសល់ខ្លះ”?
តែក្រោយក្រឡេកទៅមើលដានដែលខ្លួនបានបន្សល់ទុក និងបទពិសោធន៍ទើបដឹងថា តន្ត្រីគឺជាជម្រើសសម្រាប់ យូហៃ។ បកមកការទៅប្រកួតកម្មវិធី The Rapper វិញម្ចាស់ជយលាភីរូបនោះបានបញ្ជាក់ថា ក្រៅពីមានមនុស្សជុំវិញខ្លួនជំរុញហើយនោះ ខ្លួនលោកផ្ទាល់តាំងចិត្តថាទៅប្រឡងផងដែរ ទោះគ្មានអ្នកជំរុញក៏ដោយ។ YuuHai ជឿជាក់រហូតដល់គ្រាន់តែប្រឡងវគ្គទីមួយភ្លាម លោកបានដើរទៅប្រាប់ នរិទ្ធ ដែលជាគ្រូបង្វឹកថា team នរិទ្ធ គឺជាអ្នកឈ្នះ៕

























Account
Security
Favourite Content