សមាជិកមួយរូបរបស់ក្រុមចម្រៀងនារី NewJeans គឺ Hyein នឹងមិនអាចចូលរួមសកម្មភាពផ្សព្វផ្សាយបទថ្មីរបស់ក្រុមឡើយ បន្ទាប់ពីរបួសបាក់ឆ្អឹងប្រអប់ជើង។
នៅថ្ងៃទី៨ ខែឧសភានេះ ក្រុមហ៊ុន ADOR ដែលជាភ្នាក់ងារតំណាងឱ្យ NewJeans បានប្រកាសថា Hyein នឹងមិនចូលរួមក្នុងការផ្សព្វផ្សាយជាផ្លូវការសម្រាប់បទចម្រៀងទោលថ្មីរបស់ពួកគេដែលមានចំណងជើងថា ‘How Sweet’ នោះទេ។ ការសម្រេចចិត្តនេះធ្វើឡើងខណៈពេល Hyein ត្រូវផ្តល់អាទិភាពលើសុខភាព និងការជាសះស្បើយពីរបួសរបស់នាង។
គួររំឭកថា នៅក្នុងខែមេសា Hyein បានរងរបួសបាក់ឆ្អឹងតូចមួយនៅលើប្រអប់ជើងរបស់នាងខណៈពេលកំពុងហ្វឹកហាត់ ធ្វើឱ្យនាងត្រូវសម្រាកទទួលការព្យាបាលរហូតដល់របួសជាសះស្បើយ។ អាស្រ័យលើស្ថានភាពសះស្បើយរបស់ Hyein និងការណែនាំពីគ្រូពេទ្យ នាងអាចនឹងចូលរួមក្នុងសកម្មភាពផ្សេងៗក្រៅពីកម្មវិធីតន្ត្រីទូរទស្សន៍ និងការសម្តែង។

ខាងក្រោមនេះជាសេចក្តីថ្លែងការណ៍ទាំងស្រុងរបស់ ADOR៖
“ជម្រាបសួរ នេះគឺជា ADOR
ពួកយើងសូមថ្លែងអំណរគុណចំពោះអ្នកគាំទ្រដែលតែងតែបង្ហាញការគាំទ្រ និងក្ដីស្រលាញ់ចំពោះ NewJeans។ យើងសូមជូនដំណឹងដល់គ្រប់គ្នាអំពីស្ថានភាពសុខភាពរបស់សមាជិក Hyein និងកាលវិភាគនាពេលអនាគត។
កាលពីខែមេសាកន្លងទៅ Hyein មានការឈឺចាប់ត្រង់ចុងជើងកំលុងពេលហាត់ ដូច្នេះនាងបានទៅមន្ទីរពេទ្យដើម្បីពិនិត្យលម្អិត ហើយក៏រកឃើញថាមានការបាក់ឆ្អឹងតូចមួយ។ ចាប់តាំងពីពេលនោះមក នាងបានផ្តោតលើការព្យាបាល និងបានទទួលការណែនាំពីបុគ្គលិកពេទ្យ ឱ្យកាត់បន្ថយចលនាណាមួយដែលអាចធ្វើឲ្យជើងរបស់នាងមានភាពតានតឹង។
អាស្រ័យហេតុនេះ Hyein បានសម្រេចចិត្តមិនចូលរួមក្នុងការផ្សព្វផ្សាយជាផ្លូវការសម្រាប់បទចម្រៀងទោល ‘How Sweet’ រួមទាំងកម្មវិធីតន្ត្រី/ការសម្តែង និងផ្តោតលើការសម្រាក។ អាស្រ័យលើស្ថានភាពរបស់ Hyein និងការណែនាំពីគ្រូពេទ្យ នាងនឹងចូលរួមកាលវិភាគផ្សេងៗ ក្រៅពីកម្មវិធីសម្ដែងនិងប្រគំតន្ត្រី។
ជាចុងក្រោយ ពួកយើងស្នើសុំការយោគយល់ពីអ្នកគាំទ្រ ហើយពួកយើងនឹងប្រឹងប្រែងឱ្យអស់ពីសមត្ថភាព ដើម្បីធានាថា Hyein អាចត្រលប់មកជួបអ្នកគាំទ្រម្តងទៀតដោយសុខភាពល្អ។
សូមអរគុណ”
គួរបញ្ជាក់ថា NewJeans នឹងធ្វើការវិលត្រលប់ជាមួយបទថ្មី “How Sweet” នៅថ្ងៃទី២៤ ខែឧសភា ខាងមុខ ៕
























Account
Security
Favourite Content