ចាប់តាំងពីចែកផ្លូវគ្នាជាមួយ TVB តារាសម្ដែងប្រុស Vincent Wong កំពុងបង្វែរទិសដៅក្នុងការច្បាមយកប្រជាប្រិយភាពរបស់លោកនៅទឹកដីថ្មីក្នុងប្រទេសចិន។ លោកបានចាប់ផ្ដើមស្នាក់នៅទីនោះក្នុងរយៈពេលយូរ និងមានកាលវិភាគថតកម្មវិធីផ្សេងៗក៏ដូចជាបទចម្រៀងផងដែរ។ ការរស់នៅឆ្ងាយពីក្រុមគ្រួសារតែឯងបែបនេះបានធ្វើឱ្យអ្នកគាំទ្រមានការសង្ស័យយ៉ាងខ្លាំងថាចំណងអាពាហ៍ពិពាហ៍រវាងលោក និងភរិយាគឺតារាស្រី Yoyo Chen បានឈានដល់ផ្លូវបញ្ចប់ដោយសារបញ្ហាខ្វះទំនាក់ទំនង។


កំលុងពេលរស់នៅទីនោះតារាសម្ដែងប្រុស Vincent Wong បានភ្ជាប់ទំនាក់ទំនងរបស់លោកជាមួយនឹងអ្នកគាំទ្រតាមរយៈ RED ដែលជាវេទិកាប្រព័ន្ធបណ្ដាញសង្គមដ៏ពេញនិយមនៅក្នុងប្រទេសចិន។ ថ្មីៗនេះលោកបានចែករំលែកវីដេអូមួយដោយលោកបានឆ្លងកាត់ស្រុកកំណើតរបស់ខ្លួននៅ Xinjiang និងការបើកបរឆ្លងកាត់ផ្លូវបុរាណ Panlong ជាដើម។ ត្រៀមខ្លួនក្នុងការបន្ដដំណើរទៅទីក្រុង Hangzhou ដើម្បីធ្វើការ តារាប្រុសវ័យ ៤១ ឆ្នាំរូបនេះបានស្នើសុំឱ្យអ្នកគាំទ្ររបស់លោកណែនាំកន្លែងកម្សាន្ដ និងហាងណាមួយឱ្យលោកបានស្គាល់។
ក្នុងនោះមានអ្នកលេងអ៊ីនធឺណេតម្នាក់បានសួរចំៗទៅកាន់លោកថា៖ ហេតុអ្វីបានជាមិនសួរ Yoyo Chen ដែលជាភរិយារបស់លោក? តើនាងមិនចំណាយពេលខ្លះទីក្រុង Hangzhou ឬយ៉ាងណា? ដោយមតិលើកឡើងមួយនេះទទួលបានការចុចពេញចិត្តជាង ៦៧០០ ដង។ ជាមួយគ្នានោះក៏មានអ្នកគាំទ្រផ្សេងទៀតបានចូលទៅបញ្ចេញមតិថា៖ ពួកគេមិនមានចិត្តចង់សួរនោះទេ។ អ្នកទាំងពីរបានបែកគ្នាហើយ តើសំណួរនេះចង់មានន័យបែបណា?
ការលើកបែបនេះគឺដោយតែ Yoyo Chen កំពុងតែមានភាពជោគជ័យនៅក្នុងអាជីពរបស់នាងយ៉ាងខ្លាំងជាថ្មីម្ដងទៀត។ ក្រៅពីតំណែងជាតួឯកហើយ នាងក៏ជោគជ័យមិនធម្មតាក្នុងផ្សាយផ្ទាល់លក់ផលិតផលផងដែរ ដោយកាលពីឆ្នាំមុននាងបានធ្វើដំណើរទៅទីក្រុង Hangzhou សម្រាប់ការផ្សាយផ្ទាល់ និងចែករំលែករូបថតដ៏ស្រស់ស្អាតនៃទីក្រុងនេះនៅលើបណ្តាញសង្គមផងដែរ។



ផ្អែកតាមរយៈការបង្ហោះរបស់តារាប្រុស Vincent Wong អ្នកលេងអ៊ីនធឺណេតភាគច្រើនជឿជាក់ថាអាពាហ៍ពិពាហ៍រវាងអ្នកទាំងពីរកាន់តែយ៉ាប់យ៉ឺនដល់ចំណុចមួយដែលពួកគេមិននិយាយរកគ្នាតែម្ដង។ ជាងនេះទៅទៀត ក្រោយការបង្ហោះអ្នកលេងអ៊ីនធឺណេតក៏បាន tagged ឈ្មោះរបស់លោកចូល ថែមទាំងសួរថាហេតុអ្វីបានជាលោកបានឆ្លើយនឹងសំណួររបស់ពួកគេ។ បន្ទាប់មកតារាស្រី Sisley Choi ក៏ត្រូវបានគេអូសចូលនៅក្នុងបញ្ហាមួយនេះ ខណៈនាងធ្លាប់មានពាក្យចចាមអារ៉ាមថាជាជនទីបីក្នុងអាពាហ៍ពិពាហ៍របស់ Vincent និង Yoyo ផងដែរ។
គួរបញ្ជាក់ផងដែរ តារាប្រុស Vincent Wong និងតារាស្រី Yoyo Chen បានរៀបការនៅក្នុងឆ្នាំ ២០១១ ដោយទទួលបានកូនស្រីម្នាក់ជាចំណងដៃ។ ប៉ុន្តែមិនប៉ុន្មានឆ្នាំអាពាហ៍ពិពាហ៍អ្នកទាំងពីរក៏ចាប់ផ្ដើមលេចឮព័ត៌មានថាមានការរង្គោះរង្គើ ក្រោយ Vincent Wong មានពាក្យចចាមអារ៉ាមរឿងអាស្រូវជាបន្ដបន្ទាប់។ យ៉ាងណាមិញ តារាប្រុសរូបនេះក៏ធ្លាប់ឆ្លើយនឹងបទសម្ភាសកាលពីឆ្នាំមុនដែរថាទំនាក់ទំនងរបស់លោក និងភរិយាគឺមិនមានបញ្ហាអ្វីឡើយ ហើយលោកក៏មិនចាំបាច់បង្ហាញជាសាធារណៈនោះដែរ ៕



























Account
Security
Favourite Content