រាប់ចាប់ពីថ្ងៃដំបូងមកដល់ពេលនេះ គឺរយៈពេល ៧ ឆ្នាំទៅហើយដែល Jonghyun សមាជិកក្រុម SHINee បានចាកចេញពីមនុស្សជាច្រើនស្រឡាញ់ សមាជិកក្រុម និងអ្នកគាំទ្រ។ ប៉ុន្តែតន្រ្ដី និងរាល់សកម្មភាពរបស់លោកនឹងត្រូវបានរក្សាទុកយ៉ាងល្អនៅក្នុងបេះដូងមនុស្សជាច្រើន។

កាលពីថ្ងៃទី១៨ ខែធ្នូ ថ្មីៗនេះផលិតកម្ម SM Entertainment បានបង្ហោះរូបរបស់ Jonghyun នៅលើគណនីផ្លូវការរបស់ SHINee អមជាមួយនឹងសំណេរថា៖ «ពួកយើងនឹងស្រឡាញ់អ្នកជានិច្ច» ដោយមានអ្នកគាំទ្រជាច្រើនចូលរួមបញ្ចេញមតិនឹករឮក និងមានក្ដីស្រឡាញ់សម្រាប់លោកជានិច្ច។ ជាមួយគ្នានេះ សូម្បីតែ Minho សមាជិករួមក្រុមក៏បានចែករំលែករូបលោកនៅលើ story ដោយសរសេរថា “ស្រឡាញ់អ្នកខ្លាំងណាស់” ដោយទំនងលោកក៏មានចិត្តនឹករឭកដល់សមាជិកដែលចាកចេញគ្មានថ្ងៃត្រលប់ម្នាក់នេះខ្លាំងមិនចាញ់គេដែរ។
គួររំឭកដែរថា Jonghyun បានបង្ហាញខ្លួនជាលើកដំបូងជាសមាជិកក្រុម SHINee ក្នុងឆ្នាំ ២០០៨ ជាមួយនឹងបទចម្រៀងល្បីៗជាច្រើនដូចជា Replay, Ring Ding Dong និង Lucifer ជាដើម។ មិនត្រឹមប៉ុណ្ណេះ លោកក៏ត្រូវបានគេស្គាល់តាមរយៈសំឡេងដ៏ពិសេសប្លែករបស់លោក និងជាអ្នកនិពន្ធបទចម្រៀងដោយបានចេញចម្រៀងទោលដូចជា Déjà-Boo និង End of a Day ខណៈលោកក៏បានចូលរួមនិពន្ធបទចម្រៀងដូចជា Gloomy Clock របស់ IU និង Breathe របស់ Lee Hi ផងដែរ។


ជាអកុសលនៅថ្ងៃទី១៨ ខែធ្នូ ឆ្នាំ២០១៧ Jonghyun ត្រូវបានគេប្រទះឃើញស្លាប់នៅក្នុងផ្ទះរបស់លោកក្នុងទីក្រុង Cheongdam-dong ទីក្រុងសេអ៊ូលក្នុងវ័យ ២៧ ឆ្នាំដោយសារជំងឺបាក់ទឹកចិត្ត។ មុនលាចាកលោក Jonghyun ក៏បានបន្សល់ទុកសំបុត្រមួយច្បាប់ដែលបានសរសេរថា៖ គ្រាន់តែប្រាប់ខ្ញុំថាខ្ញុំធ្វើបានល្អ។ គ្រាន់តែប្រាប់ថាខ្ញុំខំប្រឹងធ្វើការ។ សូមកុំបន្ទោសខ្ញុំចំពោះការចាកចេញ ខ្ញុំពិតជាបានធ្វើការយ៉ាងលំបាក។ លាហើយ!

ការចាកចេញរបស់លោកពិតធ្វើឱ្យក្រុមគ្រួសារ សមាជិកក្រុម និងអ្នកគាំទ្រមានការរន្ធត់ចិត្តយ៉ាងខ្លាំងដោយមិននឹកស្មានថាលោករងសម្ពាធផ្លូវចិត្តខ្លាំង និងជ្រើសរើសបញ្ចប់គ្រប់យ៉ាងគ្មានពេលវិលវិញ។ យ៉ាងណាមិញនៅឆ្នាំ ២០១៨ គ្រួសាររបស់លោកក៏បានបង្កើតមូលនិធិ Shiny Foundation-For Always Jonghyun ដោយប្រើសិទ្ធិអ្នកនិពន្ធបទចម្រៀងរបស់លោកដើម្បីផ្តល់អាហារូបករណ៍ និងគាំទ្រសិល្បករវ័យក្មេងដែលកំពុងជួបការលំបាកដោយបន្តនូវចិត្តការអាណិត និងការយកចិត្តទុកដាក់របស់ Jonghyun៕
























Account
Security
Favourite Content