Lil Tay ឬ Claire Hope ជាក្មេងស្រីម្នាក់ដែលត្រូវបានមហាជនចាប់អារម្មណ៍ខ្លាំងក្នុងឆ្នាំ ២០១៨ ដោយសារតែរូបនាងចូលចិត្តថតបង្ហោះពីជីវិតហ៊ឺហា និងបង្ហាញឡានទំនើបតម្លៃខ្ទង់លានជាដើម ដែលកាលនោះនាងមានអាយុទើប ៩ ឆ្នាំ។ ក្រោយមកទើបមហាជនដឹងថា នាងមិនមែនជាកូនស្រីអ្នកអភិជនអ្វីឡើយដោយលុយ ឡានទាំងនោះជារបស់ក្រុមហ៊ុនអចលនទ្រព្យដែលម្ដាយនាងធ្វើការប៉ុណ្ណោះ។
អ្វីដែលធ្វើឱ្យមហាជនភ្ញាក់ផ្អើលនោះ ក្រោយបាត់មុខចេញពីបណ្ដាញសង្គមអស់រយៈពេល ៥ ឆ្នាំគណនី Instagram ផ្លូវការរបស់នាងក៏បានបង្ហោះសារប្រកាសបញ្ជាក់ថា៖ រូបនាងបានទទួលមរណៈភាពហើយក្នុងវ័យ ១៤ ឆ្នាំ។ វាពិតជារឿងសោកស្ដាយ និងពិបាកទទួលយកមួយ។ មិនត្រឹមតែ Lil Tay ទេដែលស្លាប់ សូម្បីតែបងប្រុសរបស់នាងក៏បានទទួលមរណៈភាពដែរ។ បច្ចុប្បន្ន ប៉ូលីសកំពុងតែត្រួតពិនិត្យ និងរកពីមូលហេតុនៃការស្លាប់បាត់បង់ជីវិតរបស់អ្នកទាំងពីរ។
ដំណឹងនេះធ្វើឱ្យអ្នកលេងលើបណ្ដាញសង្គមជាច្រើនហាក់មានការភ្ញាក់ផ្អើលគាំងស្ទើរនិយាយលែងចេញ ស្របពេលដែលពួកគេបានបញ្ចេញមតិជាហូរហែថា បើទោះជាពួកគេមិនចូលចិត្តនូវទង្វើរបស់នាងកាលពីមុនក៏ដោយប៉ុន្ដែពួកគេក៏មិនចង់ឃើញ រូបនាងស្លាប់បាត់បង់ជីវិតទាំងវ័យក្មេង និងគ្មានមូលហេតុបែបនេះដែរ។ ជាមួយគ្នាផងដែរ ពួកគេក៏បានស្នើរសុំឱ្យមានការស៊ើបអង្កេតឱ្យច្បាស់លាស់ ព្រោះវាអាចមានរឿងរ៉ាវផ្សេងៗ ជាច្រើនពីក្រោយស្លាប់របស់នាង។
តែយ៉ាងណាមិញ ក៏មានអ្នកលេងលើបណ្ដាញសង្គមមួយចំនួនមិនជឿថារូបនាងបានស្លាប់បាត់បង់ជីវិតឡើយ ព្រោះដំណឹងនេះហាក់ដូចជាលេងសើចព្រមទាំងគ្មានភាពច្បាស់លាស់។ មែនទែនទៅ គណនី Instagram ផ្លូវការរបស់នាងត្រូវបានមហាជនលើកឡើងថា បានកាន់កាប់ដោយម្ដាយរបស់នាង ដោយអាចជាការបង្ហោះទាមទារយកចំណាប់អារម្មណ៍ប៉ុណ្ណោះ។ បើតាមសម្ដីរបស់ឳពុកបង្កើតរបស់នាងវិញ ក៏បានលើកឡើងថា លោកមិនទាន់អាចនិយាយ ឬបញ្ជាក់ពីការស្លាប់របស់កូនៗ របស់លោកឡើយ៕