ចាប់តាំងពីតារាសម្ដែងប្រុសហុងកុង Bobby Au-Yeung បានរៀបអាពាហ៍ជាមួយភរិយារបស់លោក Fu Kit Han ក្នុងឆ្នាំ ១៩៩៦ រាប់មកដល់ពេលនេះមានរយៈពេល ២៨ ឆ្នាំហើយ ហើយអ្នកទាំងពីរបានអះអាងក្នុងរយៈពេលកន្លងមកថាពួកគេមិនដែលឈ្លោះគ្នាខ្លាំងនោះទេ។ ចំពោះអាថ៍កំបាំងក្នុងការរក្សាចំណងស្នេហ៍របស់អ្នកទាំងពីរគឺការចេះគោរពអធ្យាស្រ័យគ្នា ហើយលោកក៏ធ្លាប់បាននិយាយថាភរិយារបស់លោកមិនដែលដំឡើងសំឡេងដាក់លោកឡើយ។


យ៉ាងណាមិញមកដល់ថ្មីៗនេះតារាសម្ដែងប្រុសហុងកុង Bobby Au-Yeung ត្រូវបានគេចោទថាលោកគឺបុរសដែលរស់នៅសុខស្រួលដោយមានភរិយាជាអ្នកមាន។ នៅក្នុងការផ្ដល់បទសម្ភាសជាមួយសារព័ត៌មានហុងកុង តារាជើងចាស់វ័យ ៦៤ ឆ្នាំរូបនេះបានឱ្យដឹងថាភាគជោគជ័យ និងសមិទ្ធផលមួយផ្នែកធំរបស់លោកគឺបានមកការលើកទឹកចិត្តដោយផ្ទាល់ពីភរិយា។ លោកបានបន្ថែមការផ្លាស់ប្ដូរដ៏ធំដែលភរិយារបស់លោកបានផ្ដល់ឱ្យលោកគឺភាពឧស្សាហ៍ព្យាយាម។ អ្នកស្រី Fu Kit Han តែងតែដាស់រឿនលោកកុំឱ្យខ្ជិល និងត្រូវបង្ហាញទៅមនុស្សគ្រប់គ្នាថាលោកមិនមែនជាមនុស្សដែលរស់នៅពឹងពាក់លើប្រពន្ធនោះទេ។ ជាលទ្ធផលក្នុងរយៈពេលប៉ុន្មានឆ្នាំក្រោយមកនេះ មនុស្សដែលធ្លាប់និយាយមិនល្អទាំងនោះក៏បានស្ងាត់មាត់មិនឮនិយាយអ្វីតទៅទៀតដែរ។

ការលើកឡើងនូវមតិមិនល្អទាំងនេះក៏ដោយសារតែភរិយារបស់តារាប្រុស Bobby Au-Yeung គឺជាចៅស្រីរបស់ស្ដេចល្បែងនៅម៉ាកាវ Fu Laorong ដោយទ្រព្យសម្បត្តិក្នុងគ្រួសាររបស់នាងត្រូវបានប៉ានប្រមាណថាមាន ៨ ពាន់លានដុល្លារហុងកុងប្រហែលជាង ១ ពាន់លានដុល្លារអាមេរិក។ ហេតុនេះទើបមានពាក្យចចាមអារ៉ាមជាច្រើនដែលធ្វើឱ្យតារាសម្ដែង Bobby Au-Yeung មិនសប្បាយចិត្តដោយសារលោកត្រូវបានគេចោទប្រកាន់រាល់ភាពជោគជ័យទាំងអស់គឺមានទាក់ទងនឹងការជួយជ្រោមជ្រែងពីគ្រួសារភរិយារបស់លោកជានិច្ច។


ជាក់ស្ដែងលោកធ្លាប់មានអារម្មណ៍ធុញទ្រាន់នឹងពាក្យសម្ដីទាំងអស់នេះរហូតដល់យូរទៅលោកក៏លែងខ្វល់ខ្វាយតែម្ដងដោយលោកគ្រាន់តែឆ្លើយតបថា៖ នៅពេលអ្នកមានលុយ មនុស្សទាំងនោះនឹងថាអ្នកជាមនុស្សអួត។ ប៉ុន្តែនៅពេលអ្នកមិនមានលុយ ច្បាស់ណាស់គេនឹងនិយាយថាអ្នកជាអ្នកក្រជាមិនខាន។ ដូច្នេះក្នុងវ័យប៉ុណ្ណេះ លោកលែងខ្វល់ពីអ្វីទៀតហើយ។
បកទៅឆ្នាំ ២០១៣ តារាសម្ដែងប្រុស Bobby Au-Yeung បានទទួលរងនូវជំងឺរលាកសួតធ្ងន់ធ្ងរហើយត្រូវបានបញ្ជូនទៅមន្ទីរពេទ្យដើម្បីសង្គ្រោះបន្ទាន់បន្ទាប់ពីលោកបានដួលសន្លប់។ ពេលនោះហើយលោកបាននិយាយថាដោយសារបទពិសោធន៍ជីវិតជិតស្លាប់បានផ្លាស់ប្ដូរទស្សនៈនៃជីវិត និងដឹងថាអ្វីដែលសំខាន់បំផុតគឺការរក្សាតុល្យភាពនៃជីវិតឱ្យបានល្អបំផុត៕























Account
Security
Favourite Content