Ahn JaeHyun ជាតារាសម្ដែងប្រុសលេចធ្លោម្នាក់ក្នុងឆ្នាំ ២០១៦ ដល់ឆ្នាំ ២០១៩ ប៉ុន្ដែប្រជាប្រិយភាពរបស់លោកក៏ត្រូវបានធ្លាក់ចុះ និងត្រូវមហាជនរិះគន់ ដោយសារតែរឿងអាស្រូវលែងលះជាមួយអតីតភរិយាតារាស្រី Goo HyeSun។ ចាប់ពីនោះមក លោកក៏មិនសូវលេចមុខខ្លាំងក្នុងសិល្បៈទៀតឡើយ ជាពិសេសសម្រាប់ការសម្ដែង។



ក្នុងឆ្នាំ ២០២៣ លោកក៏ត្រឡប់មកវិញជាមួយរឿងភាគថ្មី មានចំណងជើងថា “The Real Has Come” បើទោះជារឿងមួយនេះមិនមានភាពល្បីល្បាញខ្លាំង តែការសម្ដែងរបស់លោកត្រូវបានមហាជនជាច្រើនសរសើរ។ ការត្រឡប់មកវិញ លើកនេះចាត់ទុកថា ជាចំណែកមួយដែលអាចធ្វើឲ្យលោកចាប់ផ្ដើមងាកមកផ្ដោតលើការសម្ដែងវិញ។ កាលពីពាក់កណ្ដាលខែ មិថុនា ឆ្នាំ ២០២៤ លោកក៏បានបង្ហាញមុខក្នុងវីដេអូចម្រៀងរបស់តារាប្រុស K.Will និងទទួលបានការចាប់អារម្មណ៍កាន់តែច្រើន។
ថ្មីៗ នេះ លោកបានបង្ហាញខ្លួនក្នុងកម្មវិធីរបស់តារាកំប្លែង Kim JunHyun និងបាននិយាយរំឭកដល់អតីតកាលដែលលោកទើបចាប់ផ្ដើមបង្ហាញខ្លួនក្នុងវិថីសិល្បៈដំបូងៗ។ មកដល់បច្ចុប្បន្ន លោកនៅតែចងចាំរឿងនេះ និងចាត់ទុកជាបទពិសោធន៍ជីវិត។


តារាប្រុស Ahn JaeHyun បានលើកឡើងថា៖ កំលុងពេលថតរឿង “My Love From Another Star” ចន្លោះឆ្នាំ ២០១៣-២០១៤។ កាលនោះលោកទើបតែប្រឡូកចូលសិល្បៈ និងមិនសូវមានបទពិសោធន៍ក្នុងការសម្ដែងទេ។ លោកបានថតខុសជាច្រើនដង ខណៈតារាសម្ដែងដែលត្រូវថតជាមួយលោកក៏ពិបាក ដោយសារលោកថតខុសរហូត។ លោកក៏ត្រូវគេស្ដីបន្ទោសខ្លាំងផងដែរ។ អ្វីដែលភ្ញាក់ផ្អើល គឺតារាស្រីរៀមច្បង Jun JiHyun ក៏បានចេញមុខការពារលោក។ ពេលនោះលោកពិតជាមានអារម្មណ៍រំភើប។


លោកចាំបានថា៖ កាលនោះ តារាស្រី Jun JiHyun បាននិយាយការពារលោក។ នាងបានលើកឡើង លោកជាតារាសម្ដែងថ្មី ដូច្នេះមិនប្លែកទេដែលលោកបង្កើតកំហុសច្រើន។ ទុកពេលឲ្យគេបន្ដិច គេគ្រាន់តែជាក្មេងទើបប្រឡូកចូលសិល្បៈប៉ុណ្ណោះ។
តារាប្រុស Ahn JaeHyun បានបន្ថែមថា ពាក្យសម្ដីទាំងនោះគឺលោកមិនដែលភ្លេចឡើយ និងចងចាំទង្វើល្អទាំងនេះ។ ក្រៅពីតារាស្រី Jun JiHyun តារាប្រុសរៀមច្បង លោក Hong Seok Chun ក៏ជាមនុស្សម្នាក់ដែរដែលធ្វើឲ្យលោកមានអារម្មណ៍កក់ក្ដៅពេលបានជួបដំបូង កំលុងពេលលោកទើបចេញសម្ដែង ៕


























Account
Security
Favourite Content