សារព័ត៌មានថៃ បានទម្លាយពីការចាប់ផ្តើមទំនាក់ទំនងស្នេហារវាង តារាសម្ដែងមេម៉ាយកូនមួយ Aff Thaksaorn និងកំលោះ Nonkul Chanon ដែលអ្នកទាំងពីរត្រៀមចេញរឿងភាគជាមួយគ្នានិយាយពីស្នេហាខុសជំនាន់មានចំណងជើងថា “Find Yourself”។


រឿងនេះនិយាយពីស្នេហារវាងនារីវ័យ ៣៨ ឆ្នាំម្នាក់ដែលបានសន្យាជាមួយមិត្តជិតស្និទ្ធថាថ្ងៃណាមួយពួកគេនឹងរៀបការ ប៉ុន្តែចុងក្រោយមិត្តរបស់នាងបានរៀបការជាមួយអ្នកផ្សេងមុន។ នាងតូចចិត្តជាខ្លាំង ហើយក៏បានបបួលសិស្សប្អូនដែលជាអ្នកហាត់ការនៅកន្លែងធ្វើការខ្លួន និងមានអាយុតិចជាងខ្លួន ១៥ឆ្នាំ ចេញទៅផឹក ហើយក៏ជ្រុលមាត់សុំគេធ្វើជាសង្សារ។

នេះជាសាច់រឿងដែលពួកគេសម្ដែង ប៉ុន្តែអ្វីដែលពិសេសជាងនេះគឺក្នុងជីវិតពិតពួកគេក៏កំពុងតែមើលចិត្តគ្នាដែរ ខណៈដែលអ្នកទាំងពីរមានអាយុខុសគ្នា ១៦ឆ្នាំ ដោយ Nonkul មានវ័យ ២៧ឆ្នាំ ចំណែក Aff ៤៣ឆ្នាំ។ ចូលរួមក្នុងកម្មវិធីមួយកាលពីថ្ងៃទី៩ ខែវិច្ឆិកា Nonkul បានទម្លាយចំពោះមុខអ្នកសារព័ត៌មានថា ខ្លួនបានចាប់ចិត្តលើ Aff តាំងពីថ្ងៃដំបូង ព្រោះឃើញ Aff មើលថែអ្នកជុំវិញខ្លួនបានយ៉ាងល្អ។ មានពេលមួយបន្ទាប់ពីរឿងចាប់ផ្តើមថតមិនបានប៉ុន្មាន រូបគេក៏ឈឺហើយត្រូវសម្រាកនៅមន្ទីរពេទ្យ។ ពេលនោះ Aff បានផ្ញើអាហារឱ្យគេញ៉ាំទាំងកាលនោះពួកគេមិនទាន់ជិតស្និទ្ធនឹងគ្នានោះទេ ដែលធ្វើឱ្យគេកាន់តែពេញចិត្តនឹង Aff ជាខ្លាំង។


បន្ទាប់មក Nonkul បបួល Aff សមសម្ដែងជាមួយគ្នាដោយសាកល្បងធ្វើជាគូស្នេហ៍តាមទូរស័ព្ទ ដោយអ្នកទាំងពីរធ្វើជាដើរតួជាតួអង្គក្នុងរឿង ហើយនិយាយតាមទូរស័ព្ទដូចជាគូស្នេហ៍រយៈពេល ១៥-៣០ នាទីក្នុងមួយថ្ងៃ។ Aff យល់ស្របព្រោះមើលឃើញថាវាជាវិធីសាស្ត្រហាត់សមប្លែក និងថ្មីគួរឱ្យចាប់អារម្មណ៍។
តាមរយៈការហាត់សម និងការថតរឿង ក៏បានធ្វើឱ្យអ្នកទាំងពីរកាន់តែស្និទ្ធស្នាលគ្នា រហូតដល់ Nonkul ចាប់ផ្តើមរង់ចាំ Aff ត្រលប់ទៅផ្ទះជាមួយគ្នា។ Aff ធ្លាប់និយាយថា ទោះបី Nonkul ថតចប់មុនក៏ដោយ ក៏គេតែងតែរង់ចាំនាង ដើម្បីពួកគេបានទៅផ្ទះជាមួយគ្នា។

ក្រោយមកក៏មានព័ត៌មានរឿងស្នេហាក្រៅឆាករវាង Aff-Nonkul លេចឮជាបន្តបន្ទាប់។ កាលពីខែកញ្ញា Aff បានបង្ហើបថាមានអ្នកកំពុងមើលចិត្តគ្នាហើយ ប៉ុន្តែមិនបានបង្ហាញថាជានរណាទេ ទើបតែកាលពីម្សិលមិញ Nonkul ចេញមកនិយាយច្បាស់ៗថាអ្នកទាំងពីរកំពុងទាក់ទងគ្នាពិតមែន។ ពាក់ព័ន្ធនឹងបញ្ហាដែលថាអ្នកទាំងពីរមានវ័យខុសគ្នាច្រើន Nonkul ថា៖ “នេះមិនមែនជារឿងអ្វីគួរឱ្យខ្លាចនោះទេ ព្រោះចុងក្រោយមិនថាវ័យណា ឬភេទណាក៏ដោយ ក៏មិនមែនជារឿងខុសឆ្គងអ្វីដែរឱ្យតែយើងទាំងពីរយល់ចិត្តគ្នា ខ្ញុំគិតថាអូខេហើយ”។ ចំណែក Aff កន្លងមកក៏ធ្លាប់និយាយដែរថា៖ “អ្នកដទៃមើលមកយើងយ៉ាងណាមិនសំខាន់នោះទេ វាជាបញ្ហារបស់គេ យើងបំពេញតែតួនាទីយើង ធ្វើឱ្យខ្លួនយើងមានក្ដីសុខរាល់ថ្ងៃគ្រប់គ្រាន់ហើយ” ៕




























Account
Security
Favourite Content