ថ្មីៗនេះសមាជិកទាំងបួនរូបនៃកំពូលក្រុមចម្រៀងនារីខេប៉ុបគឺ Park Bom, Sandara Park, CL និង Minzy ត្រូវបានអញ្ជើញឱ្យចូលរួមជាភ្ញៀវកិត្តិយសនៅក្នុងកម្មវិធី ‘You Quiz on the Block’ របស់ tvN ដែលចាក់ផ្សាយនៅថ្ងៃទី២៣ ខែតុលា ដោយបានចែករំលែកនូវរឿងរ៉ាវជាច្រើន ជាពិសេសគឺការប្រគំតន្ដ្រីទេសចរណ៍តែម្ដង។


សម្រាប់ការជួបជុំលើកនេះ CL បានឱ្យដឹងថា៖ នៅពេលត្រូវបានរំសាយក្រុមជាផ្លូវការ សមាជិកម្នាក់ៗមិនមានភាពងាយស្រួលក្នុងការជួបគ្នានោះឡើយសូម្បីតែការជួបជុំគ្នាញ៉ាំអាហារដោយសារតែរវល់ជាមួយនឹងកាលវិភាគរៀងៗខ្លួន។ ដូច្នេះហើយពួកគេបានបង្កើតទម្លាប់ញ៉ាំអាហារជុំគ្នានៅថ្ងៃកំណើតរបស់ Minzy ដែលជាសមាជិកកូនពៅនៅដើមឆ្នាំពោលគឺនៅថ្ងៃទី១៨ ខែមករា ជារៀងរាល់ឆ្នាំ និងក្នុងឱកាសគម្រប់ខួបរបស់ក្រុម។ ហេតុនេះហើយនៅក្នុងខួបលើកទី ១៥ ឆ្នាំនេះនាងគិតថាជាពេលវេលាល្អមួយដើម្បីរំលឹកវាជាមួយសមាជិក ៣ នាក់ទៀតដោយដំបូងឡើយនាងគ្រាន់តែចង់ចាប់ផ្ដើមជាមួយនឹងការថតរូបតែប៉ុណ្ណោះ។
ស្របពេលនោះ Minzy បានបន្ថែមគំនិតរបស់នាងទៅលើការប្រគំតន្ដ្រីពិសេសសម្រាប់ខួបលើកទី ១៥ ដោយចង់ផ្ដល់ឱ្យអ្នកគាំទ្រនូវអំណោយពិសេសជាងរាល់ឆ្នាំក៏ដូចជាចង់បង្ហាញមុខចំពោះអ្នកគាំទ្រផងដែរ ដោយវាគឺពេលវេលាដ៏រំជួលចិត្តបំផុត។ ទន្ទឹមនឹងនោះ Sandara Park ក៏បានរំឭកថាអ្នកគាំទ្រជាច្រើនបានគាំទ្រ 2NE1 ចាប់តាំងពីការបង្ហាញខ្លួនជាលើកដំបូងមក ហើយពេលនោះវាហាក់ដូចជាការជួបជុំគ្នាដ៏រំភើបក្រោយពីបែកគ្នាអស់រយៈពេលយ៉ាងយូរ។

នាងបានឃើញមនុស្សគ្រប់គ្នានៅទីនោះរីករាយធ្វើឱ្យនាងមានអារម្មណ៍ខ្លួនដូចជានៅក្នុងក្លឹបមួយដែលមានមនុស្សជិត ៤០០០ នាក់សប្បាយជាមួយគ្នា។ លើសពីនោះ Dara ក៏បានបន្ថែមថាខ្លួនមានអារម្មណ៍កាន់អស្ចារ្យប្រៀបដូចជាកំពុងនៅក្នុងសុបិន។ ជាពិសេសនៅពេលដែលបានឃើញអ្នកគាំទ្ររបស់ខ្លួនបង្ហោះនៅលើបណ្ដាញសង្គមដោយកាលពីឆ្នាំ ១០ ឆ្នាំមុនពួកគេនៅជាសិស្សមិនអាចចូលរួមការប្រគំតន្ដ្រីបានឡើយ ប៉ុន្តែពេលនេះពួកគេបានទិញសំបុត្រដោយប្រាក់របស់ពួកគេផ្ទាល់។




គួររំឭកផងដែរថាក្រុម 2NE1 បានបង្ហាញខ្លួនលើកដំបូងនៅថ្ងៃទី១៧ ខែឧសភា ឆ្នាំ២០០៩ ជាមួយនឹងបទចម្រៀងល្បីបំផុត “Fire”។ ជាបន្ដបន្ទាប់បទចម្រៀងរបស់ពួកគេក៏ទទួលបានប្រជាប្រិយភាពកាន់តែខ្លាំងឡើងរួមមានបទ “Lollipop”, “I Don’t Care”, “Lonely” និង “I Am the Best” ជាដើម។ ប៉ុន្តែគួរឱ្យសោកស្ដាយនៅឆ្នាំ ២០១៦ ក្រុម 2NE1 ត្រូវបានប្រកាសរំសាយក្រុមជាផ្លូវការ។ បើទោះបីជាយ៉ាងនេះក្ដីមិត្តភាពរបស់សមាជិកទាំង ៤ នៅតែល្អ ជាក់ស្ដែងនៅក្នុងឆ្នាំ ២០២២ ពួកគេបានជួបជុំគ្នាម្ដងទៀតនៅលើឆាក Coachella Valley ដែលធ្វើឱ្យផ្ទុះការចាប់អារម្មណ៍យ៉ាងខ្លាំង។
យោងតាមការប្រកាសជាផ្លូវការដោយផលិតករប្រតិបត្តិរបស់ YG Entertainment លោក Yang Hyun Suk ក្រុម 2NE1 នឹងធ្វើការប្រគំតន្ដ្រីទេសចរណ៍សម្រាប់ខួប ១៥ ឆ្នាំនៅទីក្រុងសេអ៊ូល និងបណ្ដាប្រទេសមួយចំនួនទៀតផងដែរ៕























Account
Security
Favourite Content