ឃាតកម្មលើ Abby Choiតារាម៉ូដែលស្រីហុងកុងអាយុ ២៨ ឆ្នាំ ដែលត្រូវបានសម្លាប់ហើយកាត់ជាបំណែកៗ លាក់ទុកក្នុងទូទឹកកក នៅតែជាប្រធានបទក្តៅនៅក្នុងប្រព័ន្ធផ្សព្វផ្សាយចិននាពេលនេះ។ យោងតាមសារព័ត៌មាន Dimsum Daily បានឲ្យដឹងថា អតីតស្វាមីរបស់តារាម៉ូដែលស្រីរូបនេះ ឈ្មោះ Alex Kwong ត្រូវបានចាប់ខ្លួនកាលពីរសៀលថ្ងៃទី២៥ ខែកុម្ភៈ ខណៈកំពុងរៀបចំគេចខ្លួន។



រហូតមកដល់ពេលនេះ សមាជិកគ្រួសារអតីតស្វាមី Abby Choiចំនួន ៤នាក់ត្រូវបានចាប់ខ្លួន។ ក្រៅពី Alex Kwong ពេលនេះ ឪពុកម្តាយ និងបងប្រុសរបស់គេក៏កំពុងស្ថិតក្រោមការស៊ើបអង្កេតដែរ។ ក្នុងអំឡុងពេលសួរចម្លើយ ឪពុករបស់ Alex អាយុ ៦៥ ឆ្នាំ ជាអតីតមន្ត្រីប៉ូលីសត្រូវបានគេកំណត់ថាជាមេក្លោង ដោយបានប្រើបទពិសោធន៍ក្នុងអាជីពជាប៉ូលីសរបស់ខ្លួនរៀបចំផែនការយ៉ាងប្រុងប្រយ័ត្នក្នុងការប្រព្រឹត្តបទឧក្រិដ្ឋ។

ប៉ូលីសបានរកឃើញសាកសព Abby Choi នៅក្នុងផ្ទះជួលរបស់អតីតឪពុកក្មេករបស់នាង ដោយប្រទះឃើញជើងទាំងពីរនៅក្នុងទូទឹកកក និងបំណែកសាច់ខ្លះត្រូវបានចម្អិនក្នុងឆ្នាំងស៊ុប។ ជុំវិញនោះមានកាំបិត កន្ត្រៃ ច្រវាក់ អាវភ្លៀង វ៉ែនតា ស្រោមដៃ និងកាបូបរបស់ Abby Choi… ចំណែកក្បាល ដងខ្លួន និងដៃរបស់ជនរងគ្រោះមិនទាន់រកឃើញនៅឡើយទេ។ ចែករំលែកជាមួយសារព័ត៌មាន SCMP ប្រធានក្រុមឧក្រិដ្ឋកម្មក្នុងតំបន់ Kowloon បានពណ៌នាអំពីឃាតកម្មលើកនេះថាជា “ឃាតកម្មគិតទុកជាមុន”។
គ្រួសារអតីតស្វាមីរបស់ Abby Choi មានគម្រោងសម្លាប់តារាម៉ូដែលរូបនេះជាយូរមកហើយ។ កាលពីដើមខែកុម្ភៈ អតីតឪពុកក្មេករបស់តារាម៉ូដែលរូបនេះបានជួលផ្ទះនៅក្នុងភូមិមួយ ប៉ុន្តែមិនបានរស់នៅទីនោះទេ។ នៅថ្ងៃទី ២១ ខែកុម្ភៈ ឆ្លៀតឱកាសដែល Abby Choi ទៅយកកូនចេញពីរៀន បងប្រុសអតីតប្តីដែលជាអ្នកបើកបរឡាន ក៏វាយនាងឱ្យសន្លប់ ហើយនាំទៅកន្លែងកើតហេតុ។
ជនសង្ស័យបានសារភាពថា ខ្លួនពិតជាបានដឹក Abby Choi ចូលទៅក្នុងផ្ទះមែន។ នៅទីនោះ ភាគីទាំងពីរបានប្រកែកគ្នាប្រហែលមួយម៉ោង។ ពេលនោះជនរងគ្រោះត្រូវបានឃាតកសម្លាប់ដោយប្រើកាំបិត។
ទោះបីជាបានរៀបការជាថ្មីក៏ដោយ Abby Choi នៅតែជាអ្នកផ្តល់ជំនួយផ្នែកសេដ្ឋកិច្ចដល់គ្រួសារអតីតស្វាមី ខណៈដែល Alex Kwong នៅតែគ្មានការងារធ្វើ។ តារាម៉ូដែលស្រីរូបនេះបានជួលបងប្រុសរបស់អតីតស្វាមីធ្វើជាអ្នកបើកបរផ្ទាល់ខ្លួន និងបានទិញផ្ទះល្វែងមួយឱ្យគ្រួសារអតីតស្វាមីស្នាក់នៅ ។ ប៉ុន្តែថ្មីៗនេះ ដោយសារតែ Abby Choiចង់លក់ផ្ទះនោះ ទើបភាគីទាំងសងខាងមានជម្លោះ។
យោងតាមមិត្តជិតស្និទ្ធរបស់ Abby Choi បានឱ្យដឹងថា Alex Kwong គឺជាមនុស្ស “ខ្ជិលច្រអូស” ដែលរស់នៅដោយពឹងផ្អែកលើអតីតភរិយារបស់ខ្លួន។ បុរសម្នាក់នេះព្យាយាមជំរិតទារប្រាក់អតីតភរិយាជារឿយៗ។ Abby Choi ធ្លាប់បានបណ្តាក់ទុន ១៣ម៉ឺនដុល្លារ ឱ្យ Alex Kwong បើកហាងនំ ប៉ុន្តែហាងនេះបានដួលរលំបន្ទាប់ពីបើកបានពីរបីខែ។ ថ្មីៗនេះ Alex Kwong ក៏បានជំរុញឱ្យ Abby Choi ផ្តល់លុយឱ្យខ្លួនវិនិយោគក្នុងជំនួញល្បែងស៊ីសង ប៉ុន្តែត្រូវនាងបដិសេធ។
ទាក់ទងនឹងជម្លោះរឿងផ្ទះរវាង Abby Choi និងអតីតឪពុកក្មេករបស់នាង មិត្តភ័ក្តិម្នាក់នេះបាននិយាយថា Abby Choi លក់ផ្ទះនេះដើម្បីយកលុយសម្រាប់រកស៊ី ដោយមិនមានបំណងបណ្តេញគ្រួសារអតីតប្តីឱ្យទៅតាមផ្លូវនោះទេ។ នាងបានរៀបចំឱ្យគ្រួសារអតីតស្វាមីផ្លាស់ទៅរស់នៅកន្លែងផ្សេង ប៉ុន្តែគ្រួសាររបស់ Alex Kwong មិនព្រម ហើយក៏គ្រោងសម្លាប់អតីតកូនប្រសា ដើម្បីទ្រព្យសម្បត្តិធ្លាក់មកលើចៅៗទាំងពីរ។

Abby Choi បច្ចុប្បន្នជាភរិយារបស់កូនប្រុសស្ថាបនិកភោជនីយដ្ឋាន TamJai Yunnan Mixian គឺ ដែលមានសាខាចំនួន ១៥៦ នៅក្នុងប្រទេសចិន ជប៉ុន អូស្ត្រាលី និងសិង្ហបុរី ហើយនាងផ្ទាល់ក៏មានដើមកំណើតមកពីគ្រួសារអ្នកមានដែរ។ នាងកាន់កាប់អចលនទ្រព្យជាច្រើនរួមទាំងខុនដូនៅអគារ Manhattan Hill នៅ Lai Chi Kok ដែលមានតម្លៃជាង ៥,៧លានដុល្លារ និងធ្លាប់បើកក្រុមហ៊ុនចំនួន ៤ រួមទាំងអាជីវកម្មនៅចិនដីគោក។ តាមការប៉ាន់ស្មានទ្រព្យសម្បត្តិរបស់នាងមានជាង ១២,៧លានដុល្លារ។ នាងតែង ត្រូវបានអញ្ជើញឱ្យចូលរួមក្នុងព្រឹត្តិការណ៍បង្ហាញម៉ូដរបស់ម៉ាកល្បីជារឿយៗ ៕


















































Account
Security
Favourite Content