បន្ទាប់ពីសមាជិក BLACKPINK ផ្សេងៗបានចុះកុងត្រាជាមួយក្រុមហ៊ុនអាមេរិកអស់រៀងៗខ្លួនសម្រាប់ការងារទោល នៅពេលនេះ Jisoo ក៏បានចុះកុងត្រាថ្មីជាមួយក្រុមហ៊ុនចម្រៀងអាមេរិកដែរគឺ Warner Records។

កាលពីថ្ងៃទី ២៨ ខែមករា ក្រុមហ៊ុន Warner Records បានប្រកាសជាផ្លូវការថា Jisoo បានចុះហត្ថលេខាលើកិច្ចព្រមព្រៀងជាមួយខ្លួនហើយសម្រាប់ការងារផ្សព្វផ្សាយចម្រៀងទោលរបស់នាងលើទីផ្សារពិភពលោក។
ចំណែក Jisoo ក៏បានបង្ហាញពីក្តីរំភើប ចំពោះការប្រកាសអំពីកិច្ចសហការនេះតាមរយៈសេចក្ដីថ្លែងការណ៍ផ្ទាល់ខ្លួនមួយ ព្រមទាំងបានអរគុណដល់ BLINKs ដែលជាអ្នកគាំទ្រ BLACKPINK ជុំវិញពិភពលោកសម្រាប់ក្ដីស្រលាញ់និងការគាំទ្ររហូតមក។
សហប្រធាន និងជានាយកប្រតិបត្តិក្រុមហ៊ុន Warner Records លោក Aaron Bay-Schuck បានចែករំលែកថា លោកមិនឆ្ងល់ទេថាហេតុអ្វី Jisoo គឺជាតារាដ៏ល្បីបំផុតមួយក្នុងពិភពលោក ហើយអាជីពទោលរបស់នាងនឹងកាន់តែមានឥទ្ធិពល។ ទាំងថាមពល ក្ដីស្រលាញ់ និងសិល្បៈដែល Jisoo បានរួមបញ្ចូលក្នុងតន្ត្រីរបស់នាងបានធ្វើឱ្យចម្រៀងរបស់នាងកាន់តែអស្ចារ្យមួយកម្រិតទៀត។ លោករួមជាមួយនឹងក្រុមទាំងមូលមានសេចក្តីរំភើបរីករាយក្នុងការចូលរួមជាមួយ JISOO នៅពេលដែលនាងបន្តបង្កើតប្រវត្តិសាស្ត្រ និងលើកទឹកចិត្តមនុស្សរាប់លាននាក់ជុំវិញពិភពលោក។
ទន្ទឹមនោះដែរ Jisoo ក៏បានប្រកាសផងដែរអំពីអាល់ប៊ុមទោលថ្មីរបស់នាងមានចំណងជើងថា “AMORTAGE” ដែលត្រៀមចេញជាផ្លូវការនៅថ្ងៃទី១៤ ខែកុម្ភៈ ជាស្នាដៃចម្រៀងដំបូងរបស់នាងដែលចេញផ្សាយតាមរយៈក្រុមហ៊ុន Warner Records ។
អាល់ប៊ុមថ្មីនេះដែរនឹងជាការវិលត្រលប់មកឆាកតន្ត្រីវិញលើកដំបូងក្នុងរយៈពេលពីរឆ្នាំរបស់ Jisoo បន្ទាប់ពីបានចេញបទទោលដំបូង “Flower” កាលពីខែមីនា ឆ្នាំ២០២៣។ ក្រៅពីត្រៀមបញ្ចេញស្នាដៃចម្រៀង តារាស្រីវ័យ ៣០ឆ្នាំរូបនេះក៏ត្រៀមបង្ហាញខ្លួនក្នុងភាពយន្តភាគ Zombie ថ្មីមួយមានចំណងជើងថា “Newtopia” ដែលនឹងចាប់ផ្ដើមចាក់ផ្សាយនៅថ្ងៃទី៧ ខែកុម្ភៈ លើបណ្ដាញ Streaming កូរ៉េ Coupang Play ៕

























Account
Security
Favourite Content