ដូចដែលយើងទាំងអស់គ្នាបានដឹងហើយថាពិភពហ្វេសិនគឺជាវិថីមួយដែលពោរពេញទៅដោយភាពចម្រុះ មិនថាពណ៌សម្បុរស្បែក រូបរាង ជំនឿ ឬភេទណាៗ ក៏សុទ្ធតែអាចរំលេចនូវភាពស្រស់ស្អាត និងបង្កើតអ្វីដែលថ្មីជានិច្ច។ ហើយថ្ងៃនេះដែរ AMS នឹងនាំប្រិយមិត្តមកស្គាល់នារីមានឥទ្ធិពល ឬ Influencer មួយរូបរបស់ចិនឈ្មោះ “Xiao Yang” ជានារីវ័យក្មេងដែលមានស្ទីលឡូយឆាយ ថែមទាំងជាអ្នកយកព័ត៌មាន ក៏ដូចជាម៉ូដែលដ៏មានទេពកោសល្យ។ ត្រឡប់ទៅអតីតកាលវិញគឺប្រហែល ២៣ឆ្នាំមុន ក្នុងអាយុ៣ឆ្នាំប៉ុណ្ណោះ នាងបានជួបឧបទ្ទវហេតុដែលបណ្ដាលឲ្យបាត់បង់ជើងម្ខាង និងត្រូវពាក់ជើងសិប្បនិម្មិតជាង២០ឆ្នាំ។

ទោះបីជាហេតុការណ៍នោះបានបំផ្លាញសរីរាង្គដ៏សំខាន់បំផុតមួយរបស់រាងកាយក៏ដោយ ប៉ុន្តែ Xiao Yang នៅតែមើលពិភពលោកក្នុងផ្លូវវិជ្ជមានជានិច្ច ហើយបានត្រលប់មកប្រើជីវិតរស់នៅវិញជាមួយនឹងជើងសិប្បនិម្មិតដ៏ពិសេសដែលធ្វើឱ្យនាងមើលទៅកាន់តែលេចធ្លោ។ ឆ្នាំ ២០២១ អាចចាត់ទុកថាជាពេលវេលាមាសសម្រាប់នាងក្នុងការបង្ហាញខ្លួននៅលើបណ្ដាញសង្គម និងប្រព័ន្ធផ្សព្វផ្សាយផ្សេងៗជុំវិញពិភពលោក ធ្វើឱ្យមនុស្សជាច្រើនចាប់អារម្មណ៍។

មកទល់ពេលនេះនាងនៅតែបន្តជា Influencer និងតារាម៉ូដែល ដោយបានចូលរួមក្នុងយុទ្ធនាការបង្ហាញម៉ូដសម្លៀកបំពាក់ជាមួយម៉ាកល្បីៗជាច្រើនដូចជា Prada Beauty, Valentino, Louis Vuitton និងម៉ាកផ្សេងៗជាច្រើនទៀត។ លើសពីនេះនាងក៏បានចូលរួមជាតារាបង្ហាញម៉ូដឱ្យម៉ាកយីហោ ឬគម្រោង Thesis ផ្សេងៗរបស់និស្សិតផ្នែកច្នៃម៉ូដដែលអនុញ្ញាតឱ្យយើងមើលឃើញស្ទីល និងជ្រុងមួយផ្សេងទៀតនៃ Influencer រូបនេះ។
មកដល់ពេលថ្មីៗនេះ Xiao Yang ក៏ត្រលប់មកល្បីម្ដងទៀត បន្ទាប់ពីនាងបានសហការជាមួយ YVMIN ដែលជាម៉ាកគ្រឿងអលង្ការដ៏ល្បីមួយបានរចនាម៉ូដជើងសិប្បនិម្មិតថ្មីឱ្យនាងយ៉ាងលេចធ្លោដោយកែច្នៃត្រង់បរិវេណជង្គង់ឱ្យមានរាងដូចបេះដូង ប្រកបដោយ Accessories ម៉ូដថ្មីៗទាន់សម័យដែលបន្ថែមភាពលេចធ្លោកាន់តែខ្លាំង។

ទោះបីជាភាគីទាំងពីរបានរួមការងារជាមួយគ្នាជាង ២ ឆ្នាំក៏ដោយ ក៏អ្នកលេងអ៊ីនធឺណេតនៅតែយកចិត្តទុកដាក់ចាប់អារម្មណ៍ ហើយតែងតែលើកយករឿងនេះមកនិយាយជានិច្ច ដោយរឿងរ៉ាវរបស់នាងនៅតែឆ្លុះបញ្ចាំងឱ្យយើងឃើញថាពិភពហ្វេសិននៅតែបើកចំហសម្រាប់មនុស្សគ្រប់គ្នាចូលមកដើម្បីជាផ្នែកមួយជួយជំរុញឱ្យឧស្សាហកម្មនេះឆ្ពោះទៅមុខនាពេលអនាគត ៕



























Account
Security
Favourite Content