បច្ចុប្បន្ន វ៉ែនតា AI ជំនាន់ថ្មីៗមានរូបរាងស្ទើរតែមិនខុសពីវ៉ែនតាធម្មតាឡើយ ដោយសារជើងវ៉ែនតាស្តើង និងមានទម្ងន់ស្រាលត្រឹមតែ ៥០ ក្រាមប៉ុណ្ណោះ ដែលប្រសិនបើមើលនឹងភ្នែកទទេគឺស្ទើរតែមើលមិនដឹង រហូតក្លាយជាអាវុធសម្ងាត់សម្រាប់ការលួចមើលក្នុងពេលប្រឡង ដែលមិនទាន់មានវិធានការត្រួតពិនិត្យបានគ្រប់ជ្រុងជ្រោយនៅឡើយ។

ថ្ងៃទី ១ ខែសីហា ឆ្នាំ ២០២៦ ក្រសួងអប់រំនៃប្រទេសកូរ៉េខាងត្បូង បានផ្ញើលិខិតជូនដំណឹងទៅកាន់ការិយាល័យអប់រំភូមិភាគនានា ដោយបង្គាប់ឱ្យបញ្ចូលវ៉ែនតា AI ទៅក្នុងបញ្ជី «របស់ដែលហាមឃាត់» និងបានផ្តាំផ្ញើឱ្យតាមដានយ៉ាងយកចិត្តទុកដាក់ចំពោះកាយវិការមិនប្រក្រតីរបស់អ្នកប្រឡង។

ចលនានេះបានកើតឡើងបន្ទាប់ពីមានការរកឃើញបេក្ខជនប្រឡង ៣ នាក់បានពាក់វ៉ែនតា AI ចូលប្រឡងយកលិខិតអនុញ្ញាតវិស្វករអគ្គិសនី និងវិស្វករប្រព័ន្ធការពារអគ្គិភ័យកាលពីខែឧសភាកន្លងទៅ មុនពេលរកឃើញបេក្ខជន ២ នាក់ផ្សេងទៀតប្រើប្រាស់វ៉ែនតា AI ក្នុងអំឡុងពេលប្រឡង TOEIC ដូចគ្នា។

ទោះបីជាមានការបន្លំដោយប្រើវ៉ែនតាទាំងនេះជាច្រើនលើកច្រើនសាក៏ដោយ ប៉ុន្តែមហាវិទ្យាល័យនានានៅតែមិនទាន់មានវិធានការបង្ការការបន្លំដែលម៉ត់ចត់គ្រប់គ្រាន់ និងមិនទាន់ពេលវេលានៃការអភិវឌ្ឍយ៉ាងរហ័សនៃបច្ចេកវិទ្យាឡើយ សម្រាប់ការប្រឡងវាស់ស្ទង់សមត្ថភាពសិក្សារបស់កូរ៉េ (CSAT) និងការជ្រើសរើសនិស្សិតតាមរយៈការពិចារណាសំណេរក្នុងកំឡុងពេលចុះឈ្មោះជុំដំបូង ដែលនឹងប្រព្រឹត្តទៅនៅក្នុងពាក់កណ្តាលឆ្នាំក្រោយនេះ។

បញ្ហាផ្លូវច្បាប់គឺជាចន្លោះប្រហោងមួយទៀតដែលធ្វើឱ្យការបន្លំនេះមានប្រសិទ្ធភាព នៅពេលដែលការប្រឡងថ្នាក់ជាតិផ្សេងទៀត និងការបន្លំប្រឡងនៅក្នុងមហាវិទ្យាល័យត្រូវបានចាត់ទុកថាគ្មានទោសទណ្ឌខាងព្រហ្មទណ្ឌ ខុសពីការប្រឡង CSAT ដែលបណ្តាលឱ្យមានការរះគន់ចំពោះវិធីសាស្ត្រឆ្លើយតប និងវិធានការរបស់មហាវិទ្យាល័យទាំងនេះ។

នៅពេលបច្ចេកវិទ្យាអភិវឌ្ឍយ៉ាងរហ័ស រហូតដល់មហាវិទ្យាល័យរៀបចំវិធានការទប់ទល់មិនទាន់

មន្ត្រីមកពីសាកលវិទ្យាល័យជាតិសេអ៊ូលបានពន្យល់ថា តាមដែលលោកដឹង គឺមិនទាន់មានការពិភាក្សាណាមួយអំពីការទប់ទល់នឹងការបន្លំប្រឡងដោយប្រើវ៉ែនតាឆ្លាតវៃ (Smart Glasses) នៅក្នុងសាកលវិទ្យាល័យនៅឡើយទេ។

ដូចគ្នានឹងមន្ត្រីមកពីសាកលវិទ្យាល័យកូរ៉េ សាកលវិទ្យាល័យនារី Ewha និងសាកលវិទ្យាល័យ Sungkyunkwan ដែលបានបញ្ជាក់ថា ទោះបីជាពួកគេមិនទាន់មានគោលការណ៍ណែនាំដាច់ដោយឡែកក៏ដោយ ប៉ុន្តែពួកគេកំពុងពិភាក្សាអំពីវិធានការដែលអាចធ្វើទៅបាន។

ការវាយតម្លៃបង្ហាញឱ្យឃើញថា ទោះបីជាមានការកំណត់គោលការណ៍ណែនាំផ្ទៃក្នុងសាកលវិទ្យាល័យហើយក៏ដោយ ប្រសិទ្ធភាពក្នុងការអនុវត្តជាក់ស្តែងនៅតែមានកម្រិតយ៉ាងច្បាស់។

ឧទាហរណ៍ដូចជាករណី មហាវិទ្យាល័យវេជ្ជសាស្ត្រនៃសាកលវិទ្យាល័យឈុងអ៉ាង (Chung-Ang) ដែលបានចេញច្បាប់ហាមឃាត់ការប្រើប្រាស់វ៉ែនតា AI ក្នុងបន្ទប់ប្រឡងកាលពីខែកញ្ញា ឆ្នាំ ២០២៥ ដោយមានគោលការណ៍ពិនិត្យដូចជាការពិនិត្យមើលថាជើងវ៉ែនតាក្រាស់ខុសប្រក្រតីឬទេ ឬការសង្កេតមើលកាយវិការដែលមានការប៉ះ ឬសម្រួលជើងវ៉ែនតាម្តងហើយម្តងទៀត ដោយសារវ៉ែនតា AI កាលនោះមានជើងក្រាស់ជាងក្របប្លាស្ទិកទូទៅ និងអាចបញ្ជាបានដោយកាយវិការដែលមើលឃើញយ៉ាងច្បាស់។

ទោះជាយ៉ាងណាក៏ដោយ ក្នុងរយៈពេលត្រឹមតែ ១ ឆ្នាំប៉ុណ្ណោះបច្ចេកវិទ្យាបានអភិវឌ្ឍយ៉ាងរហ័ស វិធីសាស្ត្រត្រួតពិនិត្យទាំងនោះក៏ចាប់ផ្តើមពិបាកយកមកប្រើប្រាស់។ ដូចជាវ៉ែនតារបស់ Samsung ដែលបានប្រកាសចេញកាលពីថ្ងៃទី ២២ ខែកក្កដាកន្លងទៅនេះ ដែលជាម៉ូឌែលបញ្ជាដោយសំឡេង និងគ្មានអេក្រង់បង្ហាញឡើយ ជើងវ៉ែនតាម៉ូឌែលនេះមានលក្ខណៈស្តើង និងមានទម្ងន់ត្រឹមតែ ៥០ ក្រាមប៉ុណ្ណោះ ធ្វើឱ្យពិបាកក្នុងការបែងចែកភាពខុសគ្នាពីវ៉ែនតាក្របក្រាស់ទូទៅ។

ចាំបាច់ត្រូវមានវិធានការពិសេសដែលស្របទៅនឹងល្បឿននៃការជឿនលឿនផ្នែកបច្ចេកវិទ្យា

លោក Park Nam-gi សាស្ត្រាចារ្យកិត្តិយសនៃដេប៉ាតឺម៉ង់អប់រំសាស្ត្រ នៃសាកលវិទ្យាល័យគរុកោសល្យជាតិក្វាងជូ បានបញ្ចេញមតិថា៖ «ដោយសារការជឿនលឿននៃបច្ចេកវិទ្យាធ្វើឱ្យយើងឈានចូលដល់យុគសម័យដែលវ៉ែនតា AI មើលមិនដឹងខុសពីវ៉ែនតាទូទៅ ចុងក្រោយយើងគ្មានជម្រើសអ្វីក្រៅពីការយកឧបករណ៍ស្កេនពិនិត្យមកប្រើប្រាស់នោះឡើយ» ព្រមទាំងបន្ថែមថា «យើងក៏ត្រូវពិចារណាលើវិធីសាស្ត្រផ្សេងៗទៀតដូចជាការថតវីដេអូក្នុងអំឡុងពេលប្រឡងផងដែរ»។

ក្រៅពីនេះ ក៏មានការព្យាករណ៍ថា នឹងមានវិធីសាស្ត្របន្លំទម្រង់ថ្មីៗកើតឡើងជាបន្តបន្ទាប់ ទៅតាមការអភិវឌ្ឍយ៉ាងរហ័សនៃឧបករណ៍ AI ផ្សេងៗ។

បច្ចុប្បន្ន មានការដាក់លក់ម៉ាស៊ីនគិតលេខដែលមាន Generative AI និងកាមេរ៉ាបង្កប់នៅបរទេសហើយ ខណៈដែលឧបករណ៍ AI ទំហំតូចដូចជា Smart Contact Lens ក៏កំពុងស្ថិតក្នុងដំណើរការអភិវឌ្ឍផងដែរ។

ដោយហេតុនេះ ទើបមានការទាមទារឱ្យមានការកែប្រែវិធីសាស្ត្រប្រឡង និងការវាយតម្លៃទ្រង់ទ្រាយធំ ដើម្បីឱ្យស្របទៅនឹងយុគសម័យដែលផ្លាស់ប្តូរ។

លោក Moon Hyung-nam ប្រធានសមាគម Korea AI Education Association បានសង្កត់ធ្ងន់ថា ត្រូវតែមានការកែប្រែប្រព័ន្ធប្រឡងដើម្បីវាយតម្លៃជំនាញគំនិត សមត្ថភាពក្នុងការដោះស្រាយបញ្ហា និងគំនិតច្នៃប្រឌិត ដោយផ្អែកលើមូលដ្ឋានដែលថា AI អាចយកមកប្រើប្រាស់បាន ដូចគ្នានឹងการបង្រៀននិងរៀនមុខវិជ្ជាគណិតវិទ្យាដែលបានផ្លាស់ប្តូរនៅពេលមានการបង្កើតម៉ាស៊ីនគិតលេខ ដូច្នេះយុគសម័យ AI ក៏ចាំបាច់ត្រូវមាននវានុវត្តន៍លើវិធីសាស្ត្រវាយតម្លៃដូចគ្នា។

លោកបានចង្អុលបង្ហាញថា វិធីសាស្ត្រប្រឡងបែបបុរាណ ដែលផ្តោតលើការជ្រើសរើសចម្លើយត្រឹមត្រូវ និងវាស់ផលជោគជ័យឬបរាជ័យដោយការទន្ទេញចាំនោះ បានឈានដល់កម្រិតកំណត់ហើយនៅពេលប្រឈមមុខនឹងយុគសម័យ AI។

ចំណែកលោក Park Nam-gi បានចង្អុលបង្ហាញថា គោលការណ៍ណែនាំដែលគ្រាន់តែហាមឃាត់ការប្រើប្រាស់ AI ចុងក្រោយនឹងនៅតែបើកឱកាសឱ្យមនុស្សអាចបន្លំប្រឡងបានដដែល។ លើសពីនេះ លោកក៏បានស្នើថា ត្រូវតែមានការផ្លាស់ប្តូរគំរូក្នុងការវាយតម្លៃ ដោយឱ្យសិស្សរៀបចំនិងប្រគល់កិច្ចការដែលបង្ហាញពីជំហាននៃការដោះស្រាយបញ្ហានៅគ្រប់ដំណាក់កាល ព្រមទាំងភ្ជាប់មកជាមួយនូវកំណត់ត្រាស្វែងរកព័ត៌មាន ដើម្បីបើកឱកាសឱ្យពួកគេបានប្រើប្រាស់គំនិតរបស់ខ្លួនឯង ទោះបីជាមានការប្រើប្រាស់ AI អមជាមួយក៏ដោយ ៕