យោងទៅតាមសេចក្តីប្រកាសរបស់ក្រសួងធនធានទឹក និងឧតុនិយម កាលពីថ្ងៃទី២២ ខែមេស ឆ្នាំ២០២៣កន្លងទៅនេះ បានឲ្យដឹងថា ដើមរដូវវស្សា ឬរដូវវស្សាឆ្នាំ ២០២៣ នឹងចូលមកដល់នៅសប្តាហ៍ទី២ នៃខែឧសភា យឺតជាងឆ្នាំ ២០២២។
ក្នុងនោះ បរិមាណទឹកភ្លៀងនឹងមានពីតិចទៅមធ្យម និងរបាយទឹកភ្លៀងធ្លាក់មិនបានរាយបាយល្អ។ កម្រិតទឹកភ្លៀងមានតិចជាងមធ្យមភាគច្រើនឆ្នាំ ប្រមាណពី ២០% ទៅ ៣០%។ នៅដើមរដូវវស្សានេះ នឹងអាចមានកើតឡើងញឹកញ៉ាប់នូវបាតុភូត ផ្គរ រន្ទះ ខ្វល់កន្ទ្រាក់ និងខ្យល់គួច។
ចំណែកឯ ពាក់កណ្តាលរដូវវស្សាវិញ នឹងចាប់ពីខែសីហា ដល់ខែកញ្ញា នឹងអាចមានភ្លៀងធ្លាក់នៅក្នុងបរិមាណពីតិចទៅមធ្យម និងផ្នែកខ្លះជាបង្គួរ ជាមួយនឹងលក្ខណៈភ្លៀងធ្លាក់ភាគច្រើន ជាលក្ខណៈផ្ទាល់ មិនជាប្រព័ន្ធ ក្នុងកម្រិតទឹកភ្លៀងមានតិចជាងមធ្យមភាគច្រើនឆ្នាំ ប្រមាណពី ២០% ទៅ ៣០%។ នាពាក់កណ្តាលរដូវវស្សាក៏នឹងមានបាតុភូតផ្គរ រន្ទះ និងខ្យល់កន្រ្តាក់ ជាបង្គួរផងដែរ។
សម្រាប់ចុងរដូវវស្សាវិញ អាចនឹងបញ្ចប់នៅក្នុងសប្តាហ៍ទី១ នៃខែវិច្ឆិកា ជាមួយនឹងបរិមាណទឹកភ្លៀងក្នុងកម្រិតពីខ្យោយទៅមធ្យម និងកន្លែងខ្លះអាចមិនទទួលបានភ្លៀង។ នៅចុងរដូវវស្សានេះ ក៏អាចមានបាតុភូតផ្គរ រន្ទះ ខ្យល់កន្រ្តាក់ និងខ្យល់គួច ក្នុងកម្រិតជាមធ្យមផងដែរ ពិសេស នៅតំបន់មាត់សមុទ្រ និងតំបន់ជាប់ទន្លេ។
ដោយឡែកក្នុងសេចក្តីប្រកាសដដែលនេះ ក៏បានបញ្ជាក់ពី ការប្រឈមមុខខ្លាំងនឹងកូនរដូវប្រាំង ដែលអាចកើតឡើង និងអូសបន្លាយចាប់ពីដើមខែកក្កដា ដល់ដើមខែសីហា។ ជាមួយគ្នានេះដែរ ស្ថានភាពព្យុះនៅក្នុងឆ្នាំ២០២៣ នឹងមានការកើនឡើងក្នុងរង្វង់ ២៤-២៦ព្យុះនៅក្នុងមហាសមុទ្រប៉ាស៊ីហ្វិក និងអាចមានព្យុះខ្លះកើតឡើងនៅក្នុងមហាសមុទ្រចិនខាងត្បូង៕



























Account
Security
Favourite Content