មេដាយគឺជារបស់ដ៏មានតម្លៃបំផុតសម្រាប់អត្តពលិកម្នាក់ៗ ដោយហេតុថាពួកគេត្រូវតែប្រជែងគ្នា បង្ហូរញើស លើទីលាន ដើម្បីទទួលបានមេដាយនីមួយៗ។ ខណៈការរាប់ថយក្រោយកំពុងបន្ត ពេលវេលានៅសេសសល់ប្រមាណត្រឹមជាង ៧០ថ្ងៃ ប្រជាជនទូទាំងតំបន់អាស៊ីអាគ្នេយ៍កំពុងទន្ទឹងរង់ចាំ ឯអត្តពលិកមមាញឹកហ្វឹកហាត់ត្រៀមប្រយុទ្ធយកមេដាយជូនជាតិ។ សម្រាប់មេដាយសម្រាប់ស៊ីហ្គេម និងអាស៊ានប៉ារ៉ាហ្គេមនៅកម្ពុជា ក្រោយផលិតរួចរាល់អ្នកគាំទ្រកីឡាកម្ពុជាផ្ទុះការវែកញែកជុំវិញអត្ថន័យរបស់មេដាយមួយរយៈចុងក្រោយនេះ។

ស្រង់សម្ដីពីការសាកសួររបស់សារព័ត៌មានកម្ពុជាថ្មី ទៅកាន់អគ្គលេខាធិការគណៈកម្មាធិការជាតិរៀបចំការប្រកួតស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣។ ឯកឧត្តម វ៉ាត់ ចំរើន បានឲ្យដឹងថាមេដាយស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣នេះផលិតនៅប្រទេសសិង្ហបុរីដែលធ្វើពីដែកពិសេសបំផុត
លោកបានពន្យល់ថា «រចនាបថលើមេដាយទាំងសងខាងមានរូបតំណាងជាច្រើន។ ក្នុងនោះ រូបភាពវិមានឯករាជ្យ តំណាងឲ្យឯករាជ្យជាតិ។ រូបភាពវិមានឈ្នះៗតំណាងឲ្យនយោបាយឈ្នះ-ឈ្នះដែលនាំឲ្យប្រទេសជាតិសុខសន្តិភាពបរិបូរណ៍ រុងរឿង និងអភិវឌ្ឍលើគ្រប់វិស័យ។ រូបភាពធំកណ្ដាលគឺពហុកីឡដ្ឋានជាតិមរតកតេជោដែលតំណាងឲ្យសមិទ្ធផលកីឡាថ្មីសន្លាងដ៏ប្រណីតភាព ព្រមទាំងមានរចនាបថពិសេសៗទៀត»។
លោកបន្តថា «នៅផ្នែកម្ខាងទៀតជារូបភាពនៃនិម្មិតសញ្ញាសម្រាប់ព្រឹត្តិការណ៍កីឡាទាំងពីរគឺ មេដាយស៊ីហ្គេម ត្រូវបានដាក់និម្មិតសញ្ញាកីឡាស៊ីហ្គេម។ រូបភាពនិម្មិតសញ្ញាគឺរូបនាង៤ដែលតំណាងឲ្យភាពអស្ចារ្យ រុងរឿងនៃទឹកដីកម្ពុជាដែលសំបូរទៅដោយសម្បត្តិធម្មជាតិ។ នៅពីលើ រូបនិម្មិតសញ្ញាមានរូបកំពូលប្រាសាទអង្គរវត្ត និងទង់ស៊ីហ្គេម។ ចំណែកមេដាយអាស៊ានប៉ារ៉ាហ្គេម ត្រូវបានដាក់និម្មិតសញ្ញាកីឡាអាស៊ានប៉ារ៉ាហ្គេម។ នៅជុំវិញនិម្មិតសញ្ញាកីឡាមានផ្ការំដួលដែលជាផ្កាតំណាងជាតិ៧ទងតំណាងឲ្យថ្ងៃ៧មករា»។
គួរបញ្ជាក់ថា មេដាយដែលកម្ពុជាត្រៀមសម្រាប់ការប្រកួតស៊ីហ្គេម អាស៊ានប៉ារ៉ាហ្គេម ២០២៣ នេះសរុបមានចំនួន ៦០០ មេដាយ រួមមាន មេដាយមាស មេដាយប្រាក់ មេដាយសំរឹទ្ធ និងមេដាយសម្រាប់ទុកជាអនុស្សាវរីយ៍ជូនប្រតិភូ ថ្នាក់ដឹកនាំ ក៏ដូចជាម្ចាស់ជំនួយដែលបានឧបត្ថម្ភគាំទ្រដល់ការប្រកួតនេះផងដែរ។
ចំណែកឯប្រភេទកីឡាដែលត្រូវបានចុះបញ្ជីជាផ្លូវការសម្រាប់ស៊ីហ្គេមឆ្នាំ ២០២៣ គឺមានចំនួន ៣៧ ប្រភេទ និងកីឡាចំនួន ១៣ សម្រាប់ការប្រកួតអាស៊ានប៉ារ៉ាហ្គេមលើកទី ១២ នៅកម្ពុជា៕























Account
Security
Favourite Content