កាលពីថ្ងៃទី១០ ខែកក្កដានេះ កាបូប Hermès Birkin ដំបូងបង្អស់ និងជារបស់ Jane Birkin ផ្ទាល់ បានលក់ចេញក្នុងតម្លៃ ៧ លានអឺរ៉ូ ប្រមាណ ៨.២លានដុល្លារអាមេរិក នៅក្នុងការដេញថ្លៃរបស់ Sotheby’s ឯទីក្រុងប៉ារីស ក្លាយជាកាបូបដែលមានតម្លៃថ្លៃបំផុតនៅក្នុងប្រវត្តិសាស្រ្តការដេញថ្លៃ។

យោងតាមសារព័ត៌មាន BBC បុគ្គលដែលឈ្នះការដេញថ្លៃកាបូបប្រណិតនេះ គឺជាជនជាតិជប៉ុន ដោយតម្លៃដែលម្ចាស់កម្មសិទ្ធិថ្មី ត្រូវចាយរួមបញ្ចូលទាំងថ្លៃសេវាកម្ម និងពន្ធ បានហក់ឡើងដល់ ១០លានដុល្លារអាមេរិក។
សូមរំឭកពីប្រវត្តិនៃកាបូបដែលជានិមិត្តសញ្ញានៃប្រណិតភាពផងដែរថា កាបូប Birkin ពណ៌ខ្មៅមួយនេះ គឺជាស្នាដៃរចនារបស់តារាសម្ដែង និងតារាចម្រៀងជនជាតិអង់គ្លេស Jane Birkin។ ត្រឡប់ទៅកាលពីឆ្នាំ ១៩៨៤ លោក Jean-Louis Dumas ដែលជាអតីតប្រធាន Hermès បានអង្គុយជិត Jane Birkin នៅលើជើងហោះហើរពីប៉ារីសទៅទីក្រុងឡុងដ៍ ដោយគ្រានោះអ្នកម្ដាយកូន ៣ បានរៀបរាប់ថា ខ្លួនពិបាកក្នុងការស្វែងរកកាបូបដែលអាចប្រើប្រាស់តាមតម្រូវការ និងបានរៀបរាប់ពីគុណសម្បត្តិកាបូបដែលខ្លួនត្រូវការ ទៅកាន់អតីតប្រធាន Hermès រូបនេះស្ដាប់។

បន្ទាប់ពីឮបែបនេះ Jean-Louis Dumas បានឱ្យ Jane Birkin គូររូបកាបូបដែលលោកស្រីចង់បានមកឱ្យខ្លួន រួចចាប់ផ្ដើមដេរកាបូបនេះឡើង មុននឹងជូនជាកាដូឱ្យគាត់នៅក្នុងឆ្នាំ ១៩៨៥។ លោកស្រីបានប្រើប្រាស់កាបូបនេះស្ទើរតែរៀងរាល់ថ្ងៃចាប់តាំងពីឆ្នាំ ១៩៨៥ ដល់ឆ្នាំ ១៩៩៥ មុននឹងបរិច្ចាគទៅឱ្យ សមាគមសប្បុរសធម៌ជំងឺអេដស៍បារាំង Solidarité Sida។ ទន្ទឹមគ្នានេះ កម្រៃជើងសារដែលទទួលបានពីកាបូបនេះ Jane Birkin ក៏បានបរិច្ចាគទៅឱ្យមូលនិធិផ្សេងៗដូចគ្នា។
រំលងទៅ ៦ឆ្នាំ Catherine Bernier ដែលជាអ្នកចូលចិត្តសន្សំកាបូប បានទិញកាបូប Birkin នេះ ដោយមិនបានបង្ហាញថា ក្នុងតម្លៃប៉ុន្មាននោះទេ។ កំលុងពេលចូលរួមក្នុងកម្មវិធីដេញថ្លៃក្នុងខែកក្កកដា នេះ លោកស្រីបានរៀបរាប់ប្រាប់ថា ខ្លួនចាត់ទុកកាបូបនេះដូចនឹងកូនប្រុសបង្កើតអ៊ីចឹង ហើយលោកស្រីយល់ឃើញថា វាដល់ពេលដែលលោកស្រីត្រូវនិយាយលា ដើម្បីឱ្យកាបូបនេះបានទៅជួបនឹងជីវិតថ្មីហើយ៕


























Account
Security
Favourite Content