ដ្បិតចំណាយទុនខ្ពស់ និងព្យាយាមស្វែងរកសាច់រឿងថ្មីប្លែកក៏ពិតមែន តែរឿងភាគ When The Stars Gossip ហាក់នៅមិនទាន់ទទួលបានភាពជោគជ័យនៅឡើយ ស្របពេលដែលចំនួនអ្នកទស្សនា Rating ទទួលបានត្រឹម ២ភាគរយប៉ុណ្ណោះ។
When The Stars Gossip ជាភាពយន្តភាគថ្មីមួយដែលទស្សនិកជនមិនតិចរូបទេបានទន្ទឹងរង់ចាំទស្សនា ព្រោះនេះជារឿងថ្មីមួយដែលតារាប្រុសល្បីឈ្មោះ Lee Min-ho បានចូលសម្ដែងក្រោយសម្រាកអស់ពេលជាង ៥ឆ្នាំ ស្របពេលដែលរឿងមានចំណុចទាក់ទងត្រង់ថា ដំណើររឿងបានកើតឡើងនៅក្នុងលំហអាវកាស។
ដោយឡែក ក្រោយពីចេញផ្សាយអស់៤ភាគរួចទៅហើយ ភាពយន្តភាគមួយនេះហាក់មិនទាន់ទទួលបានការពេញនិយមពីទស្សនិកជននៅឡើយទេ បើប្រៀបធៀបចំនួន Rating នឹងរឿងភាគដទៃទៀត។ ជាក់ស្ដែង នៅក្នុងភាគទី១ រឿងថ្មីមួយនេះទទួលបានចំនួន Rating ត្រឹមតែ ៣.៣ភាគរយប៉ុណ្ណោះ រួចឡើងបាន ៣.៩ភាគរយនៅភាគទី២ មុននឹងធ្លាក់មកត្រឹម ២ភាគរយវិញនៅភាគទី៣ និងទី៤។ ខុសពីភាពយន្តភាគផ្សេងទៀតដែលកំពុងចាក់ផ្សាយ ដូចជារឿង Love Scout និង The Tale of Lady Ok ដែលទទួលបានចំនួនអ្នកទស្សនាឈានដល់ ១០ភាគរយទៅហើយ។
តាមរយៈការចុះផ្សាយរបស់ Newsen សារព័ត៌មានមួយនេះបានបានចង្អុលបង្ហាញថា មានមូលហេតុធំៗចំនួន ៣ដែលធ្វើឱ្យរឿង When The Stars Gossip ទទួលបានចំនួនអ្នកទស្សនាតិច ដោយសារតែរឿងនេះជាប្រភេទរឿងដែលមានទស្សនិកជនមានកំណត់, ការរំពឹងទុកខ្ពស់ពេក និងមានឈុតឆាកលើគ្រែដែលចេះតែចាប់ដាក់រហូតមើលទៅគួរឱ្យស្អប់។
ប្រភពដដែលបានពន្យល់ពីដើមហេតុនីមួយៗថា វាជារឿងដែលគួរឱ្យសរសើរដែលក្រុមការងារបានខិតខំរកអ្វីថ្មី ជៀសវាងពីសាច់រឿងដដែលៗ និងផលិតរឿងភាគកូរ៉េទីមួយដែលទាក់ទងនឹងស្ថានីយអាវកាសដែលគ្មានទំនាញផែនដី ខណៈដែលការួមបញ្ចូលទាំងប្រភេទសាច់រឿងទាំងវិទ្យាសាស្ត្រ និងស្នេហាកំប្លុកកំប្លែងនេះ មិនបានទាក់ទាញទស្សនិកជនឡើយ។
បន្ថែមពីនេះ នៅពេលដែលភាពយន្តភាគនេះបានប្រកាសចំណាយប្រាក់រហូតដល់ទៅ ៥០ពាន់លានវ៉ុន ឬប្រមាណ ៣៤ លានដុល្លារអាមេរិកក្នុងកាផលិត ទស្សនិកជនមានការរំពឹងទុកខ្ពស់ខ្លាំងទៅលើរឿងដែលមានទុនខ្ពស់ តែ Newsen បាននិយាយថា ការរំពឹងទុកខ្ពស់ក៏នាំមកនៅការខកចិត្តខ្លាំងដូចគ្នា។ ទាក់ទងនឹងឈុតឆាកលើគ្រែវិញ When The Stars Gossip បានបញ្ចេញឈុតឆាកប្រភេទតែមួយនេះតាំងតែនៅក្នុងភាគទី១ និងម្ដងទៀតនៅភាគទី៤ នាំឱ្យភាពយន្តមិនមានចំណុចទាក់ទាញគ្រប់គ្រាន់ពីទស្សនិកជន។
តាមរយៈប្រភពតែមួយនេះ ការដែលទស្សនិកជនមិនសូវគាំទ្ររឿងភាគថ្មីខាងលើ អាចនឹងធ្វើក្រុមហ៊ុនផលិត CJ ENM មានតម្លៃភាគហ៊ុនធ្លាក់ចុះ ក៏ដូចជាប៉ះពាល់ដល់កេរ្តិ៍ឈ្មោះរបស់ក្រុមហ៊ុនកម្សាន្តមួយនេះផងដែរ៕