តារាចម្រៀងស្រី Beyoncé បានបរិច្ចាគទឹកប្រាក់ផ្ទាល់ខ្លួនចំនួន ២.៥លានដុល្លារអាមេរិកដើម្បីជួយដល់ជនរងគ្រោះ និងទីតាំងសាធារណៈសំខាន់ៗដែលត្រូវការប្រើប្រាស់បន្ទាន់នៅពេលនេះ តាមរយៈមូលនិធិថ្មី LA Fire Relief Fund។
ស្របពេលដែលការបាត់បង់នៅក្នុងហេតុការណ៍ភ្លើងឆេះនៅទីក្រុង Los Angeles នៅតែបន្តកើនឡើង តារាចម្រៀងស្រីវ័យ៤៣ ឆ្នាំរូបនេះបានបង្កើតនូវគម្រោងថ្មីដើម្បីរៃអង្គាសទឹកប្រាក់សប្បុរសបន្ថែមពីទឹកប្រាក់ផ្ទាល់ខ្លួន នៅក្រោមមូលនិធិចាស់ BeyGOOD ដែលលោកស្រីបង្កើតឡើងតាំងតែពីឆ្នាំ២០១៣។
ដំណឹងខាងលើនេះបានបង្ហោះជាសាធារណៈនៅលើគណនី Instagram របស់ BeyGOOD ដោយផ្ទាល់ និងរៀបរាប់ជាសំណេរថា៖ “មូលនិធិនេះនឹងផ្ដល់ជូនគ្រួសារនៅក្នុងតំបន់ Altadena/Pasadena ដែលបានបាត់បង់ផ្ទះ ព្រមគ្នានឹងការផ្ដល់ជូនទៅកាន់ព្រះវិហារ និងមជ្ឈមណ្ឌលសហគមន៍ ដើម្បីដោះស្រាយតម្រូវការបន្ទាន់របស់អ្នកដែលរងផលប៉ះពាល់ដោយភ្លើងឆេះព្រៃ”។
ដោយឡែក គ្រួសាររបស់តាស្រីម្ចាស់បទ Halo ក៏ជាជនរងគ្រោះម្នាក់នៅក្នុងហេតុការណ៍នេះដែរ។ ជាក់ស្ដែងអ្នកម្ដាយរបស់នាង លោកស្រី Tina Knowles បានបាត់បង់បឹងហ្គាឡូមួយខ្នងដែលមានទីតាំងនៅក្នុងតំបន់ Malibu។ ដោយក្ដីសោកស្ដាយ លោកស្រីបានពោលថា៖ “វាជាកន្លែងដែលខ្ញុំចូលចិត្ត ទីសក្ការៈរបស់ខ្ញុំ ជាកន្លែងដ៏រីករាយរបស់ខ្ញុំ ឥឡូវនេះវាបានបាត់ទៅហើយ”។
បន្ថែមពីនេះអ្នកម្ដាយរបស់លោកស្រី Beyoncé ក៏បានថ្លែងអំណរគុណ និងជូនពរដល់អ្នកដែលបានចូលរួមក្នុងកិច្ចការពន្លត់ភ្លើងនៅគ្រានេះដែរថា៖ “សូមព្រះប្រទានពរដល់បុរស និងស្ត្រីក្លាហានទាំងអស់នៅក្នុងនាយកដ្ឋានពន្លត់អគ្គិភ័យ ដែលបានប្រថុយជីវិតក្នុងស្ថានភាពដ៏គ្រោះថ្នាក់មួយនេះ”។
គួររំឭកផងដែរថា រំលងទៅជាង១សប្ដាហ៍ទៅហើយ ពោលគឺតាំងតែពីថ្ងៃទី៧ ខែមករា ដែលភ្លើងចាប់ផ្ដើមឆាបឆេះជាលើកដំបូង មកទល់ពេលនេះក្រុមពន្លត់អគ្គិភ័យនៅមិនអាចគ្រប់គ្រងស្ថានការណ៍បានទាំងស្រុងនៅឡើយ ដែលនាំឱ្យការខូចខាតកាន់តែបន្តកើនឡើងជាបន្តបន្ទាប់៕