ថ្មីៗនេះ មានសេចក្ដីរាយការណ៍ជាបន្តបន្ទាប់ទាក់ទងនឹងសិល្បករល្បីៗជាច្រើនបានផ្តាច់ទំនាក់ទំនងជាមួយអ្នកចាត់ការល្បីឈ្មោះ Scooter Braun និងក្រុមហ៊ុន HYBE America ។

Scooter Braun ដែលជាអ្នកចាត់ការ និងសហគ្រិនផ្នែកតន្ត្រីអាមេរិកដ៏ល្បីល្បាញបានដើរតួនាទីយ៉ាងសំខាន់ក្នុងការកសាងតារាល្បីៗពិភពលោកជាច្រើននាក់។ ដូច្នេះហើយ ដំណឹងដែលតារាល្បីៗជាច្រើនបានចែកផ្លូវជាមួយលោកបានបង្កការភ្ញាក់ផ្អើលពេញវិស័យកម្សាន្ត។
គេហទំព័រ Billboard និង Variety បានចុះផ្សាយថា Ariana Grande និង Demi Lovato បានចែកផ្លូវពី Scooter Braun ប៉ុន្តែជាការចែកផ្លូវដោយសន្តិវិធី។ Ariana Grande បាននៅជាមួយ Scooter Braun និងក្រុមហ៊ុនរបស់លោក SB Projects តាំងពីឆ្នាំ២០១៣ ជាឆ្នាំដែលនាងបានចេញអាល់ប៊ុមដំបូង “Yours Truly”។ ទោះយ៉ាងណាបន្ទាប់ពីចេញអាល់ប៊ុម “Positions” តាំងពីឆ្នាំ២០២០ នាងមិនទាន់បានចេញអាល់ប៊ុមថ្មីទៀតនៅឡើយទេ។
ចំណែក Demi Lovato បានចុះកុងត្រាជាមួយ SB Projects ក្នុងឆ្នាំ២០១៩។ បច្ចុប្បន្ន នាងកំពុងស្វែងរកអ្នកចាត់ការថ្មី ខណៈពេលកំពុងត្រៀមចេញអាល់ប៊ុមថ្មី “Revamped”។ មិនត្រឹមតែតារាស្រីទាំងពីរ ប៉ុន្តែសូម្បី Justin Bieber ដែលត្រូវបាន Scooter Bruan នាំចូលសិល្បៈតាំងពីឆ្នាំ២០០៨ ក៏បានសម្រេចចែកផ្លូវជាមួយអ្នកចាត់ការរូបនេះក្នុងពេលថ្មីៗនេះដែរ។


គួរបញ្ជាក់ថា លោក Scooter Bruan បានក្លាយជានាយកប្រតិបត្តិនៃក្រុមហ៊ុន HYBE America បន្ទាប់ពីក្រុមហ៊ុន Ithaca Holdings ដែលជាក្រុមហ៊ុនមេរបស់ SB Projects ត្រូវក្រុមហ៊ុនកូរ៉េខាងត្បូង HYBE ទិញយកក្នុងខែមេសា ឆ្នាំ ២០២១ ក្នុងតម្លៃប្រមាណ ១ពាន់លានដុល្លារ។

ព័ត៌មាននៃការចាកចេញរបស់សិល្បករកំពូលៗជាមួយ Scooter Braun និង HYBE America បាននាំឱ្យមានការពិភាក្សាព្រោងព្រាតលើបណ្ដាញសង្គមក្នុងចំណោមអ្នកគាំទ្រវិស័យចម្រៀង ដោយមតិផ្សេងៗដូចជា៖
“Scooter Braun នេះហើយជាអ្នកលួចកម្មសិទ្ធិបទចម្រៀងរបស់ Taylor Swift។ គាត់មិនមែនមនុស្សល្អទេ ដូច្នេះហើយទើបមនុស្សជាច្រើនមិនចូលចិត្តគាត់”
“ល្មមហើយ តាំងពី HYBE ទិញ Ithaca Holdings មក តារាៗទាំងនោះអត់បានចេញបទចម្រៀងទេ ដូច្នេះហើយទើបពួកគេនាំគ្នាចាកចេញ”
“តើមានរឿងអី? ក្រុមហ៊ុននេះមានសុទ្ធតែតារាល្បីៗ ហេតុអ្វីអត់មានសកម្មភាពអ្វីសោះ?”
“ពួកគេមិនមែនតារាខេប៉ុបទេ អីចឹងពួកគេចង់ចេញពេលណាក៏បានដែរ”
“HYBE មិនគួរទិញក្រុមហ៊ុនហ្នឹងតាំងពីដំបូងម្ល៉េះ Scooter Braun ដឹងថាតារាទាំងនោះដឹងតែមិនបន្តកុងត្រាហើយ ទើបលក់ក្រុមហ៊ុនឱ្យ HYBE ដោយមិនខ្វល់ខ្វាយពីអ្វីទាំងអស់” ៕




























Account
Security
Favourite Content