មហោស្រពភាពអន្តរជាតិ-កម្ពុជា លើកទី១២ (12th CIFF) បានប្រារព្ធរៀបចំកម្មវិធីសមោសរយ៉ាងអធិកអធម ដោយមានការចាក់បញ្ចាំងរឿង «ទេពហត្ថា» និងដឹកនាំដោយលោក Xavier de Lauzanne កាលពីថ្ងៃទី២៦ ខែមីនា ឆ្នាំ២០២៣ នៅសាលសន្នីសិទចតុម្មុខ ក្រោមព្រះរាជអធិបតីភាពដ៏ខ្ពង់ខ្ពស់បំផុត ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា រួមទាំងសិល្បករ-សិល្បការិនីល្បីៗយ៉ាងច្រើនកុះករ។
មិនខុសពីឆ្នាំមុនៗ CIFF ត្រូវរៀបចំឡើងក្នុងបំណងបំផុសវប្បធម៌ភាពយន្តចម្រុះដល់សាធារណជននៅកម្ពុជា និងចូលរួមលើកស្ទួយគំនិតថ្មីៗក្នុងការផលិតភាពយន្តអន្តរជាតិគ្រប់ប្រភេទ និងបង្ហាញភាពយន្តដែលមានគុណភាព ថតដោយសមិទ្ធិករភាពយន្តជាតិ និងអន្តរជាតិនៅកម្ពុជា និងស្តីអំពី កម្ពុជាផងដែរ។ ជាក់ស្តែង មហោស្រពភាពយន្តអន្តរជាតិកម្ពុជាលើកទី១១ ឆ្នាំ ២០២២ បាននាំមកជូននូវខ្សែភាពយន្តពី ២៦ ប្រទេសខុសៗគ្នា និងមានរឿង ១៤៤ ចំណងជើង ក្នុងនោះរួមមាន ភាពយន្តខ្នាតខ្លី ភាពយន្តខ្នាតវែង ភាពយន្តឯកសារ និងគំនូរជីវចល ជាដើម។
ដោយឡែក សម្រាប់មហោស្រពភាពអន្តរជាតិ-កម្ពុជា លើកទី១២ (12th CIFF) មានមោទកភាពរៀបចំកម្មវិធី «ពន្លក» ចាប់ពីថ្ងៃទី២៩ ខែមីនា រហូតដល់ថ្ងៃទី១ ខែមេសា ដែលជាការបញ្ចាំងភាពយន្តរយៈពេលមួយសប្តាហ៍ ដើម្បីឱ្យទស្សនិកជនភ្លក្សរសជាតិខ្សែភាពយន្តខ្លះៗទម្រាំដល់ការបើកមហោស្រពធំនៅក្នុងខែឧសភា ខាងមុខ។ ក្នុងនោះក៏រួមបញ្ចូលទាំងព្រឹត្តិការណ៍ពិសេសប្រចាំថ្ងៃ ដែលបង្ហាញពីប្រធានបទមួយចំនួនដែលនឹងត្រូវបានបង្កើតឡើងក្នុង CIFF លើកទី១២នាពេលខាងមុខផងដែរ។
ភាពយន្តល្បីៗដូចជា រឿង កំប្លែងអាហ្រ្វិក ភាពយន្តសំខាន់ៗក្នុងប្រវត្តិសាស្រ្តភាពយន្តកម្ពុជា ដូចជារឿង «នាងព្រាយសក់ពស់» ដឹកនាំដោយលោក ហ៊ុយ គឹង សម្តែងដោយលោកស្រី ឌី សាវ៉េត ភាពយន្តផលិតទាក់ទងសម័យឯករាជ្យរបស់ កម្ពុជា រួមមាន ការពិភាក្សារបស់លោក ប៉ាន់ រិទ្ធី ស្តីពីប្រវត្តិសាស្រ្តកម្ពុជា-បារាំង តាមរយៈសៀវភៅ «L’ Empire Du Milieu de Sud / The Empire of Mid – South » របស់លោក Jacques Perrin(ហ្សាក់ ពើរវ៉ុំាង) ភាពយន្តឯកសាររបស់គាត់ « La France est notre Patrie / France is our Mother Country » (ប្រទេសបារាំង ជាមាតុភូមិយើង)។
បន្ថែមពីលើនោះក៏នឹងធ្វើគារវកិច្ចចំពោះរបាំខ្មែរ និងសម្តេចរាបុត្រី ព្រះរៀម នរោត្តម បុប្ជាទេវី ក្នុងរឿង «ទេពហត្ថា» (The Perfect Motion) របស់ Xavier De Lauzanne (ហ្សាវីយ៉េ ដឺឡួហ្សាន) និងភាពយន្ត «ព្រះនាងបុប្ជាទេវី រាជអប្សរាទី ១» (Buppha Devi – The First Royal Apsara) របស់ Christophe Gargiulo (គ្រីស្គូហ្វ ហ្កាគ្យូឡូ)។ កុំភ្លេចចូលរួមកម្មវិធី «ពន្លក» ឱ្យបានច្រើនកុះករ ដែលនឹងសម្ភោធនៅថ្ងៃទី២៩ ខែមីនា ឆ្នាំ២០២៣ នៅវិទ្យាស្ថានបារាំង វេលាម៉ោង៦ល្ងាច!























Account
Security
Favourite Content