សហព័ន្ធតូរ្យតន្ត្រីអន្តរជាតិ IFPI បានប្រកាសកាលពីថ្ងៃទី២៨ ខែកុម្ភៈថា អាល់ប៊ុម “FML” របស់ក្រុមចម្រៀងបុរសកូរ៉េ SEVENTEEN បានជាប់ជាអាល់ប៊ុមលក់ដាច់បំផុតប្រចាំឆ្នាំ២០២៣ សម្រាប់ការលក់នៅទូទាំងពិភពលោក។

ទន្ទឹមនឹងនោះអាល់ប៊ុមចម្រៀងខេប៉ុបចំនួន ៥ បានជាប់ក្នុងចំណោមអាល់ប៊ុមកំពូលទាំង ១០ លក់ដាច់បំផុតកាលពីឆ្នាំ២០២៣ ដែលបង្ហាញឥទ្ធិពលដ៏ខ្លាំងក្លានៃវិស័យចម្រៀងខេប៉ុបនៅទូទាំងសកលលោកនៅមួយរយៈចុងក្រោយនេះ។
ចេញលក់កាលពីខែមេសាឆ្នាំ២០២៣ អាល់ប៊ុម “FML” របស់ក្រុម SEVENTEEN អាចលក់ដាច់សរុប ៦,២ លានច្បាប់ទូទាំងពិភពលោក ហើយនៅប្រទេសកូរ៉េខាងត្បូង និងជប៉ុនអាល់ប៊ុមនេះបានជាប់ជាអាល់ប៊ុមដែលមានការ Pre-order ច្រើនបំផុតក្នុងប្រវត្តិសាស្ត្រ។
តួលេខនេះធ្វើក្រុម SEVENTEEN ដែលមានសមាជិកសរុប ១៣នាក់អាចដណ្តើមយកពានរង្វាន់ IFPI Global Album Award ជាលើកដំបូង ខណៈពិន្ទុសម្រាប់ពានរង្វាន់នេះត្រូវបានគណនាដោយយោងតាមការលក់អាល់ប៊ុមទាំងការដោនឡូតអនឡាញ និងជាទម្រង់ស៊ីឌីនៅជុំវិញពិភពលោក។

អាល់ប៊ុមមួយទៀតពី SEVENTEEN គឺអាល់ប៊ុម “Seventeenth Heaven” ដែលចេញកាលពីខែតុលា ក៏បានជាប់ក្នុងចំណាត់ថ្នាក់ទី៨ ក្នុងបញ្ជីនេះដែរ។
ងាកមកមើលអាល់ប៊ុមផ្សេងៗដែលជាប់ក្នុងចំណោមចំណាត់ថ្នាក់កំពូលទាំង ១០ គឺរួមមានអាល់ប៊ុម “5-Star” របស់ក្រុម Stray Kids ជាប់ចំណាត់ថ្នាក់លេខ២ អាល់ប៊ុម “One Thing At A Time” របស់តារាចម្រៀងអាមេរិក Morgan Wallen បានជាប់លេខ ៣ ខណៈអាល់ប៊ុមចំនួន ២របស់ Taylor Swift រួមមាន “Midnights” និង “1989” បានជាប់ចំណាត់ថ្នាក់លេខ ៤ និងលេខ ៥ រៀងគ្នា ៕
























Account
Security
Favourite Content