ភាពយន្តរឿង Die, My Love ទទួលបានការកោតសរសើរជាពិសេស ក្រោយចាក់បញ្ចាំងនៅក្នុងមហោសស្រពភាពយន្តកានលើកទី ៧៨ កាលពីថ្ងៃទី១៧ ខែឧសភានេះ ជាមួយនឹងការឈរទះដៃពីអ្នកទស្សនាប្រមាណ ៩នាទីជាប់គ្នា។

ការចាក់បញ្ចាំងក្នុងព្រឹត្តិការណ៍មហោស្រពភាពយន្តដ៏ធំក្នុងប្រទេសបារាំងនេះ រាប់ជាការចាក់បញ្ចាំងលើកដំបូង ជាមួយនឹងការចូលរួមពីគូតួឯក Robert Pattinson និង Jennifer Lawrence ជាមួយនិងអ្នកសម្ដែង LaKeith Stanfield, Sissy Spacek រួមទាំងអ្នកដឹកនាំរឿង Lynne Ramsay ផ្ទាល់តែម្ដង។
ទន្ទឹមគ្នានឹងការគាំទ្រដ៏មហាសាលពីអ្នកជំនាញ និងតារាភាពយន្តដែលបានចូលរួមក្នុងកម្មវិធីនេះ ភាពយន្តដែលផ្អែកលើប្រលោមលោករបស់អ្នកនិពន្ធ Ariana Harwicz ចំណងជើងខាងលើ ក៏នឹងឈរឈ្មោះដណ្ដើមពានរង្វាន់ ស្លឹកត្នោតមាស Palme d’Or ដែលជាពានរង្វាន់ធំបំផុតប្រចាំមហោស្រពភាពយន្តកានផងដែរ។

គួរឱ្យដឹងដូចគ្នាថា ភាពយន្ត Die, My Love គឺជាភាពយន្តបែបរន្ធត់ទាក់ទិននឹងចិត្តសាស្រ្ត និយាយពីអ្នកម្ដាយមួយរូបដែលមានជំងឺបាក់ទឹកចិត្តក្រោយសម្រាល ហៅថា Postpartum Depression។ អមគ្នានឹងភាពបរាជ័យនៃជីវិតគូ អាការរបស់អ្នកម្ដាយរូបនេះរឹតតែមិនប្រសើរឡើង រហូតធ្លាក់ខ្លួនធ្ងន់ធ្ងរកើតជាជំងឺវិកលចរិត។
សូមបញ្ជាក់ថា ភាពយន្តហូលីវូដនេះនៅមិនទាន់បានកំណត់ថ្ងៃចាក់បញ្ចាំងជាផ្លូវការនៅឡើយទេ មិនថានៅក្នុងប្រទេសកំណើត ឬនៅក្នុងរោងកុនទូទាំងពិភពលោក៕


























Account
Security
Favourite Content