ក្រុមហ៊ុន Number Three Pictures ដែលជាផលិតកម្មពីក្រោយរឿងភាគកូរ៉េ “High School Return of a Gangster” ត្រូវបានរាយការណ៍ថានៅមិនទាន់ទូទាត់ថ្លៃឈ្នួលឱ្យតារាសម្ដែងជាច្រើននាក់នៅឡើយ បើទោះជារឿងនេះបានបញ្ចាំងចប់និងទទួលបានប្រជាប្រិយភាពខ្លាំងក៏ដោយ។

កាលពីថ្មីៗនេះ សហជីពតារាសម្ដែងកូរ៉េបានឱ្យដឹងថា ក្រុមហ៊ុន Number Three Pictures បានបញ្ចប់ការថតភាពយន្តភាគចំនួនពីរកាលពីឆ្នាំមុនគឺរឿង “High School Return of a Gangster” និងរឿង “Spirit Fingers” ប៉ុន្តែកន្លងផុតរយៈពេលមួយឆ្នាំទៅហើយ ពួកគេនៅតែមិនទាន់បង់ប្រាក់ឈ្នួលដល់អ្នកសម្ដែងរហូតដល់ ១១៩ នាក់។
ក្នុងបំណងទាមទារការទូទាត់ជាបន្ទាន់ អ្នកនាំពាក្យសហជីពបានបន្ថែមថា គិតតែសមាជិកសហជីព ថ្លៃសេវាដែលមិនទាន់បានបង់ឱ្យអ្នកសម្ដែងរឿង “High School Return of a Gangster” មានចំនួនសរុបប្រហែល ៩០ លានវ៉ុន ឬ ប្រហែល ៦៥០០០ ដុល្លារអាមេរិក និងសម្រាប់អ្នកសម្ដែងរឿង “Spirit Fingers” នៅសល់ប្រហែល ២២០ លានវ៉ុន ឬជិត ១៦ ម៉ឺនដុល្លារ។ ប្រសិនបើរួមបញ្ចូលតួសម្តែង និងបុគ្គលិកដែលមិនមែនសមាជិករបស់សហជីព នោះតួលេខប្រាក់ដែលនៅជំពាក់គឺខ្ពស់ជាងនេះ ។
ពាក់ព័ន្ធបញ្ហានេះ តំណាងមកពីក្រុមហ៊ុន Number Three Pictures បានធ្វើការឆ្លើយតបទៅកាន់សហជីពតារាសម្ដែងកូរ៉េកាលពីថ្ងៃទី២ ខែកក្កដា ថាពួកគេនឹងទូទាត់ថ្លៃសម្តែងដែលនៅសេសសល់ទាំងអស់នៅចុងខែសីហា។ ទោះបីជាមានការយឺតយ៉ាវក្នុងការទូទាត់ ប៉ុន្តែសហជីពក៏បានទទួលស្គាល់ពីបញ្ហាប្រឈមរបស់ផលិតកម្មក្នុងការផលិតរឿងក្នុងស្ថានភាពលំបាក និងបានជំរុញពួកគេឱ្យអនុវត្តវិធានការការពារកុំឱ្យបញ្ហាបែបនេះកើតឡើងម្តងទៀតក្នុងការថតនាពេលអនាគត ៕

























Account
Security
Favourite Content