មានការជជែកវែកញែកយ៉ាងក្ដៅគគុកក្នុងចំណោមអ្នកគាំទ្រវិស័យខេប៉ុប ខណៈក្រុមចម្រៀងស្រីកំពុងល្បីពីរក្រុមគឺ aespa និង Illit បានប្រកាស Comeback ក្នុងពេលដំណាលគ្នា។

បន្ទាប់ពីបានចេញអាល់ប៊ុម “Armageddon” កាលពីចុងខែឧសភា នៅពេលនេះក្រុមចម្រៀងកំពុងល្បីរបស់ផលិតកម្ម SM Entertainment, aespa បានប្រកាសធ្វើការត្រលប់មកឆាកតន្ត្រីវិញនៅថ្ងៃទី២១ ខែតុលាខាងមុខ ជាមួយមីនីអាល់ប៊ុមទី៥ មានចំណងជើងថា “Whiplash” ។
ក្នុងការប្រគំតន្ត្រីមួយរបស់ aespa កាលពីពេលថ្មីៗនេះ សមាជិកក្រុម GISELLE បានបង្ហើបថាបទ “Whiplash” ដែលត្រៀមចេញនេះនឹងមានភាពស្រដៀងនឹងបទ “Supernova” ប៉ុន្តែនឹងកាន់តែឡូយជាង ធ្វើឱ្យអ្នកគាំទ្រកាន់តែអន្ទះសាចង់ស្ដាប់ និងចង់ដឹងថាបទនេះអាចជោគជ័យខ្លាំងទៀតដែរឬទេ ខណៈដែលបទ “Supernova” ពីអាល់ប៊ុម “Armageddon” បានក្លាយជាបទដ៏ល្បី និងអាចបំបែកកំណត់ត្រាជាប់លេខ ១ រយៈពេល ១៥ សប្ដាហ៍លើវេទិកាស្ដាប់ចម្រៀងកូរ៉េ Melon។

យ៉ាងណាមិញ អ្វីដែលបង្កការចាប់អារម្មណ៍កាន់តែខ្លាំងនោះគឺមិនត្រឹមតែ aespa នោះទេដែលត្រៀមទម្លាក់អាល់ប៊ុមថ្មីនៅថ្ងៃទី២១ ខែតុលានេះ ប៉ុន្តែក្រុមចម្រៀងថ្មីរបស់ HYBE គឺ Illit ក៏បានប្រកាស Comeback នៅថ្ងៃនេះដូចគ្នា ជាមួយមីនីអាល់ប៊ុមទី២ មានចំណងជើងថា “I’ll Like You”។ អាល់ប៊ុមថ្មីនេះនឹងជាការវិលត្រលប់មកឆាកតន្ត្រីវិញលើកដំបូងរបស់ពួកគេបន្ទាប់ពីបានចេញអាល់ប៊ុមដំបូង “Super Real Me” កាលពីខែមីនា ព្រមជាមួយបទចម្រៀងល្បី “Magnetic” ដែលបានក្លាយជាបទចម្រៀងល្បីបំផុតមួយសម្រាប់ដើមឆ្នាំ២០២៤ ដោយទទួលបានការចូលស្ដាប់លើ Spotify រហូតដល់ ៤០០ លានដង។
ការប្រកាស Comeback តំណាលគ្នារបស់ក្រុមទាំង២ ត្រូវបានចាត់ទុកថាជាការប្រកួតប្រជែងយ៉ាងក្ដៅគគុកមួយទៀតលើសង្វៀនតារាងចម្រៀង ខណៈដែលកន្លងមកមានការបែកធ្លាយការសន្ទនាតាមឆាតរបស់ប្រធានក្រុមហ៊ុន HYBE លោក Bang Si Hyuk ដែលនិយាយថាលោកចង់បង្កើតក្រុមចម្រៀងនារីថ្មី ដើម្បីជាន់ពន្លិចក្រុម aespa របស់ SM Entertainment។ ដូច្នេះមានតែរង់ចាំតាមដានទាំងអស់គ្នា ថាតើលើកនេះក្រុមមួយណានឹងទទួលបានជោគជ័យជាង?

























Account
Security
Favourite Content