ផលិតកម្មចម្រៀងដ៏ធំបំផុតរបស់កូរ៉េខាងត្បូង HYBE ដែលគ្រប់គ្រងក្រុមចម្រៀង BTS ត្រូវបានរាយការណ៍មកថា កំពុងប្រើបច្ចេកវិទ្យាបញ្ញាសិប្បនិមិត្ត AI ដើម្បីបញ្ចូលសំឡេងរបស់តារាចម្រៀងកូរ៉េខាងត្បូង ជាមួយនឹងអ្នកនិយាយភាសាដើម ដើម្បីផលិតចម្រៀងជា ៦ភាសា៖ កូរ៉េ អង់គ្លេស អេស្បាញ ចិន ជប៉ុន និងវៀតណាម។ នេះបើយោងទៅតាម ការចេញផ្សាយរបស់សារព័ត៌មាន Reuters នៅថ្ងៃទី២០ ខែកក្កដា ឆ្នាំ២០២៣នេះ។

បច្ចុប្បន្ននេះ តារាចម្រៀង K-pop មួយចំនួន បានចេញបទចម្រៀងជាភាសាអង់គ្លេស និងជប៉ុន បន្ថែមពីលើភាសាកូរ៉េ ដែលជាភាសាដើមរបស់ពួកគេ ប៉ុន្តែការប្រើប្រាស់បច្ចេកវិទ្យាថ្មី ជាជំនួយសម្រាប់ការផលិតបទចម្រៀងមួយបទ ដែលមាន ៦ភាសាក្នុងពេលដំណាលគ្នា គឺជាលើកដំបូងហើយនៅប្រទេសកូរ៉េខាងត្បូង។
លោក Chung Wooyong ដែលជាប្រធានផ្នែកប្រព័ន្ធផ្សព្វផ្សាយរបស់ ផលិតកម្ម HYBE បាននិយាយនៅក្នុងបទសម្ភាសន៍នៅឯស្ទូឌីយោរបស់ក្រុមហ៊ុនថា៖ «យើងនឹងស្តាប់ការបញ្ចេញមតិនានា របស់អ្នកគាំទ្រជាមុនសិន បន្ទាប់មកសម្រេចថា តើជំហានបន្ទាប់របស់យើងគួរធ្វើយ៉ាងណា»។
តារាចម្រៀង MIDNATT ដែលធ្លាប់រៀនភាសាអង់គ្លេស និងចិនកាលពីអតីតកាល បាននិយាយថា បច្ចេកវិទ្យារបស់ក្រុមហ៊ុន AI Supertone ធ្វើឱ្យ វិសាលភាពស្នាដៃសិល្បៈរបស់លោកកាន់តែទូលំទូលាយ។
ទោះបីជាយ៉ាងណា ក៏ដោយចម្រៀងដែលប្រើ AI នោះ នៅមិនទាន់លេចចេញជារូបរាងឡើយ ខណៈកន្លងទៅ Grammy Awards ធ្លាប់បានព្រមានថាចម្រៀងដែលប្រើ AI ជំនួយច្រើន នឹងមិនអនុញ្ញាតឲ្យចូលរួមដណ្តើមពានរង្វាន់ឡើយ។
គួរបញ្ជាក់ថា ក្រុមហ៊ុន HYBE បានប្រកាសពីការទិញយកក្រុមហ៊ុន Supertone ក្នុងតម្លៃខ្ទង់៣៦លានដុល្លារ នៅក្នុងខែមករា។ HYBE ថាគ្រោងនឹងធ្វើឱ្យបច្ចេកវិទ្យា AI មួយចំនួន ដែលប្រើក្នុងបទចម្រៀងរបស់ MIDNATT អនុញ្ញាត្តឱ្យអ្នកបង្កើតមាតិកា និងសាធារណជន ចូលប្រើប្រាស់បានផងដែរ ប៉ុន្តែមិនបានបញ្ជាក់ថា តើវានឹងគិតថ្លៃសេវាឬអត់នោះទេ៕
























Account
Security
Favourite Content