តារាសម្តែងកូរ៉េ Hyun Bin និង Son Ye-jin បានទទួលការចាប់អារម្មណ៍ខ្លាំងបំផុតក្នុងកម្មវិធីពានរង្វាន់ភាពយន្ត Blue Dragon លើកទី ៤៦ កាលពីថ្ងៃពុធ ដោយបានក្លាយជាគូស្នេហ៍ដំបូងគេក្នុងប្រវត្តិសាស្ត្រដែលឈ្នះពានរង្វាន់តួឯកឆ្នើមដូចគ្នាក្នុងឆ្នាំតែមួយ។


ពិធីប្រគល់ពានរង្វាន់នេះបានធ្វើឡើងនៅ KBS Hall ទីក្រុងសេអ៊ូល ដោយមានតារាសម្តែង Han Ji-min និង Lee Je-hoon ជាពិធីកររួមគ្នា។ ពានរង្វាន់ឆ្នាំនេះបានគូសបញ្ជាក់ពីបញ្ហា ដែលឧស្សាហកម្មភាពយន្តកូរ៉េកំពុងប្រឈមមុខ គឺការធ្លាក់ចុះនៃសន្ទុះគាំទ្រសម្រាប់ភាពយន្ត ចេញផ្សាយថ្មីៗ ប៉ុន្តែកម្មវិធីនៅតែផ្តល់នូវពេលវេលាដ៏គួរឱ្យចងចាំ និងបញ្ជីឈ្មោះអ្នកទទួលរង្វាន់គួរឱ្យកត់សម្គាល់។
ខ្សែភាពយន្ត “No Other Choice” ដែលបានជាប់បេក្ខភាពច្រើនជាងគេរហូតដល់ ១២ ពានរង្វាន់ បានក្លាយជាអ្នកឈ្នះដ៏ធំបំផុតនៃយប់នោះ ជាមួយនឹងពានរង្វាន់សរុបចំនួនប្រាំពីរ រួមទាំងពានភាពយន្តល្អបំផុត អ្នកដឹកនាំរឿងល្អបំផុត តួឯកស្រីល្អបំផុត តួរងប្រុសល្អបំផុត តន្ត្រីល្អបំផុត និងពានរង្វាន់តារាប្រជាប្រិយ។
ភាពយន្តនេះមានសាច់រឿងនិយាយាពីតួអង្គ Man-soo (សម្ដែងដោយ Lee Byung-hun) ជាអ្នកគ្រប់គ្រងរោងចក្រក្រដាសម្នាក់ ដែលជីវិតដ៏សុខស្រួលរបស់គាត់បានដួលរលំនៅពេលដែលគាត់ត្រូវបានបណ្តេញចេញភ្លាមៗ។ ដោយត្រូវការពារក្រុមគ្រួសារ និងផ្ទះរបស់ខ្លួន គាត់ចាប់ផ្តើមស្វែងរកការងារថ្មីដ៏លំបាកមួយ។
គួរបញ្ជាក់ថា អ្នកដឹកនាំរឿង Park Chan-wook បានឈ្នះពានរង្វាន់អ្នកដឹកនាំរឿងល្អបំផុត Blue Dragon លើកទីបួនហើយសម្រាប់ភាពយន្ត “No Other Choice” បន្ទាប់ពីឈ្នះពានរង្វាន់នេះនាពេលកន្លងមកសម្រាប់ភាពយន្ត “Joint Security Area,” “Oldboy” និង “Decision to Leave”។
កម្មវិធីប្រគល់រង្វាន់នេះបានផ្តល់នូវទស្សនីយភាពដ៏អស្ចារ្យជាច្រើន ខណៈតារាចម្រៀង Lee Chan-hyuk ក្រុម AKMU បានសម្តែងបទ “Endangered Love” និង “Vivid LaLa Love” ពីអាល់ប៊ុមទោល “EROS” ជាមួយផ្ទៃខាងក្រោយដ៏អស្ចារ្យ ដែលទាក់ទាញការអបអរសាទរពីអ្នកផលិតខ្សែភាពយន្ត និងអ្នកគាំទ្រដែលបានចូលរួម។
ប៉ុន្តែចំណុចកំពូលនៃចំណាប់អារម្មណ៍នៅយប់នោះ គឺ Hyun Bin និង Son Ye-jin។ គូស្នេហ៍ដែលបានរៀបការនៅឆ្នាំ ២០២២ និងបានសម្រាលកូនប្រុសម្នាក់នៅឆ្នាំនោះ បានទទួលពានរង្វាន់តារាពេញនិយម មុនពេលបន្តឈ្នះពានរង្វាន់ជាប្រវត្តិសាស្ត្រពីរជាប់ៗគ្នាក្នុងផ្នែកតារាសម្ដែងតួឯក។


ក្នុងនោះ Hyun Bin បានឈ្នះពានរង្វាន់តួឯកប្រុសល្អបំផុតសម្រាប់រឿង “Harbin” និងបានសម្តែងការដឹងគុណចំពោះអ្នកតស៊ូដើម្បីឯករាជ្យភាពរបស់កូរ៉េគ្រប់គ្នា ហើយក៏បានថ្លែងអំណរគុណដល់អ្នកដឹកនាំរឿង Woo Min-ho ដែលបានជឿជាក់លើលោក។ Hyun Bin បានបញ្ចប់សុន្ទរកថារបស់លោកជាមួយនឹងសារទៅកាន់ភរិយា និងកូនរបស់លោកថា៖ “ជូនចំពោះភរិយា Ye-jin គ្រាន់តែវត្តមានគាត់គឺផ្តល់កម្លាំងចិត្តដល់ខ្ញុំ និងចំពោះកូនប្រុសរបស់យើងច្រើនមហាសាល — បងស្រឡាញ់អូន សូមអរគុណ”។


មួយសន្ទុះក្រោយមក Son Yejin ក៏បានឡើងលើឆាកដើម្បីទទួលបានពានរង្វាន់តួឯកស្រីល្អបំផុតសម្រាប់ការសម្តែងក្នុងរឿង “No Other Choice”។ តារាស្រីវ័យ ៤៣ ឆ្នាំបាននិយាយដោយអារម្មណ៍រំជួលចិត្ត ដោយរំលឹកពីការឈ្នះពាន Blue Dragon ដំបូងរបស់នាងក្នុងអាយុ ២៧ ឆ្នាំ។ នាងនិយាយថា៖ “ក្តីសុបិនដំបូងរបស់ខ្ញុំក្នុងនាមជាតារាសម្ដែងគឺឈ្នះពានតួឯកស្រីឆ្នើមនៅ Blue Dragons”។ នាងបានបញ្ចប់សុន្ទរកថាដោយសារដែលឆ្លុះបញ្ចាំងពីស្វាមីថា៖ “ខ្ញុំចង់ចែករំលែកសេចក្តីរីករាយនេះជាមួយបុរសពីរនាក់ដែលខ្ញុំស្រឡាញ់ខ្លាំងគឺ — Kim Tae-pyung (ឈ្មោះកំណើតរបស់ Hyun Bin) និងកូនរបស់យើង” ៕


























Account
Security
Favourite Content