ឆ្នាំ ២០២៦ គឺជាឆ្នាំនៃការវិលត្រឡប់មកវិញ ឬ Year of Comeback សម្រាប់វិស័យខេប៉ុប ខណៈក្រុមល្បីៗដូចជា BTS, BLACKPINK, EXO និង Big Bang ត្រៀមត្រឡប់មករួមក្រុមម្ដងទៀត។

ផ្ដើមដោយក្រុម BTS នៅថ្ងៃទី១ ខែមករា នេះ សមាជិកទាំង ៧នាក់បានសរសរសំបុត្រផ្ញើដំណឹងល្អដល់ក្រុមអ្នកគាំទ្រ ARMY ថា៖ “យើងនឹងត្រឡប់មកវិញជាមួយអាល់ប៊ុមថ្មី នៅថ្ងៃទី២០ ខែមីនា”។ ទន្ទឹមគ្នានឹងមេក្រុម RM ដែល បានរៀបរាប់ពីអារម្មណ៍ផ្ទាល់ខ្លួនថា៖ “ខ្ញុំបានរង់ចាំការវិលត្រឡប់មកវិញនេះដោយអន្ទះសារជាងអ្នកណាទាំងអស់”។
ស្នាដៃថ្មីដែល ARMY បានរង់ចាំអស់ពេលជាង ៣ឆ្នាំ ៩ខែ គឺជាអាល់ប៊ុមទី១ របស់ក្រុម ក្រោយសមាជិកម្នាក់ៗចូលបំពេញកាតព្វកិច្ចការពារជាតិ និងជាអាល់ប៊ុមចុងក្រោយបង្អស់បន្ទាប់ពីអាល់ប៊ុម Proof។ កន្លងមក Big Hit Music ក៏ធ្លាប់បង្ហើបដែរថា លើសពីអាល់ប៊ុមថ្មី BTS ក៏នឹងមានកម្មវិធីប្រគំតន្ត្រីទេសចរណ៍ដូចគ្នា។

ដោយឡែក សម្រាប់ក្រុម BLACKPINK វិញ នៅដើមឆ្នាំនេះ នារីទាំង ៤ នឹងបញ្ចប់កម្មវិធីប្រគំតន្ត្រីទេសចរណ៍ Deadline នៅលើទឹកដីទីក្រុងហុងកុង ចាប់ពីថ្ងៃទី២៤ ដល់ថ្ងៃទី២៦ ខែមករា ខាងមុខ។ ខណៈ BLACKPINK ក៏មានគម្រោងបញ្ចេញអាល់ប៊ុមពេញខ្នាតមួយដែរ ក្រោយខកខានចេញអាល់ប៊ុមថ្មីក្នុងរយៈពេល ៤ឆ្នាំ ក៏ដូចជាដើម្បីអបអរដល់ខួប ១០ឆ្នាំរបស់ក្រុមផងដែរ។
នៅថ្ងៃទី១៩ ខែមករា ដែលខិតជិតមកដល់ ក្រុម EXO នឹងបញ្ចេញអាល់ប៊ុមស្ទូឌីយោទី ៨របស់ក្រុម ក្រោមឈ្មោះថា REVERXE ជាអាល់ប៊ុមចុងក្រោយបង្អស់ បន្ទាប់ពីអាល់ប៊ុម EXIST ដែលចេញជូនអ្នកគាំទ្រតាំងតែពីខែកក្កដា ឆ្នាំ២០២៣។

យ៉ាងណាមិញ ការ Comeback នេះមានត្រឹមតែសមាជិក ៦នាក់ប៉ុណ្ណោះ គឺ Suho, Chanyeol, D.O., Kai, Sehun និង Lay ខណៈ Chen, Baekhyun និង Xiumin ខកខានមិនបានចូលរួមឡើយ ព្រោះបញ្ហាកិច្ចសន្យាជាមួយ SM Entertainment។
បញ្ចប់ដោយក្រុមរៀមច្បង Big Bang បុរសទាំង ៣ គឺ G-Dragon, Taeyang និង Daesung គ្រោងនឹងឡើងសម្ដែងនៅឯមហោស្រពតន្ត្រី Coachella Valley Music and Arts Festival ឯរដ្ឋកាលីហ្វ័រញ៉ា ក្នុងខែមេសា ខាងមុខ ខណៈដែលពួកគេបានរួមក្រុមជាមួយគ្នាអស់ពេលគ្រប់ ២០ឆ្នាំ៕


























Account
Security
Favourite Content