ការសម្រេចចិត្តជ្រើសនរណាម្នាក់ជាគូជីវិតគឺសំខាន់ ប្រសិនបើជ្រើសរើសមនុស្សខុសវិញនោះ មិនយូរនោះទេគ្រួសារនឹងជួបតែរឿងរ៉ាវ បាត់អស់សុភមង្គល ឬអាចឈានដល់បាក់បែកគ្រួសារតែម្ដង។ ប៉ុន្តែប្រសិនបើយើងជ្រើសរើសមនុស្សត្រូវ យើងនឹងរស់នៅយ៉ាងមានក្ដីសុខរហូតដល់ចាស់កោងខ្នង។ ជាក់ស្ដែងបើអ្នកបានជួបនារីទាំង ៣ ប្រភេទគួរចាប់ឱ្យជាប់ព្រោះកាន់តែចាស់នាងនឹងនាំមកនូវក្ដីសុខដល់ក្នុងគ្រួសារកាន់តែច្រើន៖
១. មនុស្សចេះស្កប់ស្កល់ និងពេញចិត្តនូវអ្វីដែលខ្លួនមាន
មនុស្សជាច្រើនចូលចិត្តប្រើពាក្យថា “ពេញចិត្ត” ដើម្បីលួងលោម និងលើកទឹកចិត្តខ្លួនឯង ប៉ុន្តែមានមនុស្សតិចមែនទែនដែលអាចធ្វើចិត្តបានដូចពាក្យមួយនេះ។ ជាធម្មតាមិនមានមនុស្សណាម្នាក់ដែលគ្មានមហិច្ឆតាក្នុងចិត្តឡើយ គ្រាន់តែវានឹងតូច ឬធំទៅតាមអ្វីដែលយើងប៉ង។ ប៉ុន្តែបើមនុស្សស្រីណាដែលចេះស្កប់ស្កល់នឹងអ្វីដែលខ្លួនឯងមាន នាងចូលចិត្តរស់នៅជាមួយភាពរីករាយ និងអាចស្វែងរកពេលសម្រាកលំហែកាយដើម្បីបណ្ដេញនូវគំនិតអវិជ្ជមាន ថែមទាំងចេះសម្រុះសម្រួលទំនាក់ទំនងទៀតផង។ លើសពីនេះ ពួកគេកម្រនឹងបង្កឱ្យជម្លោះតូចក្លាយជាធំ ជាពិសេសពួកគេនៅតែបន្ដភាពរីករាយទៅដល់កូនចៅជំនាន់ក្រោយផងដែរ។
២. មនុស្សស្គាល់គុណធម៌ និងចេះធ្វើអំពើល្អចេញពីចិត្ត
ចាស់ៗតែងនិយាយតគ្នាថា “ធ្វើល្អបានល្អធ្វើអាក្រក់បានអាក្រក់” ដែលពាក្យនេះគឺបង្ហាញពីផលតបស្នងនូវអំពោះដែលយើងបានធ្វើទៅដាក់អ្នកណាម្នាក់។ ចំពោះមនុស្សស្រីដែលយល់ដឹងច្បាស់អ្វីជាគុណធម៌ និងចេះធ្វើអំពើល្អចេញពីចិត្តពិតមិនសម្ដែងច្រើនរស់នៅជាមួយស្នាមញញឹម ពរជ័យ ក្ដីសុខផ្លូវចិត្ត ចូលចិត្តបង្កភាពរីករាយ និងស្នាមញញឹមឱ្យមនុស្សជុំវិញខ្លួនជានិច្ច។ មិនត្រឹមប៉ុណ្ណេះ នាងក៏ជាមនុស្សម្នាក់ដែលជួយជំរុញឱ្យអ្នកមានការគិតវិជ្ជមាន និងចេះលើកទឹកចិត្តដើម្បីឱ្យអ្នកឆាប់សម្រេចបានសមិទ្ធផលល្អផងដែរ។
៣. ចេះគ្រប់គ្រងសុភមង្គល
មនុស្សភាគច្រើនមែនទែនគិតថាទ្រព្យសម្បត្តិច្រើនហូរហៀរទើបជាសុមង្គល ដូច្នេះពួកគេតែងតែរស់នៅប្រកួតប្រជែងជាមួយពេលវេលាដើម្បីតែភាពចង់បានខ្លាំងលើសលប់។ មហិច្ឆតា និងភាពលោភលន់ទាំងនោះគឺជាមេរោគដែលចូលទៅបំផ្លាញអនាគត បំផ្លាញក្ដីសុខក្នុងគ្រួសារដោយមិនដឹងខ្លួន។ ដូច្នេះប្រសិនបើនាងដឹងពីវិធីរកប្រាក់ចំណូល គ្រប់គ្រងចំណាយ ថែមទាំងចេះបែងចែកពេលវេលាទៅឱ្យមនុស្សជាទីស្រឡាញ់ទៀតនោះ ម្នាក់នេះហើយគឺជាដៃគូដ៏ស័ក្កិសមរបស់អ្នក។ នារីម្នាក់នោះហើយគឺជាអ្នកដែលជួយបង្កើតសុភមង្គលរហូតដល់ចាស់កោងខ្នង ៕