ជាទូទៅទំនាក់ទំនងស្នេហារវាងមនុស្ស ២ នាក់អាចដើរដល់ផ្លូវបែក ភាគច្រើនគឺតែងតែមានវត្តមានជនទីបីជ្រៀតចូលចន្លោះកណ្ដាល។ ប៉ុន្តែនេះមិនមែនជាកត្ដាតែមួយមុខដែលនាំឱ្យស្នេហាអ្នកទាំង ២ ដើរដល់ដំណាក់កាលនេះនោះទេ។ ក្នុងនោះក៏នៅមានកត្ដារួមផ្សំផ្សេងទៀត ដែលមកពីខ្លួនយើងផ្ទាល់ជាអ្នកសាងផងដែរ។ ជាក់ស្ដែងដូចជា ៣ ចំណុចខាងក្រោមនេះ៖
១. បាត់អស់ទំនាក់ទំនង

នាពេលបច្ចុប្បន្ននេះមានគូស្នេហ៍មួយចំនួនធំដែលផ្ដោតលើការបង្ហាញ និងការប្រើប្រាស់បណ្ដាញសង្គមច្រើនជាងការប្រាស្រ័យទាក់ទងគ្នាដោយផ្ទាល់។ ការសាងទង្វើបែបនេះយូរទៅនឹងធ្វើឱ្យទំនាក់ទំនងអ្នកទាំងពីរកាន់តែឆ្ងាយពីគ្នារហូតដល់ពេលខ្លះមិនដឹងថាគួរនិយាយរឿងក្នុងចិត្តប្រាប់អ្នកម្ខាងទៀតដោយវិធីណានោះទេ។ ពេលខ្លះនៅពេលដែលនិយាយប្រាប់ហើយក៏បានត្រឹមពាក្យស្ដីបន្ទោស ឬអាចមិនបានទទួលការឆ្លើយតបផងក៏មាន។ ដូច្នេះប្រសិនបើរឿងបែបនេះកើតឡើងដដែលៗជាប្រចាំធានាថាមិនយូរនោះទេ អ្នកទាំងពីរច្បាស់ជាបញ្ចប់ពាក្យថាគូស្នេហ៍ជាមិនខាន។
២. បាត់បង់ទំនុកចិត្ត

ទំនុកចិត្តគឺជាសរសៃឈាមដ៏សំខាន់ក្នុងចំណងស្នេហារបស់មនុស្ស២នាក់។ ដូច្នេះប្រសិនបើទាំងសងខាងចាប់សង្ស័យគ្នាទៅវិញទៅមកនោះគឺបង្ហាញថាអ្នកទាំង ២ ក៏ចាប់ផ្ដើមអស់ទំនុកចិត្តលើគ្នាហើយ។ ការសង្ស័យច្រើន សួរនាំខុសរឿងច្រើន រករឿងច្រើនដោយសារការច្រឡំ គឺសុទ្ធសឹងតែកត្ដាអវិជ្ជមានជះឥទ្ធិពលអាក្រក់ដល់ស្នេហារបស់អ្នកហើយ។
៣. បាត់បង់ការផ្ដល់តម្លៃ

ការផ្ដល់តម្លៃឱ្យគ្នាទៅវិញទៅមកក៏ជារឿងសំខាន់មួយដែលគូស្នេហ៍មិនអាចរំលងបានដែរ។ ការផ្ដល់តម្លៃនេះផងដែរ មិនត្រឹមតែភាពស្រស់ស្អាតខាងក្រៅនោះទេ ក្នុងនោះរួមមានចិត្តគំនិត អត្តចរិត និងអាកប្បកិរិយាផងដែរ។ ប៉ុន្តែប្រសិនបើអ្នកម្ខាងចាប់ផ្ដើមទម្លាក់តម្លៃរបស់ដៃគូ នោះទំនាក់ទំនងអ្នកទាំង ២ នឹងចាប់ផ្ដើមរសាត់បាត់បន្ដិចម្ដងៗរហូតដល់លែងមានវត្តមានក្នុងភ្នែកគេទៀតហើយ។ ដូច្នេះនៅពេលដែលអ្នកក្លាយជាមនុស្សអស់តម្លៃហើយ គេក៏មិនស្ទាក់ស្ទើរក្នុងការនិយាយពាក្យបែកដែរ៕

























Account
Security
Favourite Content