ជារឿងគួរឱ្យកោតសរសើរមួយដែលយុវជនកម្ពុជាមួយរូប ចំណាយពេលសិក្សាស្រាវជ្រាវអស់រយៈពេល ៤ឆ្នាំ ដើម្បីអាចប្រើដៃទាំងពីរគូរគំនូរក្នុងពេលតែមួយ មកគូរព្រះឆាយាល័ក្ខណ៍ សម្ដេចព្រះសង្ឃរាជ ជួន ណាត។
យុវជន យី កក្កដា ដែលជាវិចិត្រគំនូរសហសម័យមួយរូប បានប្រាប់ AMS-Infotainment ថា មូលហេតុដែលជំរុញចិត្តឱ្យលោក សិក្សា និងប្រើពេលជាយូរដើម្បីយកដៃទាំងពីរមកគូរព្រះឆាយាល័ក្ខណ៍សម្ដេចព្រះសង្ឃរាជ ជួន ណាត នេះ គឺព្រោះលោកចង់រំលឹកទៅដល់គុណូបការៈសម្ដេចសង្ឃជាន់ខ្ពស់ថ្នាក់ទី១ របស់ប្រទេសកម្ពុជា ជាបិតាស្ថាបនិកអក្សរសាស្ត្រខ្មែរ ព្រមទាំងមានស្នាមព្រះហស្ថនិពន្ធចម្រៀងជាតិ បង្កើតវចនានុក្រមខ្មែរ។ កក្កដា ចង់ឱ្យយុវជនកម្ពុជា នៅតែចងចាំ និងដឹងពីគុណតម្លៃដ៏ខ្ពង់ខ្ពស់របស់សម្ដេចសង្ឃ។
បើតាមការរៀបរាប់របស់វិចិត្រករ យី កក្កដា បានដឹងទៀតថា រូបព្រះឆាយាល័ក្ខរបស់សម្ដេចព្រះសអ្ឃរាជ ជួន ណាត ដែលខ្លួនបានគូរដោយប្រើដៃទាំងពីរក្នុងពេលតែមួយនេះ ទាមទារឲ្យមានការភាពស្រមើស្រមៃខ្ពស់។ ចំណុចទាក់ទាញរបស់រូបមួយនេះគឺប្រសិនបើយើងថតនឹងទូរសព្ទដៃ វាមិនច្បាស់នោះទេ ប៉ុន្ដែប្រសិនបើមើលដោយភ្នែកផ្ទាល់ទើបមានអារម្មណ៍ថាគំនូរនេះហាក់បីដូចមានជីវិតពិតៗ។
សិល្បករគំនូររូបនេះ បានឱ្យដឹងដែរថា ជំនាញប្រើដៃទាំងពីរមកគូររូបក្នុងពេលតែមួយនេះ មិនងាយស្រួលប៉ុន្មាននោះទេ គឺទាមទារឱ្យមានការផ្ចិតផ្ចង់ខ្លាំង និងគ្រប់គ្រងអារម្មណ៍ឱ្យបានល្អ ដើម្បីឱ្យដៃទាំងពីរ សហការគ្នាបានល្អ មកបង្កើតបានជាផ្ទាំងទស្សនីយភាពដ៏ល្អឯក។ ទម្រាំអាចប្រើដៃទាំងពីរមកគូររូបនេះ លោកចំណាយពេលដល់ទៅ ៤ឆ្នាំ ដើម្បីសិក្សា ហើយចំពោះព្រះឆាយាល័ក្ខណ៍សម្ដេចសង្ឃរាជ ជួន ណាត លោកបានចំណាយពេលរហូតដល់ទៅ ៣ខែ ដើម្បីបញ្ចប់ការងារមួយនេះ។ ជាលទ្ធផល គឺពិតជាស្អាតខ្លាំង ប្រៀបបីដូចជា រូបពិតរបស់សម្ដេចព្រះសង្ឃរាជ ជួន ណាត។
យី កក្កដា ជាសិល្បករគំនូមួយរូប ដែលបានសិក្សាស្រាវជ្រាវទៅលើការគូររូបបែបសហសម័យ និងគូររូបសិល្បៈផ្សេងៗ។ លោកសិក្សាជំនាញនេះដោយខ្លួនឯង តាមរយៈការសិក្សាស្រាវជ្រាវ និងតាមរយៈការសិក្សាពីអ្នកជំនាញផ្សេងៗ។ ក្រៅពីការគូររូបលោកអាចឆ្លាក់រូប សូន្យរូប ធ្វើជា Digital Art ជាដើម។ កន្លងទៅ កក្កដា ធ្លាប់បានគូរគំនូរដែលនិយាយអំពីប្រវត្តិសាស្ត្រខ្មែរ បាញ់ថ្នាំគំនូរនៅតាមទីកន្លែងផ្សេងៗ និងសម្ដែងសិល្បៈគំនូរនេះ នៅតាមបណ្ដាអង្គការមួយចំនួន៕