ចៀសវាងញ៉ាំអាហារនៅចន្លោះម៉ោង ៣ ពេលនេះនឹងជួយឱ្យអ្នករក្សារាងស្លីម និងស្រកទម្ងន់បានយ៉ាងងាយស្រួល។
១. ក្រោយម៉ោង ៨ ព្រឹក
សម្រាប់បុគ្គលិកការិយាល័យភាគច្រើន ចន្លោះម៉ោង ៧ ទៅ ម៉ោង ៨ ព្រឹក គឺជាពេលដែលត្រូវធ្វើដំណើរទៅធ្វើការ។ កំឡុងវ័យធ្វើការ អាចនឹងចូលគេងយប់ជ្រៅហើយពន្យារពេលភ្ញាក់បន្តិចដោយសារមានភាពហត់នឿយនិងអស់កម្លាំង ធ្វើឱ្យពេលព្រឹកមានភាពប្រញាប់ប្រញាល់។ ដើម្បីកាត់បន្ថយពេលវេលា ភាគច្រើនរំលងអាហារពេលព្រឹកហើយចូលធ្វើការតែម្តង។ ទោះជាយ៉ាងណាក៏ដោយ ប្រសិនបើមិនបានញ៉ាំអាហារពេលព្រឹកទេ ក្រពះគ្មានអ្វីកិន យូរទៅសមត្ថភាពរំលាយអាហារនឹងថយចុះ។ ការរំលងអាហារពេលព្រឹកក៏ធ្វើឱ្យអ្នកមានអារម្មណ៍ឃ្លាន ហើយញ៉ាំច្រើននៅពេលរសៀល ធ្វើឱ្យឆាប់ឡើងទម្ងន់។
អ្នកខ្លះមានទម្លាប់ញ៉ាំអាហារពេលព្រឹកយឺត ក្រោយម៉ោង ៨ ព្រឹក។ ម៉ោងនេះជាពេលដែលក្រពះមានចលនាថយចុះ អត្រានៃការរំលាយអាហារក៏ត្រូវបានកាត់បន្ថយ។ ដូច្នេះ អាហារដែលញ៉ាំចូលទៅ ត្រូវការពេលច្រើនក្នុងការរំលាយ ហើយងាយនាំទៅរកការប្រមូលផ្តុំជាតិខ្លាញ់លើស។ ហេតុនេះហើយ បើអ្នកចង់សម្រកទម្ងន់ឱ្យបានសម្រេច អ្នកមិនគួររំលងអាហារពេលព្រឹកឡើយ។ ពេលវេលាដ៏ល្អសម្រាប់អាហារពេលព្រឹកគឺចន្លោះពីម៉ោង ៧ ទៅ ៨ ព្រឹក។ ជាពេលដែលការរំលាយមានភាពសកម្មបំផុត អាហារនឹងត្រូវបានរំលាយយ៉ាងមានប្រសិទ្ធភាព។ របបអាហារដែលសម្បូរដោយអាហារូបត្ថម្ភនឹងជួយបំពេញថាមពលសម្រាប់ធ្វើការ និងរក្សាទម្ងន់ឱ្យមានស្ថិរភាព។
២. ម៉ោង ៣ – ៤ រសៀល
វដ្តនៃការរំលាយអាហាររបស់រាងកាយត្រូវចំណាយពេលប្រហែល ៤ ម៉ោង។ ប្រសិនបើអ្នកញ៉ាំនៅម៉ោង ១២ ថ្ងៃត្រង់ ម៉ោង ៣-៤ រសៀលនឹងចាប់ផ្តើមឃ្លានវិញ។ នេះជាពេលដែលយើងនិយមញ៉ាំអាហារសម្រន់ និងភេសជ្ជៈផ្សេងៗ។ តែអាហារទាំងនេះមានកាឡូរីខ្ពស់ណាស់ ហើយយើងមិនសូវបានបញ្ចេញកម្លាំង ទើបមិនអាចប្រើប្រាស់កាឡូរីក្នុងបរិមាណនេះបានទាំងអស់នោះទេ ជាហេតុធ្វើឱ្យធាត់ និងជាតិខ្លាញ់កើនឡើង។ បើអ្នកឃ្លានកំឡុងម៉ោងនេះ គួរញ៉ាំអាហារដែលមានកាឡូរីទាប ជាតិស្ករទាប ហើយញ៉ាំល្មមៗបានហើយ ដូចជា ផ្លែឈើស្រស់ គ្រាប់ធញ្ញជាតិ យ៉ាអួរ…។ អាហារទាំងនេះធ្វើឱ្យឆាប់ឆ្អែត ហើយឆាប់ឃ្លានវិញ តែសម្បូរអាហារូបត្ថម្ភនិងមានកាឡូរីទាប។
៣. ក្រោយម៉ោង ៨ យប់
បើចង់រក្សាទម្ងន់ ហាមញ៉ាំអីឱ្យសោះក្រោយម៉ោង ៨ យប់ទៅ។ ជាទូទៅ ចាប់ពីម៉ោង ៨ យប់ទៅយើងមិនសូវបានបញ្ចេញកម្លាំងកាយ ហើយត្រៀមខ្លួនសម្រាប់សម្រាក។ បើញ៉ាំនៅម៉ោងនេះ ថាមពលនឹងមិនត្រូវបានបញ្ចេញទេ។ ផ្ទុយទៅវិញ ថាមពលទាំងនេះនឹងត្រូវបម្លែងទៅជាខ្លាញ់ និងរក្សាទុកក្នុងរាងកាយធ្វើឱ្យឡើងទម្ងន់។ ពេលវេលាដែលល្អបំផុតសម្រាប់អាហារពេលល្ងាចគឺនៅចន្លោះម៉ោង ៦-៧ ល្ងាច។ ដូច្នេះហើយ ពេលចូលគេងនៅម៉ោង ១០ យប់ អាហារដែលយើងញ៉ាំភាគច្រើនត្រូវបានស្រូបយកដោយរាងកាយ មិនសូវបានរំលាយដោយក្រពះទេ។
ការញ៉ាំពេលយប់ជ្រៅ ជាការដាក់បន្ទុកលើក្រពះ ព្រោះក្រពះមិនបានសម្រាក ហើយប្រឈមមុខនឹងជំងឺផ្សេងៗជាច្រើនទៀត។ ពេលល្ងាច គួរតែជ្រើសរើសអាហារដែលងាយរំលាយ ជាតិខ្លាញ់ទាប ជាតិស្ករទាប ញ៉ាំបន្លែ ផ្លែឈើឱ្យច្រើនដើម្បីបន្ថែមសារធាតុចិញ្ចឹមដល់រាងកាយ និងចៀសវាងឡើងទម្ងន់។ ការញ៉ាំច្រើននៅពេលយប់ក៏ធ្វើឱ្យមានបញ្ហាក្នុងការគេងដែរ៕