ជ្រុងឦសាននៃរួតបាកានប្រាសាទអង្គរវត្តកំពុងស្ថិតក្នុងការជួសជុល

ជ្រុងឦសាននៃរួតបាកានប្រាសាទអង្គរវត្តនឹងបញ្ចប់ការជួសជុលនាចុងឆ្នាំ ២០២៦ ដោយបានចំណាយរយៈពេល ២ ឆ្នាំគិតបញ្ចូលទាំងការសិក្សាស្រាវជ្រាវ និងដំណើរការនៃការជួសជុល។ នេះបើតាមការបញ្ជាក់របស់មន្ត្រីគ្រប់គ្រងគម្រោងការដ្ឋានជួសជុលនៃភ្នាក់ងារបេតិកភណ្ឌកូរ៉េ Kim Dongmin។

គម្រោងជួសជុលជ្រុងឦសានបាកានបានកំពុងដំណើរការទៅមុខយ៉ាងរលូនដោយទទួលបានការសហការពីសំណាក់អាជ្ញាធរជាតិអប្សរាជាមួយទីភ្នាក់ងារបេតិកភណ្ឌកូរ៉េ ( Korean Heritage Agency) ។ គម្រោងមួយនេះចាប់ផ្ដើមនៅក្នុងឆ្នាំ ២០២៥ បន្ទាប់ពីប្រើរយៈពេល ១ ឆ្នាំ គឺឆ្នាំ២០២៤ ដើម្បីស្រាវជ្រាវនិងសិក្សាបច្ចេកទេសនៃដំណើរការជួសជុល ដោយគ្រោងនឹងបញ្ចប់ទាំងស្រុងចុងឆ្នាំ ២០២៦។

តាមរយៈមន្ត្រីជំនាញអាជ្ញាធរជាតិអប្សរាដែលបានចូលរួមក្នុងគ្រោងការខាងលើបានឱ្យដឹងថាមុនពេលជួសជុលស្ថានភាពខឿនថ្ម និងជណ្ដើរជ្រុងឦសានមានការញែក និងរហែកដែលមើលទៅមានហានិភ័យខ្ពស់គួរឱ្យបារម្ភ។ ដូច្នេះសម្រាប់ការជួសជុលក្រុមការងារបានចាប់ផ្ដើមរើថ្មនិងរៀបពង្រឹងឡើងវិញពី១ស្រទាប់ទៅ១ស្រទាប់ ដើម្បីធានាបានភាពរឹងមាំរបស់ប្រាសាទ។ បច្ចេកទេសនេះដែរត្រូវបានមន្ត្រីជំនាញរូបនេះអះអាងថាគោរពតាមអនុសាសន៍យ៉ាងត្រឹមត្រូវរបស់អ្នកជំនាញការអាដហុក អាយស៊ីស៊ី-អង្គរ និងសំបូរព្រៃគុក៕