យោងតាមរបាយការណ៍ស្ទង់មតិ Skyscanner Travel Trend 2025 បានឱ្យដឹងថាខេត្ត សៀមរាប បានក្លាយជាជម្រើសទិសដៅទេសចរណ៍ដ៏ពេញនិយមរបស់ប្រជាជនអូស្ត្រាលីក្នុងឆ្នាំ ២០២៥។
តាមរយៈសារព័ត៌មាន SBS អូស្រ្តាលី បានឱ្យដឹងថាកន្លងមកប្រទេសជប៉ុនត្រូវបានស្ថិតនៅលំដាប់ថ្នាក់ខ្ពស់បំផុតនៅក្នុងបញ្ជីទិសដៅទេសចរណ៍ដ៏ពេញនិយមរបស់ប្រជាជនអូស្រ្តាលី។ ដោយឡែក តាមការបង្ហាញនៅក្នុងរបាយការណ៍ Skyscanner Travel Trend 2025 តំបន់ទេសចរណ៍ខេត្តសៀមរាបរបស់កម្ពុជា បានឈរនៅលំដាប់លេខរៀងទី១ ខ្ពស់បំផុតសម្រាប់ទិសដៅទេសចរណ៍របស់ប្រជាជនអូស្ត្រាលីក្នុងឆ្នាំ ២០២៥ ដោយមានអត្រាអ្នកចុចស្វែងរករហូតដល់ ៥២៩ ភាគរយ។ ស្ថិតក្នុងអត្រាកំណើនដ៏ខ្ពស់នេះដែរបានធ្វើឱ្យតំបន់ទេសចរណ៍របស់កម្ពុជាមួយនេះវារដាច់តំបន់ទេសចរណ៍ក្នុងបណ្ដាប្រទេសចំនួនដូចជា ប្រទេសថៃ ហ្វីលីពីន កូរ៉េខាងត្បូង ហ្វាំងឡង់ ប៉េរូ ន័រវែស កាហ្សាក់ស្ថាន និងប្រទេសឥណ្ឌូណេស៊ី។
គួរឱ្យដឹងដែរថា លទ្ធផលនៃការរកឃើញមួយនេះផ្អែកលើទីតាំងដែលមានចំនួនអ្នកចុចស្វែងរកខ្ពស់បំផុតតាមរយៈជើងហោះហើរក្នុងរយៈពេល ១២ខែចុងក្រោយរបស់អ្នកទេសចរណ៍ក្នុងប្រទេសអូស្ត្រាលី៕
ប្រភពបន្ថែម ៖ https://www.sbs.com.au/news/article/australians-are-obsessed-with-japan-but-a-new-travel-hotspot-is-emerging/m1ot22aum