ដើម្បីធានាបាននូវគុណតម្លៃ និងធានា មិនមានផលអវិជ្ជមានប៉ះពាល់ដល់សម្បត្តិវប្បធម៌រូបីនៃមនុស្សជាតិ នៅតំបន់ប្រាសាទអង្គរ ដែលជាកេរមរតកមិនអាចកាត់ថ្លៃបានរបស់បុព្វបុរសខ្មែរ អាជ្ញាធរជាតិអប្សរា ដែលមានតួនាទីជាអ្នកអភិរក្ស ថែរក្សា ការពារ បានចេញនូវគោលការណ៍ស្នើសុំជាមុនសម្រាប់អ្នកចង់ថតរូប និងថតវីដេអូ លក្ខណៈទ្រង់ទ្រាយធំ ដូចជា ថត Pre-Wedding ឬ ថតវីដេអូផ្សព្វផ្សាយនានា។ យោងតាមលិខិតអនុញ្ញាតកន្លងមក ដែលចេញដោយអាជ្ញាធរជាតិអប្សរា បានចែងច្បាស់ៗនូវគោលការណ៍មួយចំនួន ក្រោយការស្នើសុំថតនោះ ត្រូវបានអនុញ្ញាត។
តទៅនេះ គឺជាអ្វីដែលអ្នកត្រូវធ្វើពេលទទួលបានការអនុញ្ញាតឱ្យថតនៅតំបន់អង្គរ ពីអាជ្ញាធរជាតិអប្សរា៖
១. អ្នកថតរូបភាពត្រូវគោរព និងអនុវត្តតាមក្រមប្រតិបត្តិអង្គរជាពិសេសត្រូវស្លៀកពាក់ឱ្យបានសមរម្យ។ ហាមប្រើប្រាស់យន្ដហោះបញ្ញាខ្នាតតូច (Drone) សម្រាប់ការថតនេះឡើយ។ ហាមមានការរៀបចំ ឬ តុបតែងឆាកសម្រាប់ការថតនេះ។ ក្រោយពេលថតចប់ អ្នកស្នើសុំត្រូវប្រគល់វីដេអូ និងរូបភាពប្រគល់ជូនមកអាជ្ញាធរជាតិអប្សរាមួយច្បាប់។ ការថតនេះត្រូវអនុវត្តតាមប្លង់ទីតាំង (ដូចមានភ្ជាប់មកជាមួយ) ដែលអាជ្ញាធរជាតិអប្សរាអនុញ្ញាតឱ្យតែប៉ុណ្ណោះ។
២. ការថតនេះមិនមែនសម្រាប់ធ្វើអាជីវកម្មឡើយ (Noncommercial purpose)។ ប្រសិនបើការថតមិន ស្របទៅនឹងខ្លឹមសារនៃការស្នើសុំ លិខិតអនុញ្ញាត នៃការថត រួមទាំងការធ្វើឱ្យ ប៉ះពាល់ដល់តម្លៃន រមណីយដ្ឋានអង្គរ ក៏ដូចជាតម្លៃនៃវប្បធម៌ខ្មែរសកម្មភាពថតនេះនឹងត្រូវបញ្ឈប់ជា បន្ទាន់ និងដោយគ្មានល័ក្ខខ័ណ្ឌ។ អ្នកផលិត និងអ្នកប្រើប្រាស់រូបភាពត្រូវទទួលខុសត្រូវទាំងស្រុងទៅលើផលប៉ះពាល់ជាអវិជ្ជមាន ទាំងឡាយដែលកើតមានទាំងក្នុងពេលថត និងពេលប្រើប្រាស់។
៣. អ្នកថតរូបភាពត្រូវសហការឱ្យបានជិតស្និទ្ធជាមួយភ្នាក់ងារការពាររូបភាពអង្គរ និងបុគ្គលិកបច្ចេកទេស ដែលចុះតាមដានការថតដោយផ្ទាល់ និងដែលប្រចាំការនៅទីនោះ។ អ្នកថតត្រូវធានាសំអាតបរិវេណថតឱ្យបានស្អាតដូចដើម ក្រោយពេលថតចប់។
៤. អ្នកថតរូបភាពមានសិទ្ធិតែថតរូបភាពប៉ុណ្ណោះ មិនមានសិទ្ធិរុះរើហេដ្ឋារចនាសម្ព័ន្ធដែលរៀបចំដោយអាជ្ញាធរជាតិអប្សរា ឬអង្គការផ្សេងៗដែលកំពុងជួសជុលប្រាសាទនោះទេ។
៥. ប័ណ្ណចេញ-ចូលរមណីយដ្ឋានអង្គរត្រូវទិញជាធម្មតាសម្រាប់ជនបរទេស៕