កាលពីថ្ងៃទី៣១ ខែសីហា ឆ្នាំ ២០២៤ ថ្មីៗនេះ ព្រឹត្តិការណ៍ Pre Event GUMBALL 3000 បានចាប់ផ្ដើមហើយ ដោយក្រុមរថយន្ត Supercar ប្រណីតៗមិនក្រោយរយគ្រឿង បានធ្វើដំណើរចេញពីសួនច្បាររាជធានីភ្នំពេញ បង្កការចាប់អារម្មណ៍ខ្លាំងពីសំណាក់មហាជន។ អ្វីដែលគួរឱ្យចាប់អារម្មណ៍នោះ គឺរថយន្តរបស់លោកឧកញ៉ា លាង ពៅ (ភីធើរ) សមាជិកក្រុមប្រឹក្សាភិបាលក្រុមហ៊ុនជីបម៉ុងគ្រុប គឺពិតជាលេចធ្លោខ្លាំង មិនថារូបរាងដ៏ប្រណីត ជាមួយនឹងការតុបតែងបន្ថែមទៀត ពិតជាទាក់ភ្នែកមហាជនជាខ្លាំង ជាពិសេសអ្នកស្នេហាវិស័យ Supercar។
ប្រិយមិត្តមួយចំនួន ដែលចូលចិត្តតាមដានទាក់ទងនឹងរថយន្តទំនើបៗ ប្រហែលជាបានស្គាល់ហើយថា រថយន្តដែលលោកឧកញ៉ា លាង ពៅ (ភីធើរ) យកចូលរួមក្នុងក្បួន Pre-Event GUMBALL 3000 ជាម៉ាកអ្វី តែមហាជនខ្លះប្រហែលជាមិនទាន់បានដឹងនៅឡើយ។ បើតាមអ្នកជំនាញផ្នែករថយន្តដែលបានចូលរួមក្នុងព្រឹត្តិការណ៍ខាងលើនេះដែរ បានបង្ហើបប្រាប់ AMS ថា រថយន្តរបស់លោកឧកញ៉ា លាង ពៅ (ភីធើរ) គឺម៉ាក Bugatti Chiron ដែលជាប្រភេទរថយន្តដ៏ល្បីមួយនៅលើពិភពលោក ហើយមិនមានច្រើនគ្រឿងទេនៅក្នុងប្រទេសកម្ពុជា។
គួរឱ្យដឹងដែរថា លោកឧកញ៉ា លាង ពៅ (ភីធើរ) អគ្គនាយកពហុពាណិជ្ជកម្ម និងជាសមាជិកក្រុមប្រឹក្សាភិបាល នៃក្រុមហ៊ុន ជីបម៉ុង គ្រុប បានចូលរួមយ៉ាងសកម្មក្នុងនាមជាដៃគូសហការជាមួយនឹងក្រសួងទេសចរណ៍ រួមទាំងដៃគូពាក់ព័ន្ធផ្សេងៗទៀត ដើម្បីរៀបចំព្រឹត្តិការណ៍ GUMBALL 3000 នៅកម្ពុជាកាន់តែអស្ចារ្យ កាន់តែកក្រើក ដែលជាការចូលរួមចំណែកដ៏ធំក្នុងការផ្សព្វផ្សាយពីកិត្យានុភាពរបស់ប្រទេសកម្ពុជាទៅកាន់ពិភពលោក។ ព្រឹត្តិការណ៍ GUMBALL 3000 នឹងធ្វើឡើងនៅកម្ពុជា រយៈពេល ៣ ថ្ងៃ គឺចាប់ពីថ្ងៃទី១៥ ដល់ថ្ងៃទី១៧ ខែកញ្ញា ឆ្នាំ ២០២៤ ខាងមុខនេះ ដែលនឹងមានព្រឹត្តិការណ៍អស្ចារ្យជាច្រើន ទាំងនៅភ្នំពេញ និងខេត្តសៀមរាប ៕