សាធារណជនបានប្រទះឃើញ Zhao Lusi ចេញមកលក់នំតាមចិញ្ចើមផ្លូវយ៉ាងរីករាយ បន្ទាប់ពីមានបញ្ហាសុខភាព និងភាពរកាំរកូសក្នុងអាជីពការងារ ខណៈតារាស្រីរូបនេះកំពុងត្រៀមខ្លួនត្រឡប់ចូលមកសម្ដែងជាថ្មី។ នេះបើផ្អែកតាមការចុះផ្សាយរបស់ Kbizoom នៅថ្ងៃទី២២ ខែមករា។

ថ្មីៗនេះ វីដេអូដែល Zhao Lusi បើកតូបអាហារតាមចិញ្ចើមផ្លូវត្រូវបានចែករំលែកនៅលើបណ្ដាញសង្គមចិន ដោយបង្ហាញវត្តមានរបស់តារាស្រីវ័យ ២៧ឆ្នាំរៀបចំអាហារ ជជែក និងថតរូបជាមួយអ្នកគាំទ្រយ៉ាងរីករាយ។ តាមរយៈវីដេអូនេះ សាធារណជនបានសរសើរពីមន្តស្នេហ៍ និងភាពសាមញ្ញរបស់នាង។
កន្លងមក តារាសម្ដែងរូបនេះ ធ្លាប់ Live ជជែកជាមួយអ្នកគាំទ្រម្ដងរួចមកហើយ ដោយនាងបានប្រាប់ថា បើនាងមានឱកាស នាងចង់បើកតូបលក់អាហារតាមផ្លូវ ស្របទៅនឹងសកម្មភាពខាងលើ បង្ហាញពីចំណង់ចំណូលចិត្តក្នុងការប្រើប្រាស់ជីវិតសាមញ្ញៗជាប្រចាំថ្ងៃ។

គួរឱ្យដឹងផងដែរថា សកម្មភាពដ៏កម្រនេះ បានកើតឡើងបន្ទាប់ពីនាងបានជួបនឹងបញ្ហារកាំរកូសជាបន្តបន្ទាប់។ ជាក់ស្ដែង កាលពីខែធ្នូ ឆ្នាំ២០២៤ នាងបានជួបប្រទះបញ្ហាសុខភាពធ្ងន់ធ្ងរក្នុងពេលថតកុន ដែលតម្រូវឱ្យនាងផ្អាកសកម្មភាពការងារទាំងស្រុង។ Zhao Lusi បានធ្វើរោគវិនិច្ឆ័យឃើញថា នាងកំពុងមានជំងឺធ្លាក់ទឹកចិត្តធ្ងន់ធ្ងរ និងការថប់បារម្ភដោយសារតែការប៉ះពាល់នឹងសម្ពាធការងារខ្លាំងរយៈពេលយូរ។
នៅក្នុងខែសីហា ឆ្នាំ២០២៥ កន្លងទៅ តួឯកស្រីរូបនេះ ទទួលបានការចាប់អារម្មណ៍ជាថ្មី ដោយនាងបានចេញមកទម្លាយពីសកម្មភាពមិនសមរម្យដែលនាងទទួលរងពីទីភ្នាក់ងារចាស់ ខណៈអតីតទីភ្នាក់ងារនេះក៏បានប្ដឹងផ្ដល់ទាមទារសំណងពីរូបនាង។
លុះមកដល់ខែវិច្ឆិកា ឆ្នាំ២០២៥ លើឆាកប្រគំតន្ត្រីឆ្លងខួបកំណើតវ័យ ២៧ឆ្នាំ Zhao Lusi បានប្រកាសទាំងទឹកភ្នែកថា នាងបានបង្កើតស្ទូឌីយោមួយ និងសម្រេចចុះកុងត្រាជាផ្លូវការជាមួយនឹងទីភ្នាក់ងារថ្មី រាប់ជាការចាប់ផ្ដើមជំពូកថ្មីក្នុងអាជីពសិល្បៈសម្រាប់នាង៕

























Account
Security
Favourite Content